Дышетӥсь Валерий Баймурзин: Писпу выжыеныз юн

Удмурт Дунне
By Удмурт Дунне Март 14, 2016 16:23
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Валерий Баймурзин.

60 арес тырме газетмылэн матысь эшезлы, Пичи Пурга ёросысь Аксакшур школаысь дышетӥсьлы Валерий Баймурзинлы. Валерий Дмитриевичез куд-огез, оло, шуоз: йӧспӧртэм ик та адями. Ӟечгес тодӥсьёсыз вералозы: юн ик та Баймурзин!

 Калыклэсь пӧртэм

— Калыклэсь пӧртэм луо шуыса, тодмо вылэм ни вордскыкум ик, — серектэ Валерий Дмитриевич. — 1956-тӥ арын 29-тӥ феврале вылэм со. Мамае карнанэн люкмесэ вулы мынэм. Берло шоккетыса вералоз вал: огаз ведраын ву вайи, мукетаз — тонэ. Метрикаям бон вордскемме 1-тӥ мартэ гожтӥллям ни. Гороскопъя Чорыг луисько. Улыса-вылыса гороскопъёслы но оскыны кутскод ай. Ма, сямы чорыглэн кадь: отчы-татчы, шузи-мази.

Пичи дыръям бон аслым ваньмыз кадь ик потӥсько вал. Дышетски «4»-ёслы но «5»-ёслы. Ӟеч дышетскеме понна 6-тӥ классын «Артеке» но лэзьязы. Ну мӧзмыса бӧрдӥ соку! Туж яратылӥ математика но геометрия урокъёсты. Мамае, Галина Яковлевна, школаын та предметъёсъя дышетӥз.  Мукетыз но математикаен дышетӥсьмы, Лидия Григорьевна Артемьева, зол вал. Туж кельшылӥзы на ӟуч, удмурт кылъя дышетӥсьёсмы Нина Фоминична Михайлова но Зоя Кузьминична Маркова — соослы луыса но яратӥ книгаосты.  Но гуртэ одӥг-ог «2»-ен  бертылэме вань ик — физикаен но химиен уг эшъяськиськы вал. Таӵе дыръя мамаен папа тышкаськозы шуыса кышкан ӧй вал кадь. Но возьыт луылӥз. Мамае вордскемезъя Балезино ёросысь Исакысь, йылпумъямын Глазовысь пединститутэз — со вакытэ вылӥ тодон-валанэн дышетӥсьёс трос ӧй вал на. Папае но, Дмитрий Иванович, туж зол вал! Бригадир но, колхоз пред но, клубен кивалтӥсь но луыса ужамын. Ужан висказ ик дышетскиз на Москваысь искусствоосъя калык университетын. Ох и яратылӥз суредаськыны. Маке быдӟа ик рама вылэ дэра кыске. Карандашен суред пуктэ, но буяны дырыз уг тырмы ни — милемыз косэ.  Ну ми, пиос — мон, Юрик, Шурик — выриськом ни! Папамы валэктэмъяське гинэ: тазэ тазьы буялэ, созэ  — озьы.

Пӧртэм архивъёсын бугыръяськыса, пересьёслэсь юалляськыса, аслэсьтым выжыме 6-тӥ поколениозь тодыны быгатӥ. Кыдёкысь пересь дядяе Баймурза вылэм. Таӵе ним солы сётӥллям Огырчиысь бигеръёс — ку, ӟустари, курегпуз бичаса вуылыкузы, сое озьы шуиллям. Баймурза — «узыр азьмынӥсь» шуэм луэ. Пересь дядяймылэн зарниез вылымтэ, конечно. Но зарни вылэм сюлэмыз.

Мамамы-папамы милемыз но дышетӥзы калык радъя, ог-огедлы юрттыса, улыны. Семьяямы 6 пинал бӧрсьысь бӧрсе будӥм: 3 пи но 3 ныл. Мон куинетӥез, пиос пӧлын — бадӟымез. Гужемзэ турынлы, силёлы бусые, нюлэскы ветлоно вал. Мамаен папа, ми куатьнамы валэн уробое шальтыр пуксиськом. Огмылэн но кылеммы уг поты. Вал уробо ӟукыртэ. Папамы кырӟаны кутске: «пичи гинэ вал вылэ пуксьыса…» Собере Скалшур, Гырккеснюк, Батырбам но гурт котырысь мукет инты нимъёс сярысь вераны кутске. Со верамъёсыз мынам пелям туж пыро вал — отысен ик, малпасько, шаертодонэн тунсыкъяськонэ пуромиз.

Но пичи дыръям мон самолётъёсын дото ёрмемын вал — лётчик луо, шуылӥ. Ачим ик лэсьтылӥсько вал самолётъёс, одӥгъёсыз — немецъёслэн, мукетъёсыз — асьмелэн.  Собере соосты быдэн киосам кутӥсько, ожмаськыны кутскисько. Куддыр Шурик (Александр Баймурзин, Удмуртиысь калык артист — авт.) сюй комокен лэзья на — улӥын, пе, немецъёс ыбылӥсько. Ярам, ымнырам ӧз вуттылы… Война сярысь книгаосты лыдӟыны туж яратылӥ. Мон сяна — Юрик выны но. Кыкнамылы — одӥг книга. Мон солэн пельпум вылаз йырме понӥсько. Но Юрик мынэсьтым чалякгес лыдӟе, книга бамез медаз вошты шуыса, нёръяны кутскисько. Юрик военной луиз. Мон Иж бордысь Пероггуртысь вертолётной училищее ветлӥ ик, но синмыным медкомиссиез ӧй поты.

Анай-атаеныз, апайёсыныз.

Анай-атаеныз, апайёсыныз.

 Ки бервылы Москваын но вань!

— Школаез йылпумъяй — гуртын, фермае но гараже сяна, нокытчы интыяськыны.  Папае шуиз:  дышетсконо, пие! Мон городэ воксё потамын ӧвӧл, Ижез уг тодӥськы. Апае сельхозинститутын дышетске вал бере, отчы ик мыноно кариськи. Но экзаменъёс пыр ӧй поты… Сюри монтажной техникуме — лэсьтӥськисе дышетски. Книга «йырйыны» яратӥсько вал бере, дышетсконэ капчиен сётскиз. Дышетскон вискамы ик техникумысь 2 группаез лэзьылӥзы Москвае 15 сюрс мурт тэрымон бассейн лэсьтыны — 1980-тӥ арын ортчем Олимпиадалы дасяськон азьын вал со. Озьы мынам но ки бервылы отчы кылемын!

«Артекын».

«Артекын».

Техникумын дышетскон вискам ик армие басьтылӥзы. Пограничник вал, службаме  нуи Чита улосысь Аргунь шур дурын. Ой, эшшо вуылысал на со палъёсы! Отын сопкаос, куазь туж чебер, шур сьӧрын — китаецъёс. Одӥгаз сопка йылын тӧдьы шар кадь адӟиське — китаецъёсты чаклан станция со, секретной порма.  Мар со сыӵе шуыса тодон вылысь огзэ китаецез лэзиллям асьме пала. Зол дасяськем со! Олокызьы гинэ потэм ни бышкись езъёс вискытӥ. Тревога  ӝутытозь, ог 15 минут ӵоже, сопка йылэ тубыса вуэм, берлань но ваське ни. Прожекторъёсты ӝуатӥм, юг-юг луиз. Ма, китаецлэсь лаптӥськемзэ адӟимы. Ми, 4 пограничникъёс, џош кунгожез чакласьком вал. Бордамы пунымы. Ньыль пыдо эшмы живо-два кырмиськиз бордаз. «Погранвойскоосысь отличник» 2-тӥ степенё медаль гадь бордамы бырттӥзы. Отпуске лэзьылӥзы на.

Лэсьтӥськисьысь — дышетӥсе

— Техникумез йылпумъяса, бертӥ Аксакам. Соку гинэ, «Мирысь» люкиськыса, гуртамы выль колхоз — «Дружба» — кылдытэмын вал. Монэ отчы лэсьтӥськисе кутӥзы. Прорабе шуи ке, укыр зол кылӥськоз, дыр. Председательмы Семён Тарасович Алексеев туж кужмо вал. Со кивалтон вакытэ гуртмы тодмантэм воштӥськиз — улон коркаос губиос кадь ӝужазы. Техника тырмыт, лэсьтӥськон материалъёслы ёрмоно ӧвӧл. Озьы артэ Пуро гуртын 3 парсь гид, гараж, клуб лэсьтӥм, Пуропочинкаын — 2 скал гид… Шокчыны маза ӧвӧл, ява. Но уж вискын шӧдылӥ — та мынам удысэ ӧвӧл.

Эшшо ке мылкыдме лӧпкытъясь сюриз. Школаямы крезьгурлы но физкультуралы дышетэ вал Евгений Иванович Архипов. Собере сое сельсоветэ басьтӥзы. Со визьмаз: мар гидъёстӥ-гаражъёстӥ бызьылӥськод, мын заочно амалэн ке но дышетскыны пыр. Мон кылзӥськи — УдГУ-ысь география факультетэз бырйи.

Татын но дышетсконэ капчиен мынӥз. Басьтӥ географияя справочник. Отысь ик тодӥ: Южной Америкаысь Анды гурезьёс вискын вань перикратонный прогиб. Солэн кызьы кылдэмез сярысь но верамын. Одӥг пол ортчиськом Сибирьысь гурезьёсты, соос вискысь лайыгетӥ Лена шур бызе. Шуисько: татын но перикратонный прогиб выллем уг луы меда? Дышетӥсе жо-о-ол шорам учке. Вуоно параын, пе, валэктон сёто. Валэктон ӧз сёты ни, но мынам йыры ӝутскиз — эшъёсы но усто дышетскисен лыдъяллязы. Дипломе сӥземын вал асьме палъёсысь пичи шуръёслы, нюр интыослы. Та сярысь газетэ гожтэме но вал ни — лыдӟемды потэ ке, учке, шуи, диплом мышкам понэмын. Азям карта поттӥ. Верасько-верасько… Дипломъя комиссилэн кивалтӥсез Алексей Григорьевич Илларионов ӝыныё дугдытэ: мон паймемын, шуэ.

5-тӥ курсын дышетскыкум ни, лэсьтӥськисьысь дышетӥсе выжоно кариськи. Со вал  1989-тӥ арын. Нырысь нуи крезьгур, черчение, суредаськон, природоведение урокъёсты. Географилы туннэ но дышетӥсько. Школае лыктэме сярысь одӥг но уг жаляськы — татын ӧре уката паськыт луиз ук!

Шаерез котыръян

— Ку гожъяськыны кутски? Та сярысь валанэ вазен ӧй вал. Школаын дышетскыкум, сочинениосты но сокем ӧй яратылы, угось кызьы сое гожтоно — план сёто вал. Мыным со сыӵе мӧзмыт потылӥз. 10-тӥ классын выпускной сочинение гожтыкумы, ачимъяськоно кариськи — нокыӵе куронъёсты ӧй чакла, мылкыдъёсме-малпанъёсме гожтӥ но гожтӥ.  «5» пуктӥзы.

Школае лыктэме бере ик шаертодонъя кружок нуыны кутски. Нылпиосын ӵош Кияса ёросысь Дальня гуртэ мыноно кариським. Тодӥсько вал: отын куашкам черк вань — ветлом, учком, малпай. Вуэммы бере нылпиос пӧлысь одӥгез шуиз: мамае черке пырон азьын кирос поныны косӥз. Кирос тырылэме ӧй вал на. Черк пушкын кыӵе чебер вылэм! Кылчинъёс, святойёс суредамын. Бон штукатурка усьылыны кутскемын, суредам ангелъёс костасько. Гырлы жугон башня вылэ но вутским, тубатъёсыз котыр-котыр лэсьтэмын. Пиналъёслы сокем кельшиз, уй-юй гинэ каро на. 2000-тӥ аръёсы со черкез вуж чертёжъёсъя ик выльдӥзы, али ужа. Нош соку, куашкам мае ке адӟыса, аслам пушкы тыриз — Брестысь крепостез тодэ вайытэ кадь потӥз. Вань адӟемме районамы печатласькись «Маяк» газетэ гожтоно кариськи. Отысь журналист Кузьма Кузнецов гожтэмме лыдӟиз но шуэ: милемлы тӥлесьтыд дышетсконо ай! Сюлмам, син азям мар кылиз, сое ик гожтӥ, шуисько. Озьы со монэ  бурдъяз, эшшо но эшшо  гожъяськыны мылкыды ӝутскиз. Кружокенымы кытчы вуылӥськом, со сярысь ик гожтӥсько вал.

тӧршор6

Походын.

Самой кыдёкысез вуылэм интымы — Татарстанысь Сарсак-Омга. Озьы ик вуылӥм Баграш-Биграла, Алганча-Играла но трос мукет гуртъёсы. Я  пыдын гинэ потӥськом, я велик вылэ пуксиськом вал. Куддыр палаткаосын гинэ кӧлылӥм, сиён-юонмы — тыбыр сьӧрысь ныпъетъёсамы. Тылскем дурын шыд, ӝук пӧзьтӥськом ке — уката усто. Куазен уг удалты ке, школаосы куриськиськом вал. Пиналъёслы туж кельшылӥз. Ма, гурт мышкы гинэ но потӥськом ке, нылпиос туж шумпото ни вал. Татын ик палаткаын кӧлом, шуыны кутскылӥзы.

Михаил Атамановлэсь «Удмуртская ономастика» книгазэ киям кутэм бере воршудъёсын тунсыкъяськыны кутски. Мон со книгаез 3 пол лыдӟи, дыр. Собере эшшо мукет но книгаоссэ туж бадӟым тунсыкен учкылӥ. Озьы лыдъяны кутски, кӧня пумо воршудъёс уло гуртамы. Ачим бигра выжыысь, вань эграпалъёсмы, омгапалъёсмы… Пересьёс дортӥ юалляськыса ветлыны ӧдъяй. Пиналъёслы но доре уж сётӥсько вал — юалляське ай пересьёстылэсь. Соосыз мемей-дядяйёссылэсь верамъёссэс гожъяса ваё, куддыр асьсэос но уг валало кадь, мар сярысь вераськон мынэ. Нош мон йырме корманы кутскисько ни: ух ты! та туж тунсыко ук.

Шаертодонъя кружок 17 ар нуи. Шуккиськыны сюреме бере туризмлэсь куш-тӥськытэк ӧз луы. Но утчаськон ужелэсь ӧй мозмы ни.

Асме журналистэн уг лыдъяськы

— Гуртын пукыны уг чидаськы. Туж яратӥсько Пичи Пургала ветлыны — отын мынам одӥг сюресэ: «Маяк» газетлэн редакциез — музей — архив. Иже но куддыр пегӟыса ик кошкисько. Одно пырасько «Удмурт дуннелэн» редакцияз. Бадӟым тау газетын ужасьёслы, соос ӵектэмъя монэ Россиысь Журналистъёслэн огазеяськоназы кутӥзы. Но асме журналистэн воксё уг лыдъяськы. Гожъясько мылкыдыя, сюлмы косэмъя. Бон сюлэмам мон котьмае туж чаляк басьтӥсько! Мар ке выльзэ адӟисько-кылӥсько ке, соку ик пушкы бугырске, ручка кутэме потыны ӧдъя. Шӧдӥсько ке но: гожъяськеме ваньзылы уг кельшы.

фото1 001

Семьяез бадӟым.

Но улонам тросгес пумисько чылкыт сюлэмо, калык рад вераськыны, кулэ дыръяз юрттыны дась луись адямиос. Соослы луыса ик та нуналъёсы югыт дуннеез адӟиз «Победу приближали как могли» книгае. Кылем арын ик, Быдӟым Вормонлы 70 ар тырмонлы, поттыны чакласько вал. Ӧзгес пӧрмы. Но туж бадӟым тау шуэме потэ Пичи Пурга ёросысь Ильинскысь Прохор Павловлы — та книгаез печатланы со мылкыд сётӥз. Ачиз чидамын война аръёсты, историен тунсыкъяське, «Маяке» потӥсь материалъёсме, пе, мыло-кыдо лыдӟисько. Бордамы басьтћм на Михаил Макинэз, со Пичи Пурга школаын историлы дышетэмын, пенсиын ке но, али но урокъёс одӥг-ог нуэ на. Озьы ми куиньнамы юалляським: оло, кин ке юрттоз, спонсор кариськоз книга поттонамы. Бадӟым тау Кун Кенешысь депутатлы, Пичи Пургалась ужбергатӥсьлы Павел Чушъяловлы, Вуж Мӧньялась «Надежда» СПК-лэн кивалтӥсезлы Бронислав Ясоновлы но мукетъёсызлы. Печате дасязы но поттӥзы районысьтымы «Маяк» газетын ужасьёс. Книгалэн дуныз ичи ӧз усьы. Жаль, 100 экземплярен гинэ поттыны быгатӥм. Но басьтӥсьёс чаляк сюризы, вузаны кылемын ӧвӧл ни. љыны дунын сётӥсько. Мар карод, сюризы ини пыкылӥсьёс но: бон пересьёслы но-а дунын вузаськод, соослэсь юалляськыса ветлӥськод ук. Тау шуисьёсыз но ӧжыт ӧвӧл. Оскисько, мынам но та уже юрттоз гуртмылэсь, татын улэмъёслэсь но улӥсьёслэсь ортчем сюрессэс нылпиосмылэн тодэ ваёнъёсазы кельтыны. Сое дасян понна 24 аре кошкиз.

Юскиськыны вазь

— Валасько: семьяелы дыры уггес кыльы. Соин ик кузпалылэн лекез потылэ, дыр, мыным. Ангелина Дмитриевна кемалась ни ужа школаын, крезьгур, суредан, технология урокъёс нуэ. Йылпумъямын со Ижысь культпросветучилищеез. Гуртамы стройотрядэн вуылӥз вал. Соку синйылтӥ сое. 1-тӥ мартэ 25 аресме тырмытӥ но, ӵуказеяз-а, ӵуказе улысаяз-а кураны ветлӥм. Озьы семья кылдытэммы луиз. Кык нылъёсмы быдэ вуизы, асьсэлэн семьяоссы вань ни. Бадӟымезлэн, Леналэн, кык пиос. Пичиезлэн, Ксюшалэн, 1 ныл. Нимаз уло ке но, милемыз уг вунэто, бертыло.

Улонысьтым марзэ воштод на? Мар вал, иське, озьы луыны кулэ вал. Но нунал ӵоже маке выльзэ уг тодӥськы, одӥг чур но уг гожтӥськы ке — сюлэмы интыяз  ӧвӧл. Соин ик азьланезлы но малпанъёсы вань. Дорын рукописьёсы туж трос люкаськемын, пӧлысьтызы тросэз нокытын печатламын ӧвӧл. Отын куд-ог гуртъёслэн кылдэмзы сярысь гожъямъёсы но вань. Соосты кызьы ке кыре-буре поттоно на вылэм. Ачим ке ӧй, кинлэн меда курег ӵабъямам бугыръяськемез потоз — векчи-векчи букваосын гожъямын соос. Соин ик юскиськыны вазь.

Элина Кумачёва

Калыксэ шумпоттоз на

Валерий Дмитриевич Баймурзин вань кужымзэ сётэ историлы, шаертодон удыслы.

Архивын бугыръяськиз, 1710-тӥ арын нырысетӥ переписез эскериз. Аксаклэсь гинэ ӧвӧл, ёросысьтымы трос мукет гуртъёслэсь кызьы кылдэмзэс, отын нырысетӥ улӥсьёслэсь нимъёссэс, кызьы улэм-вылэмзэс тодмо кариз. Трос гожъя со война вакытэ но со бере ужамъёс сярысь. Тодон-валанзэ нылпиослы но сётэ, школаын дышетӥсь луыса ужа.

Жаль, ӧвӧл солэн аслаз транспортэз, со ветлэ автобусэн, нялтас мынӥсь-ветлӥсьёсын. Аслаз машинаеныз со быдэс районэз, республикаез ортчысал, сюрсэн исторической материал шедьтысал.

Тросгес мед луозы вал Валерий Дмитриевич кадь историкъёс. Синмаськисько мон Баймурзинъёслэн выжызылы. Оскисько, Валерий Дмитриевич калыксэ эшшо но шумпоттоз ужъёсыныз, потозы на выль книгаосыз но.

Прохор Павлов,

Пичи Пурга ёрос.

 

 

   

 

 

Удмурт Дунне
By Удмурт Дунне Март 14, 2016 16:23 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<