Кырымпыдэс быдӟа Крым гочатэ быдэс Россиын улӥсьёсты

Удмурт Дунне
By Удмурт Дунне 16 марта, 2016 08:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
OLYMPUS DIGITAL CAMERA

Крымысь Гурзуф палъёсын сылэ А. Чеховлэн дачаез.

Кык ар талэсь азьло 18-тӥ мартэ Россия Крымен огазеяськиз. Озьы та музъем кесэг калыкмылэн яратоно шутэтскон интыезлы пӧрмиз.

Кылем арын Ижысь Каракуловъёслэн семьязы Крымысь Гурзуф палъёсын шутэтскиз. Огезлэн нылзылэн тыосыз висё. Соин анай-атай малпазы: зарезь дурысь йодэн узыр омыр дыдыез йӧнатоз.

— Крымлэсь картазэ солань но, талань но кема бергатӥмы, — вера Оксана. — Отын сомында шулдыр интыос вылӥллям — кудзэ бырйыны ик паймимы. Тодмоосмы шуо: мынэ Феодосие — отысь ярдуръёсын луо. Мукет тодмоосмы ӵекто: Алуштаын инкуазез верантэм шулдыр. Но ми кельшытӥмы Гурзуфез. Нылмылэн эмъясез визьнодаз: отысь ӝужыт гурезьёс, пе, тӧлъёслы поръяны уг сёто. Соин омырез тужгес йӧнатӥсь.

Каракуловъёс Казаньысен пырак Симферополёзь лобизы самолётэн. Кузпалъёс нырысь малпазы вал: Крыме ширтозы машинаен. Но тодмооссы дугдытӥзы: Оксаналэн правоез ӧвӧл, нош картэзлы огназлы 2 уй но нунал руль сьӧрын пукыны секыт йӧтоз. Поездэн мыныса но, ӟигар быре.

— 3-4 час ортчиз гинэ, ми Крым музъем вылын вал ини, — веранзэ азьланьтэ Оксана. — Симферопольысен Гурзуфозь милемыз автобусэн вайизы. Улон инты ӵектӥзы. Озьы нылпиосын солань-талань кыстаськоно чик ӧз луы.

Каракуловъёс зарезез нырысьсэ адӟизы. Кышномурт аслыз ачиз тумошо потыны кутскиз. Шуныт палъёсын шутэтскылӥсь эшъёсызлы угось ӵем шуылоз вал: кызьы зарезь дурын шунды улын нуналъёсын-нуналъёсын вез-вез кылльыны луэ?! Учкод ке — татчы вуыса, мугор ачиз ланьырске, шутэтскыны кутске вылэм.

— Маиз паймытӥз — Крымысь котькуд инты герӟаськемын кыӵе ке но учырен, адямиен, — маде Оксана. — Тани Гурзуфын пыласькон интыямы пичигес гурезь вал. Нылъёсылы шуисько: учке ай, макем со утюглы укша. Берло тодӥмы: гурезь огшоры вылымтэ —   кырӟасьлы Фёдор Шаляпинлы сӥземын. Татын со кема аръёс ӵоже улэм. Татчы ик искусстволы сӥзем корка лэсьтыны малпа вылэм. Но кенерзэ гинэ пуктыса вуттэм.

Гурзуф — пичигес черкогурт. Ялта городлэн оглюкетэныз лыдъяське. Ӝужыт юртъёсты, ульча тыр тымиськем машинаосты отысь уд синйылты. Калыкез но Симферопольын, Севастопольын кадь лачак ӧвӧл.

— Ми Крымын шутэтскимы ке, тодмоосмы — кунгож сьӧрын, — вера Оксана. — Вордскем палъёсамы берытскимы но пумиськимы, дуннеез котыръяммы сярысь мадимы. Валамы: милям шутэтсконмы тунсыкогес вылэм. Тани Египетын зарезь ярдуръёс отельёслы люкылэмын. Мукет отельлэн ярдураз лёгиськыны шедьтӥд ке, тонэ уллялозы. Нош ми Сьӧд зарезьлэсь кӧня иськем ярдуръёссэ учкыса потӥмы меда!

Та вакытэ Каракуловъёс нош ик коньдон люкало. Пӧсьтолэзе Крыме мынозы. Оксаналэн сюлэмыз интыяз ӧвӧл ини: самолётэ билетъёс вузан мынэ ини, пе. Нылмурт лыдъям: али 1 адямилы билет 7 сюрс котыр сылэ. Нош гужем со ог 12 сюрсозь будоз.

Ольга Корепанова

Удмурт Дунне
By Удмурт Дунне 16 марта, 2016 08:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<