Яратонлы сӥзьыса

Удмурт Дунне
By Удмурт Дунне Март 1, 2016 09:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нырысьсэ

Вуиз 14-тӥ тулыспал — Яратӥсьёслэн нуналзы. Туэ мон яратоно нылашеным ӵош нырысьсэ пусйи та нуналэз.

Мынам нылаше — быдэс дуннеысь тужгес умоез. Со монэ сизьым инъёс сьӧры лобӟытэ. 14-тӥ тулыспалэ тодам вайисько нылашеным нырысьсэ пумиськемме но тодматскемме…
Куарусён. Удмурт кун университет туристической ужрад ортчытэ. Ми ортчиськом пӧртэм шуг-секытъёс пыр. Нылъёс сиён пӧрало. Соос пӧлысь мон адӟи тӧдьы йырсиё, курень синмо муспотон нылашез. Синмаськи. Ачим но адӟисько, со мон шоры лушкемак учкылэ шуыса. Таизлы туж шумпотӥ, нош дораз лыктыны ӧй дӥсьты. Малпай: кин тодэ, оло, солэн кузпалыз но вань ини. Нырысь шедьто сое «Контактысь».
Кӧня ке нунал ортчыса, мон пырисько «Контактэ»… Со ачиз монэ шедьтэм, эшъёсы пӧлы куриське. Кыӵе мон шумпотӥ, вераме но уг луы. Табере востэм луыны уг яра ни, соку ик солы гожтӥ. Ог 3-4 толэзь ми гожъяським вотэсын, вераським телефон пыр. Мон сое келялляй дорозяз. Нош вордӥськем нуналзэ пусъеммы бере ог кык час ветлӥм уй кар кузя. Мар сярысь гинэ ӧм вераське, йыр пороме. Со понна мон улонме сётыны дась!

Сӥзисько тӥледлы но котькуд нунал яратыны, котькуд нуналды мед луоз яркыт но шудо. Нош кинлэн ӧвӧл на яратонэз, одно ик шедьтэ. Соку тӥляд улонды копак воштӥськоз, кызьы воштӥськиз мынамез.

Андрей Клабуков

Берло мар на…

Тодӥськод-а на монэ? Тон куке но монэ яратӥд вал кадь?

Юад вал мынэсьтым: «Тон монэ кӧня ке коть яратӥськод-а?» Ӧй вазьы номыр но… Мон ноку но тыныд яратэмме ӧй вералля, уг тодӥськы вал, яратӥсько шуыса. Мон тыныд номыр но ӧй сёты, нош тынэсьтыд кури. Тодӥськод на-а гужем ӝытъёсты? Кӧня пол ӧдъялляд тон монэ, кияд ӝутыса, тыметэ куштыны? Но мон ӧй кышка. Тодӥсько вал: уд кушты…Толалтэ нош букосэ месӥськод но нош ик ӝутӥськод. Нош мон тонэ уг вормиськы, со понна лымыен ымнырад лэзьялляй. Пи эшъёсыным вераськылыкум, малы дорысьтым кошкылӥд? Нош бӧрысь монэ ӟыгыртыса сылӥд, гуртэ пырыны лэзьытэк, кошкемед бере эшъёсы доры медам поты шуыса. Тодӥськод на-а монэ трактор котыртӥ уйылыкуд ӵемтаськыса усемдэ? Тыныд вӧсь вал, нош мон серекъяй, ӧй оскы зол шуккиськемедлы. Али вӧсь мыным, нош тон серекъяськод.

Дунъяно, дыр, адямиез, куке со тынад вал.

Юли

Дуринчи кар

Митрей нош ик юэмын. Анноклэсь улонзэ тунсыкогес кароз. Туннэ, чебер гужем нуналэ, Митреез со верандае выдтӥз, медаз куаш потты шуыса. Серемен серем, нош ӵуказе вазь султоно. Озьы малпаськыса, Аннок валес вылаз берыкъяське. Султӥз, мынӥз Митрейзэ эскерыны. Уйин кезьыт ук. Озьы ик вань — шобреттэк кӧлэ. Шедьтӥз корказьысьтыз кеен корам кыӵе ке но шубаез, шобыртӥз соин Митрейзэ. Пеляз ж-ж-ж карем куара шуккиськиз. Шуба борды пельзэ понӥз гинэ но, дӥськут улысь одӥг дуринчи лобӟиз, кыкетӥез, куинетӥез… Аннок, арлыдзэ ик вунэтыса, корка пыриз. Шок-пуль шокаса, ӧс куспын сылэ. Шубае дуринчиос кар лэсьтӥллям. Корказьысь дӥськутэз куртконо вал ук. Гужемзэ дуринчиос олокытчы но каръясько. Табере Митреез шиоссылэсь утёно. Но кышкыт ук. Пыдчиньы йылаз потӥз корказе. Дуринчиос лобӟемын ни вал. Митрей но лобӟемын уйвӧтъёсаз, соргетэмез гинэ кылӥське. Юэм адями лексемез шӧдоз-а, мар-а? Ӵукназэ кышномурт скал кыскыны потӥз. Митрей султэмын вал ни. Мынам, пе, туннэ уйин белой горячка кутӥз, дуринчиос котырам лобазы, куртчылӥзы кадь потӥз. Сыӵе кышкыт вал. Юэмысь куштӥськисько. Аннок шуэ:
— Тодӥсько мон тонэ, ӝыт вуиз ке, выльысь кошкод эшъёсыд доры.

— Мынам пелям али но жонгетэ на — уг кошкы нокытчы, — пумитаз вазиз Митрей.

Даша Лекомцева

Карттэк но умой?

Тросэз туала нылкышноос нылпизэс огназы будэто. Мон но пырисько сыӵеос пӧлы.

Туала нылкышноос ужало, нылпи будэто, юртъер пукто, машина нулло. Огласянь, нылкышнолэн потэ эрико луэмез, со дыре ик соослэн быре пиосмуртъёслы осконзы.

Нош быгатоз-а нылкышно улыны огназ, карттэк? Мон малпасько — быгатоз. Тодӥсько одӥг нылкышноез, со будэтэ нылпизэ огназ, котькуд нунал ветлэ яратоно ужаз, тани алигес басьтӥз ини машина. Яке мукет учыр: уло кышноен картэн, картэз юэ, нош нылкышно нылпиоссэс будэтэ, юртъер ӝутэ, ужа. Сыӵе карт — йыр висён гинэ.

Тросэз нылкышноос шуозы: ум быгатӥське улыны пиосмуртлэн яратонэзтэк. Мон малпамъя, нылпи вайыны кулэ. Соку нокыӵе карт кулэ уз луы ни, малы ке шуоно анайлэн яратонэз золгес но кужмогес нылкышно но пиосмурт куспын яратонлэсь.

Такъян

Тон доры туннэ мыно!

Дас одӥг часын уйин
Мон будильник пуктӥсько.
Вазь ӵукна ик вить часын
Иземысь ни султӥсько.

Ӝогак юисько чайме,
Бызисько автобусэ.
Ужасько мон заводын:
Чик мӧзмыт ӧвӧл отын.

Я, тани цехам вуи,
Станокме ини лэзи,
Кӧлэмысь со ӝог сайка,
Гуретыса ик ужа.

Детальёсты ӵаш вӧлэ,
Пӧсь гурысь сямен поттэ.
Лыз но, горд но буёло
Бабля кортъёс пазьгисько.

Синмаськыса учкисько
Турлы кульчоос шоры.
Мастеръёс, кивалтӥсьёс
Солань-талань бызьыло.

Мынам чик ӧвӧл дыры:
Детальёс мон вӧлӥсько,
љытазе уже быриз ке,
Тон доры туннэ мыно!

Никита Иванов

 

Удмурт Дунне
By Удмурт Дунне Март 1, 2016 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<