Шудонэн черлан

Удмурт Дунне
By Удмурт Дунне Март 21, 2016 08:47
0102906,деньги,мелочь,купюра

Шудонэ выён кутске автоматэ 10 манетэз куштон бордысен.

Кун Кенешысь котрес ӝӧк сьӧры люкаськылӥзы депутатъёс, югдурез утисьёс, юристъёс, психологъёс. Вераськон мынӥз шудон терминалъёслэн кышкытлыксы сярысь.

Мукет палаз

Ижысь Дзержинский урамысь одӥгаз вуз карон интыын кемалась сылэ шудон терминал. Ужысь бертыкум, нуналлы быдэ та лавкае нянь басьтыны пырисько. Котьку син шорам йӧтэ: сэргын сылӥсь терминал дорын адямиез уг бырылы. Шудӥсьёс пӧлын вань нылкышноос но, воргоронъёс но. Сюлэмшуген шоразы учкылӥсько: таос, кисызы бушатозь, татын сыло, дыр, ук.

Но палэнысен учконлэн пайдаез ӧвӧл. Ижысь мыло-кыдо адямиос шудон автоматъёсын, терминалъёсын нюръяськонъя «Другая сторона» общественной движение кылдытӥзы. Кивалтэ соин егит воргорон Владимир Панин. Котыраз 55 мурт люкаськем. Соос потало рейдъёсы, чаклало, кытын терминалъёс сыло, кинъёсгес отын шудо. Оскыто: терминалъёс гинэ ӧвӧл, шудон автоматъёс но элькунамы быремын ӧвӧл. Ижын таӵе клубъёс ватскысагес ужаны туртто ке, Воткаын, кылсярысь, шудыны ӧтись яркыт ялонъёсты но синйылтыны луэ.

«Другая сторона» общественной движение пыриськисьёс сюлмаськонъёссэс вуттӥзы Кун Кенеше.

3 нунал куспын — 800 сюрс манет

Кинъёс ӵемгес сыло шудон автоматъёс, терминалъёс дорын? Та юанлы валэктӥз Удмурт кун университетысь психологияя службаысь специалист Дарья Корякина:

— Таӵеос пӧлын тросгес мӧйыос. Угось кӧня ке коньдонзы вань. Соос тодо, мар со ёрмон. Данакезлэн ӧжыт ӧвӧл пӧртэм тыриськонъёссы. Тросэз ужало заводын, малы ке шуоно терминалъёсты ӵемгес пуктыло бадӟым предприятиос котыре. Шудӥсьёс пӧлы шедё на нимаз ужбергатӥсьёс дорын тыршисьёс — таосызлэн ужазы ӵемгес луыло керӟегъяськонъёс.

Шудонлэсь висёнэ выжемзэ валаса вуттоно ӧвӧл, таин со кышкыт луэ. Нош адями черла ни ке, со керӟег луэ, семьяез вунэ, капчиен коньдон поттонлы оскыны ӧдъя.

Одӥг гинэ учыр. Егит воргорон анай-атаез улонысь кошкем бере вордскем юртсэ 800 сюрс манетэн вузаз. Та коньдонэз 3 нунал куспын быдтӥз казиноын.

Дарья Корякина верамъя, таӵеосты йӧнатыны туж секыт. Асьсэос шудонэн черламъёс, юрттэт курыса, специалистъёс дӥне туж шер вазисько. Угось асьсэды висисен уг лыдъяло. Нош адямилэн бурмыны мылкыдыз ӧвӧл ке, солы нокин юрттыны уг быгаты. Автоматъёсын шудон чик пӧртэм уг луы курытсэ юэмлэсь, наркоманиен черламлэсь.

Коньдон кошке Африкае

Югдурез утисьёслэн чотамзыя, 2009-тӥ арозь элькунамы 140 пала казиноос, автоматъёсын клубъёс ужазы. Собере соослы пумит закон кутэмын вал.

— Зэм, соослэн кузёоссылы соку ог 3-5 сюрс манет тыриськонъёс гинэ чакламын вал, — шуиз МВД-ысь экономикаен герӟаськем йыружъёсъя управлениен кивалтӥсьлэн воштӥсез Сергей Бесогонов. — Валамон, та соосты ӧз кышкаты, угось нуналаз 1 но ӝыны миллион манетозь барыш поттыны быгатылӥзы.

Но 2014-тӥ арын декабрь толэзе ни та законэ воштонъёс пыртэмын вал: шудон автомат возисьёсты табере уголовной кыл кутон улэ кыскыны луэ. Озьы кылем арын таӵеос вылэ 11 уголовной уж ӝутэмын ни. Казино, автоматъёсын клуб усьтыны дӥсьтӥсьёс соку ик кулэсмизы.

Нош шудон терминалъёсын югдур мукетгес. Таосты пытсан понна нырысь ик судэз оскытыны быгатоно на, со шудон автомат луэ шуыса. Та туж секыт. Соин ик терминалъёсты туннэ ӵемысь адӟыны луэ.

— Соослэсь кузёоссэс но шедьтыны капчи ӧвӧл, — пусйиз Сергей Бесогонов. — Угось тросэз артэ улосъёсын гинэ ӧвӧл, кунгож сьӧрын уло. Пытьыоссы вутто Африкае но. Озьыен, терминалъёсысь коньдон гылӟе палэнэ.

Бен, полиция шудон терминалъёсын чылкак уг нюръяськы шуыны уг луы. Берло аръёсы гинэ элькунысьтымы 5 но ӝыны сюрс сыӵе тӥрлык утялтэмын. Кылем арын — 260-эз. Но мукет но сюлмаськон вань на: утялтэм терминалъёсты возьыны интыос ӧвӧл — МВД-лэн складъёсыз тырмемын. Быдтыны та кортъёсты быгатэ Росимущество гинэ. Нош солэн араз 700-зэ-800-зэ гинэ пресс улэ келяны луонлыкъёсыз вань. Угось троссэ быдтонлы коньдон но тросгес кулэ.

Котрес ӝӧк сьӧры люкаськемъёс огкылэ вуизы: та ужпумез кылымтэ-адӟымтэ улсы кариськоно ӧвӧл. Кун Кенешысь Национальной политикая, кышкытлыклэсь утиськонъя, Регламентъя но Кун Кенешлэсь ужзэ радъянъя ялан ужась комиссилэн кивалтӥсез Энвиль Касимов пусйиз: шудон терминалъёсын нюръяськон понна нимысьтыз законъёс кулэ луизы ке — соосты кутоно.

Элина Кумачёва

Туспуктӥз А. Горбунов

 

 

Удмурт Дунне
By Удмурт Дунне Март 21, 2016 08:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<