Пенсиме йылтозы-а?

Удмурт Дунне
By Удмурт Дунне 1 марта, 2016 09:45

Пенсие потон дыры вуыса но, ужасько на. Кылӥ, ужасьтэм пенсионеръёслэн гинэ пенсизы ӝутэмын. Нош шутэтсконо кариськи ке, пенсиме йылтозы-а?

Лидия С.

Вавож ёрос

Валэктон сётэ Пенсиосъя кун фондлэн Удмурт ёзэзлэн пресс-службаеныз кивалтӥсь Елена Абрамова.

— Туэысен пыӵаны кутско «Страховой пенсиос сярысь» федерал законэ воштонъёс: соосты юнматоно луиз экономикаын кылдэм шуг-секытъёсын сэрен. Та дырозь ужась но, шутэтскись но пенсионеръёслэн пенсизы арлы быдэ ӝутскылӥз. Нош туэ феврале йылӥз ватсаса доход басьтӥсьтэмъёсызлэн гинэ — таослэн пенсизылэн страхованиея люкетэз но со борды выплата ӝутскиз 4 процентлы. Индексация нырысь ик лэсьтэмын кылем арын 30-тӥ сентябрьлы нокытын тыршисьтэм пенсионеръёслы, кытысь ке палэнысь огдырлы уждун уг ке басьто, кылсярысь, гонорар: соос феврале ик шӧдӥзы ни пенсизылэсь ӝутскемзэ. Озьы шоро-куспо пенсилэн быдӟалаез 13 сюрс 100 манет луиз.

Нош пенсионер ужамысь дугдӥз ке бергес, шуом, 1-тӥ октябрь бере? Та учырын куриськонэн  вазиськоно пенсиосъя ёзъёсы (улон интыя). Со борды итоно нокытын ужамтэзэ возьматӥсь справкаосты. Соку индексациез басьтыны луоз куриськон сётэм бере вуоно толэзяз. Нош заявление гожтыны ӧд вуттэ ке, номыр кышкытэз ӧвӧл. Угось 31-тӥ май бере таӵе куриськондэс уз кутэ ни, малы ке шуоно та дырлы Пенсиосъя кун фондэ ивор келялозы ни уж сётӥсьёс (работодательёс). Та отчётъёс вылэ пыкъяськыса, Пенсиосъя кун фондысь специалистъёс асьсэос чаклалозы ни, ку пенсионер ужамысь дугдӥз: озьы солэн пенсиез индексировать каремын луоз август толэзе. Пенсизэ йылтэм бере адями уже интыяськиз ке, пенсиезлэн страхованиея люкетэз кулэстэмын уз луы ни.

Пусйыны кулэ: куриськондэс кутозы, пенсиосъя ёзъёсын гинэ ӧвӧл, многофункциональной центръёсын но, озьы ик почта пыр. Интернет пыр но вазиськыны быгатоды: со понна пыроно Пенсиосъя кун фондлэн сайтаз, отысь шедьтоно «Жизненные ситуации» люкетсэ — отын нимысьтыз бланк сётэмын, ужамысь дугдэм пенсионер отчы аслэсьтыз даннойёссэ пуктыны кулэ.

Эн кышкалэ, тӥляд кема ужамды пенсиды вылын шӧдӥськытэк уз кыльы. Ужам дырез табере баллъёсын лыдъяськомы бере, тӥляд соос тросгес люкаськозы. Индексация ортчытэмын луоз, уждэс уретыны мылкыд кариды ке.

Пусйыны кулэ на: туэ 1-тӥ февральысен 7 процентлы йылэ ЕДВ-лэн (толэзьлы быдэ уксёен выплаталэн) быдӟалаез но. Сое кисызы вылын шӧдозы кунысьтымы 15 миллионлэсь ятыр федерал льготникъёс: ветеранъёс, инвалидъёс, радиация улэ шедьылэмъёс, Совето Союзлэн но Россилэн Героез нимын пусъемъёс но мукетъёсыз. Нош 1-тӥ апрельысен 4 процентлы ӝутэмын луозы социальной пенсиос: сюдӥсь-вордӥсьсэс ыштэм но быдэ вуымтэ пиналъёслы, инвалид нылпиослы чаклам пособиос.

Пенсиосъя кун фондлэн Удмурт ёзаз ужа «пӧсь» телефон: со пыр индексация сярысь лад-лад валэктон сётозы. Жингыртэ (3412) 400-123 телефонъя.

 

 

Удмурт Дунне
By Удмурт Дунне 1 марта, 2016 09:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<