Шаркан ёросысь Шушок гурт: Гын сапег лэсьтӥсьёслэн сэрегзы

Удмурт Дунне
By Удмурт Дунне 17 марта, 2016 15:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мӧзмыны уг сёты уж

Шаркан ёросысь Шушок (Сушково) гурт райцентрлэсь 4-5 иськеме интыяськемын. Со Дэбесэ мынон сюрес вылын сылэ, Шаркан муниципал кылдытэтэ пыре. Гурт туж чебер интые пуксемын — котырак сик будэ.

 Корка тырмоз нылпи куараен

Гуртын одӥг гинэ ульчазы, со Родниковой нимаське. Огаз, кыказ ӟезьы азе вамыштӥсько, усьтӥсез ӧвӧл. Малпай, нуназе вакыт адямиос доразы уг пуко, дыр. Солань-талань ветлонъям бадӟым сюрес вылысь ульчае нылкышно кожиз. Нимтулзэ Виктория Галичева шуиз. Егит дырысеным, пе, та гуртын 30 ар пала улӥсько ини. Нош ныл йырыз Шаркан ёросысь ик Кечгуртысь вылэм. Колхоз вань дыръя скал кыскись луыса ужам,  берло аръёссэ ужбергатон удысэ выжем.

— Мон татын вордскемын ӧвӧл бере, гурт сярысь трос вераны уг быгаты, — шуэ нылкышно. — Тӥни со бадӟым корка пыре ай, Капитолина Фёдоровна Меньшикова ваньзэ лад-лад гинэ вералоз. Со кемалась улэ ини татын, декабрь толэзе 79 арессэ пусйиз.

Дина но Сергей Тронин кузпалъёс.

Дина но Сергей Тронин кузпалъёс.

Улыно-вылыно корка азьын 4-5 аресъем пияш сылэ. Песянаед яке анай-атаед дорад-а шуыса юамелы ак но, бак но ӧз вазьы. Корка пырыса гинэ, кыло-ымо луиз ини. Со ӟуч сямен вераське вылэм.

Капитолина Фёдоровна кыкетӥ этажысь пичи сэрегын, ыж гон лӧдыса, пуке вылэм. Дораз мурт пыремлы воксё паймиз.

К. Меньшикова ыж гон лӧдэ.

К. Меньшикова ыж гон лӧдэ.

— Курадӟыса улэм адямиос ми, — лыктэмелэсь мугзэ тодыса, улэм-вылэмзэ вераны кутскиз нылкышно. — Гурт сярысь гинэ ӧвӧл, милям улэммы пумысен но лачак гожъяно вал. Пичиысен бубытэк кылимы. Вань секытэз мамамы но ми вылэ, 5 пиналъёсыз вылэ, кылиз. Пичиысен кӧня ужез ужаськиз, гужемзэ луд вылысь ӧм ик пыраллялэ. Узы-боры, пушнер но мукет турын-куаръёс ӧй ке луысалзы, ӧйтӧд, кызьы будысалмы. 10 нунал ужаса, 1 кило пызь басьтӥськомы вал. Кинлы гинэ сое тырмытод? Мумы-бубымылэн улыно-вылыно кеноссы но чумзы вал. Соосты кутӥзы но колхозэ басьтӥзы. Паймод, ява, со котырлы 16 пуд гинэ нянь сётӥзы. Ужась адямиез воксё серем карылӥзы ук. Школае мыныны ӧдъямы но, дӥськут уг окмы, ӟустариен но пу кутэн ветлӥмы.

Нылкышно Шушоке 1959-тӥ арын Мукабан гуртысь бызем. Гуртъёслэн виссы одӥг но ӝыны иськем гинэ, пе. «Идеал» колхозын кема аръёс ӵоже дояркаын ужам, 4 пинал вордэм.

— Мужике Геральд Павлович передовой комбайнёр вал. Ӟеч ужамез понна маке со подарок лэсьтоно вал, лэся, мотоцикл сётӥзы. Со кузьымез ик быронэзлэн мугез луиз: мотоеныз пальккиськыны шедиз. Ачим но лапак передовойын ветлӥ, соцсоревнованиын вормисе потылӥ вал. Ужаме понна трос гинэ медальёс сётылӥзы. Оломарлы соосты утьыны ӧй быгаты, чисто нылпиос пичи дыръязы шудыса быдтӥзы.

Та вакытэ Капитолина Фёдоровна доры улыны выжем Кипун гуртэ бызем нылызлэн Сергей пиез, Дина кузпалзэ но ваем. Табере егит семья бабазы дорын улыны малпа. Милемлы но, солы но мӧзмыт уз луы, шуо. Нош та улыно-вылыно корказэ Капитолина Фёдоровналэн бадӟымез пиез пуктэ вылэм. Со улонысь кошкем бере быдэстымтэ юртэ анаез интыяськем. Татын али но ужез быремын ӧвӧл на, шуэ.

Чипы-курег ке но вордоно

Куке-соку гуртын 16 корка вылэм. Гурт шоразы ик асьсэлэн клубзы сылэм. Шушокъёс доры сьӧр гуртъёс но концертъёсын ветло вылэм. Озьы ик гуртазы асьсэлэн магазинзы, кебитсы, скал гидзы вылӥллям. Колхоззы аналмыны кутскемен, соосты чисто пулы но марлы нуллыса быдтӥллям.

Выжыкылысь кадь корка.

Выжыкылысь кадь корка.

— Азьло улон шулдыр вал, — нош веранзэ азинтэ Капитолина Фёдоровна. — Трос адями улӥз гуртамы, чисто колхозын ужамы, трос нылпи вордӥмы. Табере ми мында уг ваё ни. Ма, бен воксё мӧзмыса ум улӥське. Шур дурамы кузь ӝӧк но пуконъёс лэсьтэмын. Лапак отын пумиськылӥськом. Кылем арын гинэ, зоро улэмен, ӧм ветлэ со интыямы.

— Гуртлы озьы гинэ бырыны уз сётэ, вылды, — вера Шаркан муниципал кылдытэтысь специалист Оксана Дьяконова. — Берло аръёссэ одӥг-огез пуктӥськыны кутскизы ни, 2-3 корка ӝутӥськиз. Туннэ нуналлы гуртысь 2 пиналэз Шаркан шор ёзо школае пичи «Газелен» нулло. Нош нылпи садэ тросгес ветлӥсез — 6 кузя. Али гуртын 11 корка, 45 улӥсез. Вазен та гуртэз Починок шуо вылэм.

Талэсь азьло Шушокын коркалы быдэ скал вордӥллям, удалтэм пудо-животэн улӥллям. Турнан интыоссы но окмо гинэ вылэм. Салтыквырулзы, Витябӧрдоннюксы но Голинюксы табере кускозь турынэн басьтэмын, литовка куараос отын азьло аръёсы сямен жин уг вазё ни. Скал возе на Николай Меньшиков гинэ. Со ветылзэ но, кунянзэ но толйытыны малпа на. Кылемъёсыз воксё животлэсь куштӥськиллям ини. Нош Капитолина Фёдоровналэн ыжъёсызлэсь люкиськемез уг поты на, 3-4 йырзэ, пе, возисько на.

Шушок ульча.

Шушок ульча.

— Кызьы ай мон соостэк улом, — шуэ нылкышно. — Юрт котыр ик соостэк мӧзмыт луоз ук. Гуртын улӥсь чипы-курег ке но мед вордоз кадь потэ мыным.

Арлыдо нылкышнолы паймыса быри. Со ас киосыныз быдэс семьяезлы но ӵыжы-выжыезлы егит дырысеныз ини гын сапег лэсьтэ.

— Шуныт сапегез пыдэ кутчаны гинэ капчи, нош лэсьтонэз солэн ӝег но кема, — нош веранзэ азинтэ нылкышно. — Мон сяна, гуртамы Алексей Данилов гын сапег лэсьтэ на. Солэн но ужез туж умой пӧрме.

Любовь Тихонова

Удмурт Дунне
By Удмурт Дунне 17 марта, 2016 15:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<