Можга ёросысь Ӵожес гурт: Бызён — со дан

Удмурт Дунне
By Удмурт Дунне 10 марта, 2016 16:59

 Нылъёслэн ӵыжытсы бездӥз

Можга ёросысь Ӵожес гуртэз ӟуч сямен Чежесть-Какси шуо, нош удмуртъёс Ӵожесь шуо на. Со Кватчи муниципал кылдытэтэ пыре. Можга карлэсь ог 16 иськеме интыяськемын.

Синтэм-пельтэм

— Мон тодэмъя Ӵожес гурт ноку ик бадӟым ӧй вал, — вера Кватчи муниципал кылдытэтысь специалист Елена Поздеева. — «Заря» эштосын та вакытэ ужасез ик ӧвӧл ни, ваньмыз пенсие потэмын. Егитъёс табере гуртэ уг ни кылё, чисто городэ кошко. Чылкак огназ Леонид Карпов гинэ ужаны ветлэ на. Гуртын нулло Данилов, Прохоров, Варфоломеев, Фёдоров, Никитин, Карпов, Кудрявцев фамилиосты. 11 коркан улӥсез вань на, 11-ез буш сылэ. Чын-чын улӥсез воксё ӧжыт ини, пропиская ке 29 адями лыдъяське.

Гуртэ кожон дорозь сюресэз сузяса возё.

Гуртэ кожон дорозь сюресэз сузяса возё.

Ӵожесэ мынон нуналэ куазь синтэм-пельтэм пелляськиз. Кватчиын улӥсьёс алӥзы вал, Ӵожесэ, пе, машинаен пырыны уд быгатэ, толо-жоб дыръя сюрессы быдэсак лымыен согиське. Кватчиысь фермаын ужась Леонид Карпов гинэ, пе, нуналлы быдэ колхоз валэн дораз бертылэ. Дӧдьыен лёгем сюрес кузя гинэ гуртэ пырыны быгатоды. Озьы ик вань, дӧдьы сюрес кузя машинаен каллен-каллен пырыны быгатӥм. Кема ик эн улэ, шуиз шофёрмы, сюрес лымыен согиськоз.

Огаз, кыказ капка азязы кожыны турттӥсько — ваньмыз лымыен согемын. Куинетӥяз, мычемаз, кожыса гинэ вуттӥ но, фуфайказэ пельпум вылаз поныса, шоро-куспо арлыдъем воргорон потӥз. Гуртты сярысь тодэм потэ вылэм, шуисько, улӥсез но ӧвӧл ни-а, мар-а татын? Капка азьёс ик мычылымтэ.

— Ма, улӥсьёс ӧвӧл бере, кин сое мычоз? Тӥни сояз, лыз кенерен корка пыре ай, отын мынам анае но атае уло. Песянае но соосын ӵош ик. Гуртын со котькинлэсь мӧйыез ини, туэ 84 арес тырмоз.

Корка пушкы пырыса, тодӥ ини: ӵапак валэн ужаны ветлӥсь Леонид Карповлэн бадӟым пиез доры пырыны шедьтӥськем вылэм. Ӝӧк сьӧрын пукись  песянай али гинэ ӝутэм пельнянь лымзэ пелляса ӟузьылэ. Ӟеч малпась мурт, пе, сиськон вылэ вуэ. Кинме-марме тодытэк, со монэ соку ик вӧзаз пуксьыны косӥз. Кресло вылын пуке  городысь бертэм Толя нуныкаез но Лёня пиезлэн Люда кузпалыз.

Газетысь лыктэмме тодыса, Леонид Анатольевич соку ик ульчае потӥз. Озьыен, пегӟиз.

 

— Со милям сыӵе, — киыныз шонтӥз песянай. — Тани, кен но быгатоз вераны. Ма, бон кыкнамы ик ми та гуртын кенъёс луиськом ини. Ныл йыръёсмы асьме ёросысь. Мон Пуйкагуртысь, нош кен Юбераысь. Шутэтскыны потытозям, колхозын ужай, кен но весь рядовойын ветлӥз. Таре со но уг ни ужа, пенсие потӥз. Быриз ужась калык, быриз. Соин ик газмы но милям ӧвӧл. Ма, табере уз но луы ни, дыр. Кинлы-о таӵе пичи гуртъёс но пересьёс кулэ на меда? Милемлы весь пу дасяно луэ. Ай кӧня солэн ужез, вайид но эстӥд гинэ ӧвӧл ук: корано, вандылоно, пильылоно.

— Нюкъёсты но, ошмесъёсты но ӧжыт ӧвӧл, дыр?

Гуртын лымы трос люкаськемын ини.

Гуртын лымы трос люкаськемын ини.

— Гуртмылэсь ӧжытак палэнынгес, «У» буква кадь кошкись нюкъёс вискын, завод кадь дугдылытэк ужась Заводнюк ошмесмы вань, — табере вера ини Людмила Леонидовна. —  Кыйгуэ ӧм ветлэ, азьло чисто со ошмесын мисьтаськылӥм. Со палтӥгес ик кошке Выжонюкмы. Таязын куке но кык нюкъёсты огазеясь выж сылӥз, луоз. Отын али бервылыз но уг адӟиськы ни. Мукетыз — Огафиянюк. Татчы турнаськись Огаш нимо нылкышно доры нунызэ нонтыны нулло вылэм. Табере со нюкъёсын но улон чалмиз. Гуртамы ми сяна пудо вордӥсь ик ӧвӧл ни. Кечъёсты возем каро на. Ӟамлад гурезьмы борыен узыр. Ой, кӧня-кӧня ми сое отысь бичаськом! Гужем лыктэ ай дорамы, адӟоды со узырлыкез. Гурезь баммы горд басмаен шобыртэм кадь луэ. Ма, гужем кытын шулдыр уг луы меда? Котькытын вож турын ӝужа, возь вылэз сяськаос шулдырто. Толалтэ со котырак лымыен согиське. Гуртмы шорын ик тыметмы вань. Но со берло аръёссэ малы ке куасьмыса быре ини, таба быдӟа гинэ кылемын на. Мукетыз тыметмы гуртлэсь палэнынгес — нюлэс шорын ик Ӵожес ӧр. Шулдыр ке, шулдыр ини отын. Гуртысь вань кошкем калыкен, огазе люкаськыса, гужем со тымет дурын шулдыръяськиськом, гуртмылэсь праздниксэ пусйиськом. Таӵе ужрадэн выреммес адӟыса, малпасько, пиналъёс  сое асьсэос но азинтыны быгатозы ини. Соин ик шуо ук, нылпилы ӟеч сям-йылолъёсты пичиысен пыӵатыса кельтыны кулэ.

Л. Карповлэн бадњым пиез азбарзэ тазатыны потӥз.

Л. Карповлэн бадњым пиез азбарзэ тазатыны потӥз.

Дасясько 8-тӥ Мартлы

— Гуртмы нокызьы медаз быры вылэм, — Людмила кенэз борды итӥське Екатерина Алексеевна. — Сюлэм вӧсь луэ ук, котыр гуртъёс быризы ини — Тӧдьыюрт, Элька, Вильгурт… Мон Ӵожесэ лыктон аре ай клуб но, медпункт но татын ик вал. Синмез эмъясь першал но ужаз. Всё быдтӥзы. Таре эмъяськыны сьӧрло ветлытэк ӧвӧл.

— Клубмы ӧвӧл шуыса, ми дорын мӧзмыса ум пукиське, — вера Людмила Леонидовна. — Нылкышноосын концертлы дасяськиськом. Нырысь ик Варфоломеева Таня апай доры люкаськылӥм. Собере Прохорова Нина апай доры но Кудрявцева Рая апай доры ветлыны кутским. Берло аръёссэ ми дорын пукылӥськом. Ӝоген 8-тӥ Март праздник вуоз, сое пусйыны дасяськиськом ини.

Сюрес пытсаськемлэсь кышкаса, мукет коркаосы ӧй пыра ни. Гуртлэсь кылдэмзэ тодыны ӧйлась. Но Кватчиысен удалтӥз: Ӵожес гуртын вордскем но быдэ вуэм муртэ Мария Егороваез пумитай.

Карповъёслэн машиназы - вал.

Карповъёслэн машиназы — вал.

— Милемлы асьмелы но туж тунсыко, — вера Мария Николаевна. — Кызьы гуртмы кылдэм? Кин сое малпам? Пересьёслэсь тазьы верамзэс тодӥсько: нюлэскын Ӵожес ӧрмы вань. Со дорысен одӥг воргорон кыстӥськись бугор кузя мынэм. Мынэм-мынэм но, гурезь йылэ вуыса, бугорез бырем. Отчы воргорон корка пуктэм, кышнояськем, семья кылдытэм. Нош малы вашкалаос Ӵожес ӧр шуиллям? Соиз нокинлы тодмо ӧвӧл. Со ӧр дортӥ Кузон сюрес кошке вылэм. Отӥ беглойёс но кинъёс пегало вылэм. Дядяй милемыз пичи дыръямы юри со ӧрлэсь куашетэмзэ но чеберзэ возьматъяны нуллылӥз. Туж чебер интые пуксемын гуртмы. Ужась но бай калык отын улӥз, музъемзы урожайной вал, котьмарзы удалтылӥз. Ваньмызлэн бакчаязы яблокпузы будӥз. Ӵожесъёслэн нылъёссы, пе, яблок сиыса чебересь, шуо вал бускель гуртын улӥсьёс. Нош пересь бабушелэсь тазьы верамзэ тодӥсько: Ӵожесэ бызён — со дан.

Любовь Тихонова

Туспуктӥз автор

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Удмурт Дунне
By Удмурт Дунне 10 марта, 2016 16:59