Ӝуам оскон. Малы чалмизы нырысетӥ ӧтчаме пыриськемъёс?

Удмурт Дунне
By Удмурт Дунне Март 1, 2016 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
0103950,старики,деревня Синяр Бодья

Кизнер ёросысь Синяр-Бӧдья гуртысь 85 аресъем Мария Чернышовалэсь ивор вуиз.

Нырысетӥ удмурт съезд ортчем дырысен (1918-тӥ ар) ӝоген 100 ар тырмоз. Кин пыриськиз солэн ужаз?  78 мурт пӧлысь асьмеос ум тодмаське ӝынызэ но! Тодомы на меда…

Дышетскон

Удмуртъёслэн 1918-тӥ арын ортчем нырысетӥ ӧтчамысьтызы туспуктэмез газетамы кӧня ке пол сётъямы. Кин ке ӵыжы-выжызэ тодмалоз на шуыса, осконмы туж пичи вал. Но Кизнер ёросысь Синяр-Бӧдья гуртысь 85 аресъем Мария Чернышовалэсь ивор вуиз. Удмуртъёслэн нырысетӥ съездазы пыриськемъёс пӧлын, пе, песятае — Николай Оконников. Ми потӥмы сюрес вылэ.

Мария Лаврентьевна огназ улэ. Нылпиосыз, нунокъёсыз кемалась асьсэ понназы ни. Милемыз со возьмам. ӝӧк вылаз, вӧсяськон книгаос вӧзын, кыллё «Удмурт дунне» газетысь вандыса лач-лач интыям туспуктэмъёс. Кыказ но одӥг суред — удмуртъёслэн нырысетӥ съездысьтызы делегатъёс. Одӥгез газет потэмын 2005-тӥ арын, мукетыз 2015-тӥын. Паймисько:

— 10 ар талэсь азьло потэм газетэз но возиськоды шат?

— Кызьы сотэк, песятаелэн «Удмурт дуннеын» печатлам туспуктэмез сяна нокыӵеез но ӧвӧл ни ук. Ма, одӥгез вань на — но отын со коросын, ватыкумы пуктэмын ни. Ярам ай, та съездысь фотоез поттӥды, внукъёсылы коть табере адӟытыны быгатӥсько…

— Кудӥз бен песятайды?

— Ма, тани ук, — Чернышова дыртӥд возьматэ туспуктэмлэн бур палаз тӧдьы дӥсен, йыраз фуражкаен  пукись пияш шоры. — Тани мынам песятае Оконников Николай Никонович. Солы соку 34 арес вал. Нош азяз пуке Кибъяысь батюшколэн пиез Семёнов. Нимзэ уг тодӥськы ни, но солэн одӥг гинэ пиез вылэм. Песятаеным ӵош Малмыжын дышетскем. Вотякъёслэн съездазы пыриськиз ке но, ачиз ӟуч.тодмаз

— Нош песятайдэс кызьы тодмады? Съезд ортчыку, тӥ вордӥськемын ӧй вал на ук…

— Милям пырак таӵе фотомы вал. Мон сое дото утялтыса вози. Песятайлэсь со нырысетӥ съезд сярысь верамъёссэ но чиста тодӥсько. Песятае туж визьмо будэм. Но атаез пизэ дышетыны пумит луэм, крестьянлы музъем ужен выроно, шуэм. Песятаез, мынам прапрадедуше ни, чурыт кылзэ верам: «Дышетскем муртъёслы гинэ азьпал улон умой луоз!» Пиезлэсь пизэ Малмыже дышетскыны нуэм, уромез доры пыртыса кельтэм. Озьы Николай Никонович 7 арескысен дорезлэсь палэнын дышетскем.

Классазы ик тодон-валан люкам отец Сергийлэн Елена нылыз. Таизлы, пе, дышетскон секытэнгес сётӥськем, ӵем гинэ кӧжы вылын сылыто вылэм. Черкын ужам сяна, отец Сергий пиналъёслы но урокъёс нуэм. Соку синйылтэм Николай песятаелэсь визьзэ, бордаз басьтэм. Озьы ньыль ар ӵоже песятае улэм батюшко дорын, Елена нылыныз ӵош одӥг парта сьӧрын пукем. Николай Никонович дышетсконзэ «на отлично» йылпумъяз. Солы зарниям букваосын гожтэм бадӟым похвальной лист сётӥзы. Мон пичи дыръям со бумагаоссэ адӟыса вуттӥ на. Елена луиз дышетӥсь, Николай Никонович эшшо вылӥегес тубысал, дыр, атаез бордысьтыз лэзьыны пумит луиз, нош песятайзы лябӟемын ни вал, тани-тани кулоз. Азьвыл музъем сётӥське вал семьяысь пиосмуртъёслэн лыдзыя. Песятае — семьяяз нылпиос пӧлысь одӥг пи. Казаньысь семинарие дышетскыны кошкысал ке, бадӟым семья одӥг пай вылэ гинэ кыльысал. Тӥни озьы Николай Никонович гуртэ кылёно луиз…

Кулаке поттон

— Нош вань удмуртъёслэн нырысетӥ ӧтчамазы кызьы шедиз?

— Малмыжын ӵош дышетскем эшез, Кибъя черкысь Семёнов батюшколэн пиез, ӧтиз, дыр. Со батюшко туж визьмо маке вал, Кибъялан черк пуктӥз, отын ик шур дурын богодельной юрт, тямыс аръем школа, аптека. Ваньмыз пулэсь, туж чебер.

Съездын песятаелы чебер пу доска но со вылын гожъяськон грифель сётӥллям, удмуртъёсты грамоталы дышетыны куриллям. Озьы Оконников гурт калыкез дышетыны кутскем.

Пуллэн огпалаз, пе, букваос гожъя вал, мукет палаз — лыдпусъёс, задачаос.

— Песятайдылэн съездэ ветлэмез сярысь кыӵе ке бумагаосыз кылизы-а?

— Ваньмыз сутыса быдтэмын. Куать арес дыръям семьямес кулаке поттӥзы.  Ваньбурмес талан понна капкаетӥ адямиос пыро. Со вискын песятае поттӥз пичи пуйыын возиськись документъёсты — Малмыж школаез йылпумъямез сярысь свидетельство, пӧртэм бумагаос, 1918-тӥ арын ортчем съездысь туспуктэм, эшшо кыӵе ке бумагаос. Песятай ваньзэ тылэ куяз. Малы озьы кариськод шуэмысь вазиз: «Тань таосын, нылы, Сибирь сюресэз лёгано луоды. Мон огнам чидало лёганы, дэмен кошконо медам луэ…»

Тӥни озьы тылын быризы Николай Оконниковлэн бадӟым осконъёсыз. Та дырысен со пиналъёссэ но, нунокъёссэ но визьмаз: кылды кенерез сьӧры медаз пота, со-та вераськыса эн ветлэ.

Оконниковъёслэсь ваньбурзэс поттакузы, Николай Никонович семьяезлы шуэм: одӥгды но кыре эн поталэ, дорын пуке, ваньзэ мед басьтозы, мар мылзы потэ, мед карозы… Лекомем адямиос кеносъёсты, коргидъёсты, коркалэсь оглюкетсэ тарказы, син азязы йӧтэмзэ ваньзэ поттазы, ю тысез одӥгтэм ӵужыса нуизы, кык валзэс, куинь скалзэс, ыжъёссэс поттазы, азбарысь, бакчаысь музъемез ломъёсын, саникъёсын бышкаса ортчизы, кытын ке маке узырлык ватэмын ӧвӧл-а…

— Раскулачить карыны лыктэмъёс пӧлын огшоры гурт калык но вал. Мар ми соослы карим? Песятай букваез валаны дышетӥз, нош соос… — ортчемзэ  тодэ вайыса, Мария Лаврентьевна синкылизэ возьыны уг быгаты. — Одӥгзэ пичи ыжпиез — сьӧдэн тӧдьы макеез — туж зол яратӥ, сое нимаз сюдыса, утялтыса вози. Учкисько но: ыжпиосты, тыбыртӥзы кырмыса ик, поттало, бадӟым коробе тыро. Вань ваньбурез ульчае поттамзы бере капка азямы потӥмы ни, мамаме, саестӥз кыскаса, курисько: ыжпиме мед кельтозы! Соку одӥгез кышномурт шорам туж лек кеськиз: «Ум, ум сётэ! Ужды ӧвӧл ни со бордын!» Ӧз сёты… Кӧня ке дыр ортчыса, со кышномуртлэн мунчоез ӝуаз. Дорамы мисьтӥськыны лыктӥз. Со бӧрсьы мынам мунчоямы ветлэме ик уг поты ни вал. 80 ар пала ортчиз, ыж но, скал но вордӥ, колхозын кӧня пудо утялтӥ, но со пичи ыжпие ялан тодам…

Оскон

Оконниковъёслэсь вань котырзэс нуыса кошко, одӥг кырым но пызь уг кельто. Песятайзы Николай Никонович ӵуказеяз ик Малмыже кошке. Отысь быдэс мешок тӧдьы нянь вае. Озьы семья огдырлы сютэм быронлэсь утиське. Николай Никонович ик Малмыжысь вае нюлэс погыръяны лэзись бумага. Со дырысен быдэс семья пичи пиналъёсын ӵош нюлэскы ветлыны кутске. Дасям пузэс, пе, Малмыже нуо вал. Николай Никонович юн верам: «Нокытын номыр вераськыса эн ветлэ, номыртэк кельтэмзы пумысен эн жалялэ, киосмы вань, корка но, мукетсэ но выльысь лэсьтом, тазалыкмы гинэ мед луоз, ярам, Сибирь сюресэз лёгано ӧз луы…»

Нялтас вераса, Оконниковъёслэсь одӥг ватоссэс таки ӧз шедьтэ. Кладовойлэн сэрегаз, пе, выж улын ватэмын вал Николай Никоновичлы Малмыжын ӟеч дышетскемез понна кузьмам книгаос — 19-тӥ даурлэн пумаз, 20-тӥ даурлэн кутсконаз поттэм Библия, Евангелие, осконэн герӟаськем мукет книгаос. Соос нимысьтыз пуйые понэмын, кызьпу туен тач-тач бинялтэмын вал. Кышкыт вакытъёслэсь вуэмзэс шӧдыса, Николай Никонович оскон книгаоссэ 1935-тӥ арын ватэм. Книгаос 12 ар ӵоже ватосын кыллизы, соосты поттыны дӥсьтӥсь ӧй вал…

Мария Лаврентьевналэн песятаез вера вылэм: удмуртъёслэн нырысетӥ ӧтчамазы пыриськемъёс тросэз Инмарлы оскисьёс вал, сотэк, пе, отчы ӧй шедьысалмы. Ӵапак осконэнымы сэрен ик, пе, милемыз раскулачить но каризы.

Зэм но, вашкала туспуктэмын священникъёс, гурт калык, интеллигенция. Соос зэмзэ но калыкез ӝутыны,  улонэз ӟечгес карыны малпало вал. Но бӧрысь уноез репрессиос улэ шедизы, кин ке ыбемын вал, кин ке Сибире келямын, кин ке чиптэм-чаптэм ышиз…

Николай Оконников 79 арескозь улӥз. 14 пиналыз пӧлысь улыны кылдӥз кыкезлы гинэ. Бадӟымез пиез ӵапак Мария Лаврентьевналэн атаез вал.

— Песятайлэсь ноку вож-потэмзэ адӟеме ӧвӧл, — шуэ Чернышова, — тодмоос али но шуо: дедушедлэн ымаз чиньыдэ донгид ке, куртчысал-а меда? Мон но, агай-выны но школаын «витьёслы» гинэ дышетским, песятаймы выжые мынӥмы вал, дыр. Но 13 арескам, анае туж секыт висемен, дышетсконме куштоно луи. Раскулачить каронэ пыриськемъёслэсь выжыоссэс, нылпиоссэс умой тодӥсько, шоразы учкыса, али но сюлэм бугыръяське. Но тодӥсько: песятай шуысал, ортчемзэ эн бугыръя ни, улон сыӵе вал…

* * *

Газетэз печате сётон азьын редакцие пыриз тодосчи А. Разин. Нырысетӥ съездысь туспуктэмез ад-ӟыса, шумпотӥз:

— Татын мынам но выжыосы вань, куинь агай-вынъёс — Разинъёс. Тани таиз мынам атаелэн агаез — Васягай (тодосчи возьматӥз ӵапак Чернышовалэн песятаезлэн тусбуез шоры!).Тӥни сыџе њудонэ вуиськиз.

Озьыен, гожтэммы таин гинэ уз йылпумъяськы. Вуоно «Гердын» кыл сётомы А. Разинлы.

Елена Миннигараева

Туспуктӥз А. Горбунов

 

Удмурт Дунне
By Удмурт Дунне Март 1, 2016 17:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<