Чернобыль АЭС али но сутэ

Удмурт Дунне
By Удмурт Дунне Апрель 28, 2016 14:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ижысь 5 номеро поликлиникаысь валтӥсь врачлэн воштӥсез Василий Мурашов Чернобыль атомной станциез кысонэ пыриськиз.

В. Мурашов (бурысез) радиациез мертаса улӥз.

В. Мурашов (бурысез) радиациез мертаса улӥз.

— Адямиослэсь нырысь-валысь ватылӥзы ке, кытчы но малы соосты дасяло, врачъёслы шонерзэ веразы, — шуэ Василий Сергеевич. — Ми соку егитэсь, задор мылкыдоесь вал. Шонер улыны тыршимы, асьме кунэнымы данъяськимы, сое утьыны дасесь вал. Соин но шуи: мыно. Зэм, мон тодӥсько вал, мар со радиация, валасько вал, солэсь нокытчы но уд пегӟы. Уката ик полкмы пуштэм атомной станцилэсь 28 иськеме гинэ бусы шоры интыяськемын луоз шуыса тодӥ. Огез буйгатылӥз:  авария бере ортчемын ӝыны арлэсь трос. Озьыен, тужгес пӧсь сиос кысэмын ни. Собере, ми дышетскон вакытэ валэктылӥзы: пичи облучение мугорлы пайда вае. Чернобыльысен адӟиськиз: радиация тазалыкез лушкем сисьтэ. Станция котырын ужаны Япониысь роботъёс вуттэмын вал. Корт гинэ но тӥяськылӥз ук! Соос интые адямиосты лэзьязы. Гадьзэс но тыбырзэс свинецлэсь айшетэн шобыртылӥзы, но со гинэ радиоактивной сиослэсь уг утьы. Радиация лыосы гинэ но люкаське. Инкуазьын лымы, кезьыт, нош солдатъёс ӟырдаса вуо — сокем зол бызьыло. Радиация ичигес басьтыны тыршеменызы, куалектэменызы но кышкаменызы, радио пыр сётэм командаосты но мырдэм кылӥськомы, шуо вал.

— Адямиослы кӧня облучение басьтэмзы сярысь лыдпусъёсты кулэстыса верало вылэм, шуо.

— Уг тодӥськы, кызьы ужаллязы мукет полкъёсын, но ми котькуд адямиез нуналлы быдэ эскериськомы вал. Облучениез возьматӥсь лыдпусъёсты кулэстон сярысь приказ бумага вылын гожтэмын ӧй вал, но озьы лэсьтыны косылӥзы. Составез ӵем вошъяд ке, уж дыггес мыноз. Соин ик адямиез кулэлэсь уногес ужато вал. Таин сэрен ик облучение басьтэмзэс но пичигес гожъязы. Врач сямен мон талы пумитъяськылӥ, таин быгатэмея нюръяськыны выри. Но военнойёслэн йырзы мукет сяменгес ужа — соосты уд куасалты.

Мон дыръя нырысь-валысь доза 20 рентген вал. Тамында облучение басьтытозязы, ужатъязы адямиосты. Но отӥяз шӧдӥськыны кутскиз: та но тазалыкез туж зол быдтэ. Соин ик  лыдпусэз 12-озь кулэстӥзы, собере воксё но 8-озь васькытӥзы. Адямиосты жаляны кутскизы, ӧжытгес облучение мед басьтозы шуыса. Адӟе вал, кыӵе шумпотылӥзы адямиос, доразы бертонзэс тодыса. Поездэз адӟыса, «ура!» кесясько вал.

Котькуд адямилы медкнижка лэсьтылӥм. Но доразы бертыкузы, вань со книжкаосты военнойёс бичало но Ленинградысь военно-медицинской академие нуо вал. Со документъёс вылын одӥг гинэ доктор диссертация ӧз гожтэ, дыр! Но туннэ сое шара уг верало на.

— Адямилэсь тазалыксэ юнматон понна кыӵе ке эмъюм сётъяллязы-а, кызьы ке нимысьтыз сюдӥзы-а?

— Иммунитетсэс ӝутон вылысь витаминъёс сётъяны выримы ик. Но соослэн пайдазы вал-а, вераны шуг. Куд-огез лушкем утиське вал курытэныз. Кудӟытӥсез уго зэмен ик радиацилэсь уте. Зэм, горд вина гинэ. Но бусы шорын кытысь вина шедьтод ай?

Сиён олокыӵе пӧртэм ӧй вал, но сютэм нокин ӧз пукы. Ваньмыз со склад пушкын, музъемын гыркын, утиське вал, радиация медаз пыӵа шуыса. Но со сиёнэз но ялан эскерылћ. Огпол сьӧдчабей кеньырез лабораторие нуи. «Черламын» вылэм — ваньзэ могильнике поттӥмы.

Со сяна, станция котырысь ваньзэ арбериосты радиацилы эскерылӥ. Дӥсез гинэ но. Станцие мынон азьын нимаз дӥсь сётӥськылӥз, часте вуон азьын сое ваньзэ вошъязы. Нормалэсь трос радиация пыӵатэм дӥсез складэ люкаллязы, сое отстойник нималлязы. Огпол котырзэ эскерыны ӧдъяй. Склад ӧс доры 5 метр кеме вуытэк ик, дозиметрлэн стрелкаез бызьылыны ӧдъяз. Ӧс дораз вуи но, дозиметр шузимиз: отын станция пуштэм бере кадь бадӟым радиация вал.

— Марлы тужгес паймиды?

— Воргоронъёслэн дӥсьтӥсь луэмзылы абдрай. Кышноос пӧламы одӥг но ӧй вал. Нош пиос котьма лэсьтыны дасесь вал. Полк сылэ плацын, частьлэн командирез вераське. Пиос кесясько: келялэ ни станцие, тэк пукыны ӧм лыктэ. Юрттэмзы, станциез ӝоггес пытсамзы потэ вал. Зэм, пӧлазы кышкасьёсыз но вал, висем улсы кариськисьёс. Куд-огез дозиметрзэ юромо урод интые кельтылӥз, радиация трос басьтӥз мед кожалозы шуыса. Пӧламы армия бере воксё еж пиос но вал. Котырысь буш гуртъёсы пегӟо но бакчаостӥ ветло. Огпол маке мында виктория ишкыса сииллям, тодо ке но, уг яра шуыса. Мукетъят Припять шурын чорыгаса пукиллям, шыд пӧзьтыса сииллям.

Чернобыль пыр  потэмъёс пӧлысь огез но таза ӧвӧл. Унозэ пери шуккемын. Мон ачим но сыӵе.

— Врач ке но, асьтэдыз утьыны ӧд тырше?

— Утиськон сярысь куддыр вунэтӥськод. Шоре нокин уг ыбылы ук — сиос уг адско. Радиация но интыен-интыен гинэ усемын вал. Но, сюлэмы чурытомысагес, бертӥ. Военнойёслэн адямиосты жалямтэзы монэ но лекгес кариз.

Елена Сараматова

Удмурт Дунне
By Удмурт Дунне Апрель 28, 2016 14:04 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<