Чернобыль АЭС али но сутэ

Удмурт Дунне
By Удмурт Дунне Апрель 28, 2016 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Адскисьтэм ож

Туэ 26-тӥ апреле Чернобыль атомной электростанция пуштэм дырысен 30 ар тырме. Сое кысонэ пыриськиз Удмуртиысь ог 3 сюрс 500 мурт. Ог 200-эз Мужество орденэн пусъемын. Сыӵеос радын — Дэри черкогуртысь Александр Ишматов.

 Тюрьмаен курдатон

— Чернобыль сярысь курдыт ивор мон дорозь вуиз Киргизиысен. Соку атомной электростанция пуштэм дырысен ог 3 толэзь ортчемын ни вал. Телевизор но радио пыр уго номыр со сярысь ӧз поттылэ, — тодаз вае Александр Ишматов. — Та шуныт палъёсы пичи дыръям анай-атае, вордскем Алнаш ёроссэс кельтыса, лыктӥзы. Киргизиын ик дышетски. Механизатор луи. «Сельхозхимия» огазеяськонэ ужаны интыяськи. Мыным 29 арес вал, военкоматэ кысканы ӧдъязы. Семипалатинскын ӝыны ар ӵоже учениос луозы шуизы, отчы, пе, дасяськомы. Со понна медкомиссия пыр 3 пол поттӥзы. Сокугес ик отысь но татысь кылӥськыны ӧдъяз Украинаын луэм юзырес учыр сярысь. Но соку но шӧдонэ ӧй вал на, монэ Чернобыле дасяло шуыса. Военной форма сётэмзы бере гинэ сюлэм шымырскиз. Бератаз алӥзы на: паспортады кытын улӥськоды гожтэмын, отын ик улэ — уйшор уйин но лыктыса нуыны быгатом. Семьяеным сокугес гинэ выль корка басьтӥм. Отчы прописка лэсьтыса ӧй вутты вал. Соин ик быдэс толэзь ӵоже анай-атае дӥньын изьылӥ.

чернобыль

А. Ишматов (бурысез) Чернобыльысь дораз посылка келяны дасяське.

Военкомат азе ужпум пуктэмын вал: сыӵе-сыӵе специальность басьтэмъёс кулэ. Семьяед вань-а, ӧвӧл-а, нылпиед кӧня — ӧз ик учкылэ. Тазалыкез но, арлыдэз но санэ ӧз басьтылэ. Курдатъязы: пегӟиды ке, тюрьмае пуктом. Зэм, 3 нылпиен муртъёсты ӧз исалэ. Но уноез Чернобыль пыр потэм пиос — еж макеос, соку гинэ армиысь берытскемъёс. Мынам 2 нылъёсы вал ни. Чернобыле нуыкузы, семьяеным люкиськыны ӧй вутты. Кузпалы, монэ басьтэмзэс тодытэк ик, уж дораз  кылиз. Солы бератаз ни телефон пыр ивортӥ сюрес вылэ потэммес.

Вуттӥзы милемыз, 30 муртэ, Белоруссиысь Новосёлки черкогурт котыре интыяськем нюлэскы. Пуштэм станцилэсь 157 иськемын. Со вал 1986-тӥ арын 14-тӥ октябре. Экскаватор шоры возьматӥзы, тодматскы, мазэ ке тупатоно ке, тупатъя, шуизы. Соку номырлэсь кышкан ӧй вал. Радиациез уго синмын адӟыны уг луы, нош милемлы солэн кышкыт сиосыз сярысь ӧз ик вераллялэ. Огзэ тодӥськомы вал: кулэ ужаны. Зэм, Чернобыль котырысь гуртъёс вӧзтӥ ортчыку, мылкыд пожаськылӥз ик: воксё бушесь, пересьёс но пудо гинэ адӟисько. Котькуд гурт дорын пропускной пункт.

 
• Украинаысь Чернобыль атомной электростанцилэн 4-тӥ энергоблокез пуштӥз 1986-тӥ арын 26-тӥ апреле уйин. 140 тонна радиоактивной сурет инме пазьгиськиз. Татын улӥсьёс 90 пол золгес облучение басьтӥзы, Хиросимае куштэм бомба улэ шедемъёс сярысь.

• Аварилэн бервылыз тужгес зол шӧдӥськиз Украиналэн уйпал люкетаз, Россилэн шундыпуксён палаз но Белоруссиын. 5 миллион гектар музъем гырыны-кизьыны ярантэм луиз. Станция котырысь 30 иськеме пыраны ӧз лэзе, гуртъёс музъеме согемын.

• Станциез кысонэ пыриськиз 600 сюрс мурт, та пӧлысь 360 сюрсэз — Россиысь.

• Чернобыльын авария луэмлэсь азьло Россиын пуктыны чакламын вал 10 выль атомной электростанция, куд-огзэ ӝутыны но кутскизы. Юзырес учыр бере ваньзэ пытсазы. [/blockquote]

Сиосын нюръяськон

— Экскаваторме прицепен нуизы Припяте, — веранзэ азьланьтэ Александр Алексеевич. — Адямиосыз станциез кысонэ нуналлы быдэ солань-талань нуллӥзы. Милемыз 3 часын сайкато но автобусъёсын ужаны нуо вал, ӝыт берен Новосёлкиысь полке вутто. Нош техника Припяте ик кыле ук. Кӧня радиациез пыӵатӥз, дыр, со корт! Зэм, кыӵе ке препаратъёсын миськылӥзы сое нуналлы быдэ. Но марзэ ми валаськомы вал! Техникамес куддыр одӥг кутскемен кӧня ке пол миськылӥзы. Соку лулӟылӥмы: эх, радиациез трос люкаськем. Оло нош нокыӵе порошок но ву ӧз гылтылэ «сисьтӥсь» кышкыт сиосты! Адскисьтэм тылын сутӥсь станция ужан интыелэсь 200-300 метр кемын вал.

Бульдозеръёсын донгаллязы радиациесь луэм музъемез. Ӵапак сое ми экскаваторен ӝоктылӥмы машинаосы но могильнике нуллӥмы Припять город сьӧры. Со могильникез Припять котырысь радиоактивной суретэн ӧжытгес «саптаськем» музъемен ик ӵоксамы. Туннэ йырын малпасько ни: али ке но отысь кӧня радиациез потэ меда!

Зэм, 29 арес дыръя кышкан сокем ик бадӟым ӧвӧл на, лэся. Тазалык юн, улыны мылкыд бадӟым. Утиськон арбериос но ӧз сётъялэ бере, соин но, лэся, кышканы тодамы ӧз лыктылы. Оло, кышканмы медаз луы шуыса, озьы каризы. Огез пияш кулэезлэсь кемагес реактор вадьсын ужаз, нырысьтыз но пельысьтыз вир вия ни вал. Нош милям номыр сыӵеез ӧй вал бере, ми ум черлаське кожаллямы.

Бордамы дозиметръёс вал ик. Но со огшоры адямилы валантэм лэсьтэмын вал. Нимысьтыз приборен герӟаськытэк, кӧня тон облучение басьтӥд, уд но тоды. Нош приборысь экранэз ми пала ӧз ик берыкъялэ. Тазалыкмес куддыр эскерылӥзы ик. Берло шараяськиз: нокинлы но, 25 БЭР-лэсь трос (рентгенлэн биологической эквивалентэз) облучение басьтӥз шуыса, гожтыны уг яра. Сыӵе доза басьтэм адямиез уго соку ик висись радэ пыртыны, дораз келяны, коньдон тырыны кулэ вал. Чернобыль станция котырын толэзь ӵоже ужатозям, мынам мугорам ог 19 БЭР люкаськиз.

Бератаз ни монэ станция котыре ӧз лэзе. Но доре но бертыны ӧз сётэ. Полкез тырттэм уд кельты ук. Тэк пукыны но секыт. 105 манет командировочной сёто вал. Соин басьяськыса, доре посылка куддыр лэзьялляй. Уйлы аслым уж шедьтӥ. Палаткалэн борддорез 30 сантиметр пасьта, нош вӧлдэтэз — брезент коже гинэ. Гурез ӧд эсты ке, палаткаын изись 30 адями кынмоз. Кочегаре кариськи. Нуназе Новосёлки черкогуртын улӥсь семьяослы мар но со юрттӥськисько вал. Ог 10 семья гинэ кылемын вал отчы.

 Доре сюрес — кузь

— Киргизие вуи, Чернобыле кошкеме дырысен 4 толэзь ортчыса гинэ. Семьяосы нырысь-валысь ӧз ик тодмалэ. Та дыр ӵоже мыйык лэзьыса вуттӥ уго. Сямы но воштӥськем, лэся: ми понна сюлмаськисьгес луид, шуиз кышное. Луод но! Монэн ӵош Чернобыле басьтэмъёс пӧлысь одӥг-огез син куспын ик ӝыны ар ӵоже быризы. Куд-огез юон вылэ чӧлскиз. Иммунитетэз ӝутӥсь эмъюм ваньмылы гожтӥзы уго. Нош лэсьтэмын вал со спирт вылын.

Аслам тазалыке куашканы кутскиз, бертэме бере 3 ар ортчыса. Йыры, кискачен кадь, шӧдтэк шорысь юн кырмылэ. Со сяна, тӧл пельтэ гинэ, пыэд кырмиське. Но Чернобыльысь бертэме бере милям эшшо одӥг нылмы вордӥськиз на. Солэн тазалыкез ляб. Пуштэм станция кемалась саркофаг улэ пачкатэмын ке но, солэн адскисьтэм тылыныз нюръяськон мугоръёсамы али но мынэ. Монэ со «ож» инвалид кельтӥз.

Кин тодэ, али но, оло, Киргизиын ик улысалмы. Но выльдӥськон (перестройка) вакыт кутскемен, мукет выжыысь калыкъёсты отӥгес карыны кутскизы. Шуо вал: уж шедьтэмед потэ ке, киргиз кылэз дышеты. Нош дышетскон дуно. Уж ӧвӧл,  сюре ке но, уждун пичи тыро. Корка бадӟым, эстыны номырин. Киргизиын инкуазь узырлыкъёс вань, но  ваньмыз гурезьын. Эгыр вань, но шунытэз ӧвӧл, ваньмызлы со уг но тырмы. Калык кин кытчы кошкыны кутскиз. Отчы кылизы на соос, кинлы номырин но нокытчы кошкыны.

Мон но, уж утчаса, вордскем палъёсам шонтӥ. Дэри черкогуртозь вуи. Татын мыным ЖКХ-ын уж ӵектӥзы, квартира сётӥзы. Соин ик семьяме но анай-атайме Удмуртие ваёно кариськи. Киргизиысь вузам коркалэн уксёез сюрес дунлы но вуж «Москвич» басьтыны сяна ӧз тырмы. Зэм, дэриослэсь нырысь-валысь кылӥсько вал: вуиз гинэ, квартира сётӥзы ни. Алнашысь луэмме но Чернобыле ветлэмме тодэмзы бере гинэ буйгазы.

Али корка пуктӥсько. Киос тэк пукыны уг чидало. Пуэн вырыку, тазалык капчигес луэ кадь.

Елена Сараматова

 

 

 

Удмурт Дунне
By Удмурт Дунне Апрель 28, 2016 12:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<