Визь люк яке визьлюк? Шонер гожъяськон — шугъяськон

Удмурт Дунне
By Удмурт Дунне Март 21, 2016 14:46

«Удмурт дунне» газет кичӧлтэмъя тодосчиос но иворчиос куспын «Кылтӥрлык» вожвылъяськон ортчиз.

«Мынам Удмуртие» ТРК-ысь журналистъёс ивор гожто.

«Мынам Удмуртие» ТРК-ысь журналистъёс ивор гожто.

Шудӥзы Удмурт кылосбуръя, финно-угроведениея но журналистикая институтысь тодосчиос, «Мынам Удмуртие» ТРК-ысь, «Удмурт дунне» газетысь иворчиос, быдэсъязы шонер гожъяськонъя, кылысь кылэ берыктонъя ужъёсты.

— Огласянь, та эшъёс куспын шудон вал, но со эшшо огпол возьматӥз кылмылэсь «пӧськыоссэ» — шудон аспӧртэм котырес ӝӧклы пӧрмиз, шуыны луоз, — вера «Удмурт дунне» газетлэн валтӥсь редакторез Зинаида Рябинина. — Тазьы милям нош но нош вазиськеммы потӥз кивалтӥсьёслы, анай кылмылы саклык висъяны курыса. Кыл луыны кулэ чылкыт, шонер, валамон! Соин ик туннэ омыр кадь кулэ удмурт кылын шонер гожъяськонъя рос-прос кыллюкам.

Котькудӥз удмурт издание гожъяське ас сяменыз, кин ке лыдэ басьтэ вуж правилоосты, кин ке — выльёссэ. Соин сэрен изданиос, кылчиос куспын но трос ченгешонъёс пуромыло. Потэ вал та ласянь кылэммы «Кенеш», «Кизили», «Инвожо», «Вордскем кыл» журналъёслэсь, «Ӟечбур!» газетлэсь кылзэс. Но, жаляса верано, соос ужрадэ пыриськонлэсь аналскизы.

«Удмурт дуннелэн» командаез текстысь янгышъёсты тупатъя.

«Удмурт дуннелэн» командаез текстысь янгышъёсты тупатъя.

— Шонер гожъяськонъя берлоосыз правилоос азьвылъёсызлэсь уродэсьгес. Али со бордын выльысен ужано луоз, — вера кылосбур наукаосъя доктор Валей Кельмакович Кельмаков.

Удмурт кыл берло дыре узырмиз выль кылъёс чотын. Кызьы вера кылосбур наукаосъя кандидат Галина Анатольевна Глухова, кылъёсты берыктыку, нырысь ик солэсь пуштроссэ учкыны кулэ. Кылсярысь, мар малпаса, «прощение» кыл «зоук» шуыса берыктэмын?

Удмурт кылэ ӟуч кылъёсты берыктӥзы шудонэ пыриськисьёс но. Тунсыко дэмланъёс чузъяськизы. Кылсярысь, инстаграм — тусвотэс, гаджет — ӝогӝет.

Удмурт кун университетысь тодосчиос выль кылъёс малпало.

Удмурт кун университетысь тодосчиос выль кылъёс малпало.

Кыкетӥ люкетаз иворчиос но тодосчиос ужазы удмурт кылэ официальной пресс-релизэз берыктон бордын. Таиз но капчиен ӧз сётӥськы. Уж вискын ӟырдыт вераськон пуромиз шонер гожъяськон сярысь. Шонер-а со кылпумъёсты куяса гожъяськон — «конференци радъяны», «Росси конкурслы». Пельлы кельшымонгес кылӥське: «конференция радъяны», «Россиысь конкурслы». Со сярысь вераз жюрие пыриськем кылосбур тодосъя кандидат Вера Григорьевна Пантелеева но.

Но тани вожвылъяськон йылпумъяськиз. Кылосбур тодосъя кандидат Людмила Евгеньевна Кириллова ивортӥз, вань командаос огкадь баллъёс люказы шуыса. Но командаос понна валтӥсез вал мукетыз: выль синмын учконо гожъяськон шоры.

кылтирлык

Жюри эскере ужъёсты.

* * *

Гажано лыдӟисьёсмы, ми дэмласьком тӥледлы но иворчиосын ӵош малпаськыны, кызьы удмурт сямен верано ӟуч кылъёсты: потребитель, инстаграм, инаугурация, флешмоб, гаджет, актуальный, паралимпиец, министерство. Нош тододы меда выль но вунэм удмурт кылъёсты? Кыккылолык, ожкыйкай, анткыл, кӧчыр, шукырег, кертомась, гожпусэт, вискетъёс, ванёс, озын.

Малпанъёстэс вераны быгатӥськоды 8 (3412) 73-33-42 телефонъя яке ыстыны udmdunne@yandex.ru электрон  адресъя. Луэ келяны гожтэтэн: Ижкар, Карл Маркс ульча, 274-тӥ юрт, «Удмурт дунне» газетлэн редакциез.

Мария Векшина

Туспуктӥз А. Горбунов

 

Удмурт Дунне
By Удмурт Дунне Март 21, 2016 14:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<