Уж трос — уждун ичи. Валэктэ Ужъя кун инспекциен кивалтӥсь Светлана Шекунова

Удмурт Дунне
By Удмурт Дунне 21 марта, 2016 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Огкыл ӧз юнматэ

Выль уже интыяськи. Ужаны нуналлы быдэ потаны косӥзы ни, но нокыӵе огкылъёс-мар монэн ӧз юнматэ на. Кышканэ кылдӥз: документъёстэк ужатозы но уждун уз сётэ.

Васильев П., Дэри черкогурт

 Валэктэ Ужъя кун инспекциен кивалтӥсь Светлана Шекунова.

— Ужъя кодекслэн 67-тӥ статьяезъя уж ӵектӥсь но уже интыяськись куспын огкыл юнматэмын луыны кулэ ужаны потэмлэсь азьло яке нырысетӥ нуналаз. Кивалтӥсьты тӥледыз ужаны потыны косӥз но нокыӵе документъёс ӧз дася ке — Ужъя кодекслэсь куронъёссэ тӥя. Законъя огкыл юнматыны тужгес троссэ 3 нунал сётэмын — адями ужаны потэм нуналысен. Малы тӥледын нокыӵе документъёс уг юнмато — та юанэн вазиське уж ӵектӥсьтылы. Правоостэс тӥяло ке, ивортэ Ужъя кун инспекцие, эн кепыралэ огазеяськондылэсь но кивалтӥсьтылэсь нимзэ шараяны. Котькуд таӵе учырез санэ басьтӥськом, кулэ луэ ке, эскерон но радъяськом.

Уж ӵектӥсь тӥледын 2 экземплярен огкыл гожтыны кулэ, юнматӥське со кинюртэмъёсын. Одӥг экземплярез тӥ кие сётӥське, мукетыз кыле огазеяськонэ. Та огкыл вылэ пыкъяськыса, уж сётӥсь тӥледыз уже кутэмез сярысь приказ гожтыны кулэ. Соин тӥледыз одно ик тодматыны кулэ (кинюртэмдэс пуктыса) — ужаны потэм дырысеныды 3 нунал ортчытозь. Та приказэз кутэм нуналысен 1 арня ӵоже ужъя книжкаяды гожтэмын луыны кулэ ужаны интыяськемды.

Мылкыдъёс уг тупало

Расчёткаме басьтӥ но пайми: быдэсъяно удысэ сыӵе ик, нош окладэ пичиятэмын. Быгатэ шат кивалтӥсь уждунэз ас мылкыдызъя кулэстыны?

Тамара Е., Вавож черкогурт

— Ужъя кодекслэн 57-тӥ статьяяз пусъемын: окладлэн быдӟалаез, со борды ватсаса тыронъёс, ӟеч ужам понна тыронъёс сярысь одно ик гожтэмын луыны кулэ адямиез уже кутэм сярысь огкылын. Сое воштыны луэ, уж ӵектӥсь но, ужась но соглаш луэмзэс верало ке. Таиз юнматэмын луыны кулэ нимаз соглашениен (Ужъя кодекслэн 72-тӥ статьяез).

Уждунлэсь, окладлэсь быдӟалазэ воштыны луэ законын пусъем учыръёсы гинэ. Кылсярысь, адямилэн ужан условиосыз, быдэсъяно ужъёсыз воштӥськизы ке. Шуом, производство капчияз, ужан радлык воштӥськиз. Соку кивалтӥсь воштыны быгатоз ужасен юнматэм огкыллэсь условиоссэ. Но воштӥськонъёс сярысь ивортыны кулэ тужгес ӧжытсэ 2 толэзьлэсь азьвыл. Та уведомлениын пусъемын луыны кулэ, кыӵе муген но кӧнялы воштӥськоз уж но уждун. Адями таин соглаш ке, ужъя огкыл борды ватсаса документ юнматӥське, отын пусйиське адямилэн воштӥськем уждунэз. Та пумысен приказ но кутэмын луыны кулэ.

Нош адями воштонъёсын соглаш уг луы ке, уж ӵектӥсь солы дэмланы кулэ огазеяськонысьтыз ик мукет вакансиез. Ӵектыны быгатэ мукет предприятиын но инты, таиз лэземын ке огазеяськонын юнматэм огкылэн (коллективной договорен). Инты ӧвӧл ке яке адями пумит луэ ке выль уж борды кутскыны, соин юнматэм огкыл уретэмен лыдъяське (Ужъя кодексысь 77-тӥ статья). Та учырын солы тыриське выходной пособие.

Быдэсъяно ужъёсты тӥляд воштӥськиллямтэ, нош уждунды кулэсмем. Со сяна, кивалтӥсьты тӥледлы номыре валэктымтэ, нокыӵе уведомление сётымтэ. Озьыен, со законлэсь куронъёссэ быдэстымтэ, тӥлесьтыд правоостэс тӥям.

Ужъя правоостэс утён ласянь юанъёсты кылдӥзы ке, вазиськыны быгатӥськоды Удмурт Республикаысь Ужъя кун инспекцие. Со интыяськемын Ижысь Шор площадь котырын, Бородин урамын, 21 номеро юртын. Юандэс кутозы инспекцилэн телефонэз пыр но: 8 (3412) 63-63-08.

 

Удмурт Дунне
By Удмурт Дунне 21 марта, 2016 15:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<