Андрей Исаевлэн: «Бадӟым тур» — асме лэсьтон но Удмуртиысь туризмем азинтон

Удмурт Дунне
By Удмурт Дунне 28 апреля, 2016 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
исаев

А. Исаевлэн гужем коркаез — Удмуртиысь нюлэс.

Котыр сюрес — вӧё сюрес

«Бадӟым тур» проект Удмуртиез усьтэ

Ижысь Андрей Исаев (Перевозчиков) 6 толэзь ӵоже малпа котыртыны Удмуртиез но лэсьтыны аслэсьтыз маршрутсэ. Проектэзлэн нимыз «Бадӟым тур».

 — «Бадӟым тур» проектэдъя тон малпаськод пыдын ортчыны 2 сюрс 500 иськемлэсь ятыр, вуылыны шаермылэн вань 25 ёросъёсаз. Удмуртиын туризмез азинтон яке калыклы астэ возьматон понна?

— Соиз но, таиз но вань. Нырысь ик, тазалыко улон сярысь малпанэз вӧлмытон, Удмуртиын туризмез азинтон понна. Мынам «Бадӟым тур» сайтам али Россиысь гинэ уг, кунгож сьӧрысь но муртъёс пырало. Трос адямиосын мон тодматски, Шри-Ланкаез но Индиез котыръякум, тросэз соос Россилэсь кытынзэ но уг тодо. Шаертӥ ортчон, малпасько, калыклы Удмуртиысь туризмез азинтон борды пыр-поч кутскыны мылкыд сётоз. Удмуртия — туж тунсыко инты. Но туризм азинскемын ӧвӧл, угось инфраструктура начар, сюресъёс уродэсь. Нош мон сюрес лёго бусыостӥ, нюлэсъёстӥ, отӥ пыдын мыноно луоз. Али вань ни мынам пытьыетӥм ортчыны дасяськись адямиос. Экспедиция дыръя мон нырысь ик вуыло ёрос центръёсы. Котькудаз 3 нунал пала уло. Со куспын тодматскыса вутто пӧртэм адямиосын, тодо ёрослэн тунсыко интыосыз сярысь. Кылдӥз ке, гуртъёсы но потало.

Ас азям пуктӥ ужпум: та проектэным Удмуртие кысконо Россиысь 1 миллион пала туристъёсты, дуннеысь — 10 сюрс пала. Кызьы? «Бадӟым тур» брендме азинто, Удмуртиысь тунсыко интыос сярысь вотэсбам но мерлыко бамъёс пыр вераса. «Бадӟым тур» — со вотэсысь интерактивной инты, кытын пусъемын луоз ортчем сюресэ, поттэмын тунсыко интыос сярысь гожъямъёсы, видеоосы, кылдытэмын киужъёсъя центръёсысь арбериосын вуз карон.

Конечно, та проектын «самопиар» шуонэз но вань, малы ке шуоно мон асме ачим лэсьтӥсько. Вуоно проектъёсме улонэ пыӵатон понна со туж кулэ луоз.

— Тон утчаськод юрттӥсьёс. Шедизы ни-а?

— Та проектме огнамлы улонэ пыӵатыны шуг луоз, мыным кулэ юрттӥсьёс — экспедиция дыръя сайтме, «ВКонтактеысь» огинме нуоно, ёрос администрациосын кенешоно, ёросъёсысь тунсыко интыосты утчано. Конечно, администрацие пырак вазиськид ке, мыным возьматозы ёрослэсь ушъяськымон интыоссэ. Мынам солэсь мукет, тодмотэм, палзэ но адӟем потэ.

Кылем арняе «Туризм. Спорт. Шутэтскон» адӟытонэ пыриськи. Отын ёросъёсысь пӧртэм огазеяськонъёсын, киужъёсъя центръёсын тодматски, аслам проектэ сярысь вералляй. Табере соослэн но потэ ортчоно сюресэлэн оглюкетэз луэмзы. Зэмзэ ке, мон жади ини аслам проектэ сярысь вераса ветлыны. Министерствоосы, администрациосы гожтэт гожъяно, огкыл тупатъяно — трос дыр быре. Министръёсын пумиськылӥ ни, кызьы ке но мед юрттӥськозы шуыса. Мугорез кыдатон культурая, спортъя но егитъёсын ужанъя министерствоын мыным туристической арбериосын (палаткаен, кылсярысь) юрттыны быгатом шуыса оскытӥзы.

— Тон олокыӵе но проектъёслы кичӧлтӥсь луиськод, пыриськид «Твиэкспедицилэн» командаяз, соку тӥ блогъёсты пыр возьматъяды «Ижводоканаллэсь», «Мынам Удмуртие» ТРК-лэсь ужамзэс, бичалляд блогеръёсты ульчаосысь жуг-жагез утялтон понна. Нош кылем арняе потӥд Ижысь цирк азе но верад: цирк луыны кулэ пудо-животъёстэк но пӧйшуръёстэк.

— Пӧйшурез яке пудо-животэз вӧсь карытэк дышетыны уг луы. Шри-Ланкаын быдэс нуналме слонэн ортчытэме бере сое эшшо но золгес валай. Мон адӟи, кызьы слонэн выре солэн кузёез, кызьы пӧйшур солэсь косэмъёссэ мылыз потытэк быдэсъя. Огъя вераса, соос уг ярато ог-огзэс. Погонщик понна слон — уксё вайись.

17-тӥ оштолэзе быдэс дуннеын ортче «Цирк — пудо-животъёстэк но пӧйшуръёстэк» акция. Вотэсын пукыкум, син улам шуак со сярысь ивор шедиз. Шедьтӥ та акцилы сӥзем сайтэз. Россиын пудо-животъёслы дурбасьто 100-лэсь ятыр каръёс, Ижкар пӧлазы ӧй вал. Акцие люкаським 8 кузя. Удмуртиын кыӵе ке но ужрадэз ортчытон, калыкез люкан понна трос кужымез быдтоно.

Мон сюлмаськисько инкуазь сярысь. Жаль, «Блогеръёс жуг-жаглы пумит» акция али гуньдӥз. Адямиос уло туннэ нуналэн, уг малпасько азьланез сярысь. Но, шумпотымон, югдур каллен воштӥське ини. Мон ачим азьвыл гань-гань улӥ: дор — уж, уж — дор. Адямиосты сэзъялтыны кулэ: секыт берпалъёстэс диван вылысь ӝутэ но лэсьтэ ӟеч ужъёс, вераське ог-огеныды, улэп улонэн улэ. «Быдӟым тур» проект адямиосты огазея. Калыкен вераськон мынэсьтым мылкыдме ӝутэ, азьлань вамышъяны кужым сётэ.

карта— Индие кошкон азяд тон шуак воштӥд аслэсьтыд улондэ: ужысьтыд кошкид но астэ «дунне котыръясен» нимад. Кызьы дӥсьтӥд?

— Ужысьтым мон сотэк но кошкысал ни — 3 толэзьзэ уждун ӧз тыре. Милемлы шуизы: потэ ке — ужалэ. Уже кельше ке но вал, отын ӧз дунъялэ ужасез.

Улондэ капчиятыны кулэ, номыр борды кырмиськоно ӧвӧл. Мон тани вань кулэтэм арбериосме куштӥ, бытовой техникаме вузай. Ваньбуре али одӥг котомкаям тэроз. Квартира арендовать карисько. Толэзь ортчыса, доре луоз удмурт нюлэс. Али нокытын уг ужаськы, сиськисько ӧжыт, алигес йӧнатскон вылысь 31 нунал сютэм пуки. Соку ик асме мукет сямен шӧдыны кутски — инбаметӥ лобасько кадь. Асме шудоен лыдъясько — адямиослы умойзэ лэсьтыны тыршисько, мынам вань рюкзаке, ноутбуке. Мон быдэс.

Азьланяз ужало ини коньдон вайись проектъёс бордын. Котькыӵе проект малпа, со уксё борды пыкиське вылэм. Малпанъёс трос. Кылсярысь, инкуазен сётэм материалъёслэсь корка пуктон — эколэсьтӥськон. Удмуртиын сыӵе коркаос трос. Аслым но ӧдъясько сыӵе улон инты пуктыны, электротыл интые, шундылэсь кужымзэ кутыны.

— Кемалась ик ӧвӧл тон берытскид буддизм пала.

— Мон кемалась тунсыкъяськисько вал ни шундыӝужан палась осконъёсын. Но татын висъяны кулэ: тон оскись яке чылкыт, югыт улонэн улӥсь адями. Мон храмъёсы ветлӥсько ке но, оскись ӧвӧл. Мон улӥсько духовной улонэн — инкуазен огкыл шедьтыны вырисько, котькуд нуналэз ӟеч малпанъёсын пумитасько.

2008-тӥ арын мон нырысьсэ вуылӥ Таиландэ. Отын вӧлмемын буддизм. Пайми: отын адямиос, дуннеез гажаса, уло, калык лякыт сямо, котьку юрттыны дась. Россиын сыӵеосты шергес пумиталод.

Азьвыл мон вал «бадӟым» адями — секталае 110 килограмм вал, котькуд ӝыт сур юылӥ, нуналаз пачка тамак кыскылӥ. Но дунне шоры мукет синмын учкыны кутскон понна улонын мар ке учыраны кулэ. Мон люкиськи яратоно адямиеным. Соин сэрен кема аръёс ӵоже куректӥ, улонэ быриз кадь потылӥз. Но али валасько: со учыр улонме чутрак воштӥз. Мон дугдӥ котькытысь адӟыны уродзэ гинэ, усьтӥськи дуннелы. Табере йырам умой малпанъёс гинэ бергало. Али номыр сярысь уг жаляськы.

Мария Векшина

Удмурт Дунне
By Удмурт Дунне 28 апреля, 2016 16:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<