«Шундыберган» шудон, Варялы уксё бичан но автомоделированиен вырон

Удмурт Дунне
By Удмурт Дунне Март 21, 2016 13:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сьӧлта

Шудэм понна — туп

Арлы быдэ ёросысь кивалтӥсьёс волейболэн шудыны быгатэмзэс эскеро.

Таиз ӵошатскон 7-тӥзэ радъяськиз ни. Спортзалэ 5 команда люкаськиз: школаослэн директоръёссы, озьы ик муниципал кылдытэтъёслэн, предприятиослэн, югдурез утисьёслэн, эштосъёслэн кивалтӥсьёссы. Ӵошатскон мынӥз ас пал адямизылэн, Кун Думаысь депутатлэн Николай Мусалимовлэн кузьымъёсыз понна. Пӧсь вожвылъяськонын кужмо луиз предприятиослэн кивалтӥсьёссылэн но ужбергатӥсьёслэн командазы. 2-тӥ инты басьтӥзы эштос тӧроос, 3-тӥ интыез утӥзы школа директоръёс. Николай Мусалимов вожвылъяськисьёслы ӟеч шудэмзы понна тау  кариз но ёрослы футболэн шудыны тупъёс кузьмаз.

Юкаменск

Маймылэз данъязы

Ёросысь нылпи библиотека арлэн пусэзлы сӥзем нылпи киужъёсъя вожвылъяськон ортчытъя.

Азьвыл аръёсын ӵошатыса, туэ котькулэсь трос, 97 пиналъёс, пыриськизы. Конкурсэ 105 уж вуттэмын. Арлэсь кузёзэ — Маймылэз — кин ке суред вылэ пуктэм, нош кин ке небыт шудон лэсьтэм. Нырысетӥ инты басьтӥзы «Берёзка» нылпи садэ ветлӥсьёс но Юкаменск шор ёзо школаын дышетскисьёс. Конкурсэ ваем ужъёс адӟытонэ поттэмын, соин тодматско вань мылкыд карисьёс.

Глазов

Ӵошатскизы салазкиос

Глазовын ӵошатскизы автомоделированиен вырись нылпиос.

Глазове люкаськылӥзы Ижысь, Воткаысь, Якшур-Бӧдьяысь, Алнашысь, Москваысь но Тюменьысь 40 пала егит конструкторъёс. Татчы соос вайизы асьсэ киосынызы бичам моторен салазкиоссэс. Соослэсь нискыламзэс эскеризы городысь хоккеен шудонъя одӥгаз площадкаын. Пичи машиналэсь ӝоглыксэ но нискылтыны быгатэмзэ сяна, учкизы вылтуссэ но. Ӵошатсконъёсын кужмоосыз луизы куноос. Покчиос пӧлын устогес вал москваос, 2-тӥ но 3-тӥ интые потӥзы глазовъёс но якшур-бӧдьяос. Вӧжоосыз пӧлын вормизы тюменьёс, 2-тӥ но 3-тӥ интыын — Ижысь но Глазовысь конструкторъёс.

Дэри

Бергаз «Шундыберган»

11-тӥ ползэ ёросын ортчиз пиналъёс понна «Шундыберган» шудон.

Таяз учыре ужрадэ Дэри ёросысь 9 школаосысь командаос пыриськизы. Ужрадлэн нырысетӥ люкетаз пиналъёс 6 станциосъя ветлӥзы: асьсэ гожтэм кылбурзэс лыдӟизы, вакчи дыр куспын видеоклип кылдытӥзы, фин-угор калыкъёслэн шудонъёсынызы тодматскизы, суйпоскес но пель угы лэсьтӥзы, проект гожтыны дышетскизы. Вормисьёсты дунъязы котькуд  станциын. Ужрадлэн кыкетӥ люкетаз командаос ваче вожвылъяськизы, юанъёслы шонер валэктонъёс сётъяса. Нылпиослэсь визьзэс сыназы Кинолэн ареныз, Дэри ёрослэн историеныз, Быдӟым Вормонэн, «Удмурт Кенеш» огазеяськонлэн Дэри ёросысь ёзэзлэн уженыз герӟаськем юанъёсын.

Пичи Пурга

Гожняосты шулдыртӥзы сальяос

Гожня гуртын, толэз келяса, Вӧйдыр шулдыръяськон ортчиз.

Гожняос куное ӧтчазы Кияса ёросысь Вуж Салья гуртысь  «Тайвади» но «Бӧляк» коллективъёсты. Люкаськем калыкез паймытӥзы ке паймытӥзы кияса палась вуэм куноос! Турлы пумо дӥсьёссэс вошъяса, жин-жин кырӟазы, тыпыр-тапыр эктӥзы, задор мылкыдын шудӥзы, эсьмаса, гожняос, ымзэс усьтыса ик шоразы учкыса, сылӥзы. Гуртоослы куноос тэк улыны маза ӧз сётэ —  арган шудэм улсын   сьӧразы эктыны поттӥзы. Шулдыръяськемзы бере ваньзы пӧсь ӝук но мильым сиизы, спорт ӵошатсконъёсы пыриськизы. Гурт муниципал кылдытэтэн кивалтӥсь Пётр Коровин вормисьёслы синпель кузьымъёс но таукаронъёс сётъяз.

Кияса

Киуж эшъяськытэ

Уддяди шор ёзо школаын та нуналъёсы музей-комната усьтӥськиз. Кивалтэ соин удмурт но ӟуч кыллы дышетӥсь Светлана Мазитова.

Музей узыр гурт калыклэсь бичам экспонатъёсын. Тужгес но паймымонъёсыз — быдэс Россилы тодмо куиськисьлэн Зоя Мазитовалэн киужъёсыз. Солы луыса ик нырысетӥез адӟытон радъяськиз. Кибашлы нылкышнолы туэ 95 арес тырмысал. Уддядиос та бадӟым ужрадазы куное ӧтчазы Ижысь 56 номеро гимназиысь дышетӥсьёсты но бадӟым классъёсын дышетскись нылпиосты, гуртысьтызы арлыдоосты, нылпи садэ ветлӥсьёсты но  «Инвожо» калык ансамбльзэс. Музее лыктэмъёс котырес ӝӧк сьӧрын ог-огенызы тодматскизы, нылпиос дышетскон но шутэтскон амалъёссы сярысь мадизы.

Можга

Шуныт писпу

Можга ёросысь Пычас гуртысь инвалид нылпиос «Улон писпу» панно лэсьтонъя мастер-классэ пыриськизы.

Пычасысь культурая юртын «Надежда» клуб 12 ар пала бурд улаз люка ини шуге-леке вуэм нылпиосты. Клубе мыло-кыдо ветло на трос нылпиё но ёрмыса улӥсь семьяосысь 5-7 аресъем пиналъёс. Тэшкылиосын кема аръёс ӵоже ужа ини Алевтина Рудина. Со визь погъёслы тодон-валанзэс будэтыны, куспазы огкыл шедьтыны юрттэ. Кылем арняе нылпиос пумиськизы Можга ёросысь кибашлыослэн центрысьтызы усточиосын. Соосын валче яркыт басмаослэсь писпу пӧрмытӥзы.

Вавож

 Варялы юртто дэмен

Ёрос газетын ужасьёс быдэн 1 сюрс манет сётӥзы Варя нылашез кышкыт висёнлэсь эмъянлы.

Ижысь Варялэсь пыктос висёнзэ 31-тӥ декабре шараязы. Вавожъёслы со сярысь ивортӥз Какмож черкогуртын улӥсь песятаез. Пусйыны кулэ, вазенгес та коллектив коньдонэн юрттӥз ни вал Вавожысь 4-тӥ классын дышетскись Данииллы. Дэмен бичам коньдонзы пияшлы луонлык сётӥз Москваын операция лэсьтыны. Арлэсь кема Москваысь больницаын улэмез бере Даниил дор палъёсаз бертӥз. Со сяна, та коллектив ёросысь ёрмись семьяослы сиён-юонэн но дӥськутэн юрттэ. Кык берло арзэ газетчиос Выль ар азьын кузьымъёсын вуылӥзы Волипельга черкогуртысь семьяос доры.

Дасяз Валентина Емельянова

Удмурт Дунне
By Удмурт Дунне Март 21, 2016 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<