Россиысь дипломатъёс вылэ омырскон, кема улон но Михаил Бабичен пумиськон

Related Articles

• №7 31.01.2019 0 01.Фев
• Лыдӟисьмес утчаськом фермаысь 0 23.Авг
• Киясаын Пётр Кривоноговлы сӥзем конференция ортчиз 0 15.Окт

Дуннеын

Дипломатъёс вылэ омырскон

Россилэн Киевысь посольствоез котырын огыр-бугыр. Вӧсь луыны шедемъёс ӧвӧл, но сутэмын асьме дипломатъёслэн ваньбурзы, машинаоссы.

Киевын митинг ортчиз, люкаськемъёс дурбасьтэмзэс веразы Н. Савченколы. Со янгыше уськытэмын Россиысь журналистъёсты быдтэмез понна, пуке Ростов-на-Дону городысь СИЗО-ын. Митинге потэмъёс посольстволэсь юртсэ кенжись суретъёсын сутыны выризы, курегпузъёсын, буёлэн лэзьяськизы. Киевысь полиция та шоры гань-гань учкыса сылӥз, бӧрысь гинэ калыкез буйгатэмъяськиз.

Россиын

Улӥськомы кемагес

Азьвыл аръёсын ӵошатыса, Россиысь калыклэн улон даурез 71 аресозь но 2 толэзёзь кузёмиз. 

Та сярысь Президентлы В. Путинлы ивортӥз тазалыкез утёнъя министр В. Скворцова. Калык арысь аре мӧйыме: Россиын вань улӥсьёс пӧлысь 24 процентэз — 60 арессэс ортчемъёс. Ужаны тупась аресъемъёс пӧлын бырон учыръёс 4,5 процентлы, яке 21 сюрс 200 муртлы, кулэсмизы. Таӵе учыръёс, азьвыл аръёсы сярысь, ичигес пусъемын 35 аресысен 60 аресозь пиосмуртъёс пӧлын. Калык кыстӥськыны ӧдъяз спортэ, уноез куштӥськиз кысконлэсь но юонлэсь.

Гуртъёсысь вужмем фельдшер-акушер пунктъёсты выльдон но азинтӥське. Арлы быдэ усьтыны чакламын ваньзэ-ӧвӧлзэ 500 пала модульной ФАП-ёс.

Удмуртиын

Пумиськонлы дась лу!

Россилэн Президентэзлэн Приволжск федерал округъя оскем муртэз Михаил Бабич матысь дыре пумиськыны чакла Удмуртиысь муниципал кылдытэтъёслэн йыръёсынызы.

М. Бабич таӵе пумиськонъёсты ортчытыны чакла ПФО-ысь вань улосъёсын, озьы, пе, рос-просгес тодыны луэ интыосысь югдурез. Кыӵе нуналэ ортчоз асьме йыръёсын пумиськон, тодмо ӧвӧл на, но кивалтӥсьёслы косэмын ваче син кенешонлы дась луыны. Михаил Бабич юалляськоз сирота кылем нылпиослы улон инты сётон, ЖКХ удысэз радъян, калыкез уже интыян но трос мукет ужпумъёс сярысь.

Елена Никитина