Курик. Кызьы йырез берыкто террористъёс?

Удмурт Дунне
By Удмурт Дунне Март 31, 2016 11:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кызьы егитъёсты террористъёслэн ки улазы шедемлэсь утёно? Та сярысь вераськон ортчытӥз Кун Кенешысь Национальной политикая, калыкез кышкытлыклэсь утёнъя но Кун Кенешлэсь ужзэ радъянъя ялан ужась комиссия. Котрес ӝӧк сьӧры люкаськизы дышетӥсьёс, егитъёсын ужасьёс, югдурез утисьёс, калык огазеяськонъёслэн кивалтӥсьёссы.

0101289,молодежь,спорт

Террористъёслэн ки улазы ӵемгес шедё 20 аресъем егитъёс.

 Синмаськон но бырон

Террористъёс калыклэсь йырзэ берыктыны выро социальной сетьёс, тодматскон сайтъёс пыр — ӵапак татын уен-нуналэн пуке егит калык. Психиказы, улон шоры учконъёссы юнмамын ӧвӧл на — соослэсь йырзэс берыктыны капчи. Тужгес но нылъёслэсь. Соос пиосын Интернет пыр тодматско, синмасько, трос ик дыр уг ортчы — нылаш дась ини вань косонъёсты быдэстыны. Кыдёке ветлонэз ӧвӧл: кылем арын террористъёс ки улэ ӧжыт гинэ ӧз шедьы 19 аресъем Варвара Каракулова. Россиысь тужгес дано вузын, МГУ-ын, дышетскись нылашлэн визьмыз тӧлӟем Интернет пыр Сириысь пияшен тодматскемез бере. В. Каракуловаен кадь  луэм учыръёс пӧлысь 6-7 процентэз гинэ шарае пото. Кылемъёсыз ортчо лушкем. Та дырлы ИГИЛ (Россиын алэмын) палан ожмасько 80 кунъёсысь доброволецъёс. Пӧлазы ичи ӧвӧл Россиысь, СНГ-е пырись мукет кунъёсысь вуэмъёс.

— Тужгес но кышкыт 20-23 аресъем егитъёс понна: таос анай-атайлэн бурд улысьтызы потэмын ни, сюрес вылэ потыны уксёзы вань, — вера Россиысь Югдурез утёнъя министерстволэн Югдурез утёнын тыршисьёсты дасянъя центрысьтыз дышетӥсь Ирина Фоменко. — Cоосты террористъёс гочато ӟеч улонэн. Куриказы озьы ик капчиен шедё быдэ вуымтэ пиналъёс: Интернетын соосын кусып тупато, пӧртэм видеороликъёсын, чебер гожъямъёсын йырзэс поромыто. Таос бӧрсьы мыно пиналзэс огназы будэтӥсь егит нылкышноос: оген улонзы секыт, нош агитаторъёс соослы сӥзё семьяен улон, яратон, кузь коньдон. Таос сяна, сьӧсьёс ки улэ капчиен шедё исламлы мур оскись но кыӵе ке йыруж лэсьтэмзы понна пытсэт сьӧрын пукемъёс. Озьы ик секыт югдуре шедемъёс, ужтэк кылемъёс но трос мукет. Таосыз валаса кушласько террористъёсын.

Ирина Фоменко ивортэмъя, ИГИЛ-лэн (Россиын алэмын) радаз пыремын Россиысь 2 но ӝыны сюрс мурт. Но зэмос лыдпус, валамон, шӧдскымон тросгес луыны быгатоз. Ожмаськыны ӝуткасьёслэн лыдзы но нуналмысь йылэ: калыклэсь йырзэ берыктонэн выре 90 сюрс мурт. 24 пӧртэм кылын! Вербовщикъёс тужгес но паськыт куто араб, англи кылъёсты, куинетӥ интыын — ӟуч кыл.

— Ӟуч кылын вераськись агитаторъёсты дасян понна ик асьме нылъёсмес ИГИЛ-э (Россиын алэмын) кыскыны выро, — веранзэ азьланьтэ Ирина Фоменко. — Соосты синмаськытыса-пӧяса Турция пыр Сирие поттыны туртто. Яратонэн шузимыса, таос нырысь-валысь уг валало кытчы шедемзэс. Бӧрысь валатско ке но, соглаш карисько ни террористъёслы юрттыны. Пумитъяськисьёссэ ляльчи чотын возё, вылысьтыз вылаз нылпи вайыто: тазьы но группировказылэсь лыдзэ йылтыны выро.

Социальной сетьёсты чакласа возьыны секыт, соин ик тужгес но бадӟым саклык висъяно егитъёс пӧлын валэктон уж нуонлы. Президентлэн В. Путинлэн пуктэмезъя 2014-тӥ арысен ИГИЛ Россиын алэмын, солы дурбасьтэм понна чурыт кыл кутон чакламын — та сярысь тодыны кулэ котькудӥз.

Кайгу кыдёкын ке но, матын

Кыӵе югдур туннэ нуналлы Удмуртиын? Югдурез утёнъя министерствоысь Экстремизмен нюръяськонъя центрлэн кивалтӥсез Сергей Козлов ивортӥз:

— Удмуртиын лыдпусъёс арысь аре огмындагес возисько. 2013-тӥ арын шараямын вал экстремизмен герӟаськем 25 йыруж, 2014-тӥ арын — 27, кылем арын — 20 учыр. Вань та йыружъёсты лэсьтэмъёслэн арлыдзы — 20 арес котыр. 7 учырын лыдӟыны лэзьымтэ литература таламын. Со сяна, берло дыре дуннеын вӧлмыны кутскиз «военной туризм». Террористъёс егит пиосты гочато: тон зэмос воргорон ке, ас синмыныд, пе, адӟыны кулэ ожлэсь мынэмзэ. 18 аресказ кинлэн герой луэмез уг поты?! Озьы агитаторъёс ӧтемъя та пиос вуо Сирие, соосты террористъёс палан ожмаськыто.

Экстремизм понна Уголовной кодексын кыл кутон чакламын 19 пӧртэм статьяын, терроризм понна — 12-аз. Егитъёс ӟеч тодыны кулэ та сярысь, со понна котыр ласянь валэктон уж нуоно, шуиз С. Козлов.

Котрес ӝӧк сьӧры люкаськемъёс огкылэ вуизы: Россиын терроризмен, экстремизмен нюръяськонъя программа вань ке но, со улосъёсын быдэсъяське ке но, нимысьтыз программа дасяно на — отын бадӟым саклык висъяно егитъёсты Интернетысь кулэтэм иворъёслэсь утёнлы. Та ласянь адӟем кароно Чечня, Дагестан, Татарстан, Башкортостан кадь улосъёслэсь: отын ИГИЛ (Россиын алэмын) кадь группировкаосын нюръяськонъя ватсаса программаос быдэсъясько.

 Дыр вуиз иворез сӥсъяны

Кыӵе ужрадъёс кутоно, шаерамы улӥсьёс террористъёслэн куриказы медаз шеде шуыса?

Рустам Гатауллин, «Ижысь мечеть» огазеяськонлэн кивалтӥсезлэн воштӥсез, «Муслим» газетлэн валтӥсь редакторез:

— Кык мусульманъёс пумисько ке, ог-огенызы «салям-алейкум» шуыса ӟечъясько. Тупаса улон сӥзё, иське. Коранын гожтэмын: тынад киосыд, йырыд адямиос понна кышкыт луыны кулэ ӧвӧл, тон вӧзын котьку мед луоз тупаса улон. ИГИЛ (Россиын алэмын) кадь группировкаос Коранлы пумит мыно. Соос христианъёсты, озьы ик мукет осконэн улӥсь адямиосты гинэ «невернойёс» уг шуо, тушмонъёс радэ пыртэмын ми но, традиционной исламлы оскисьёс, чылкыт сямъёсъя улӥсьёс. Кызьы нюръяськоно соосын? Элькунысьтымы мусульман огазеяськонъёс трос лэсьто та понна. Вань мечетьёсысь имамъёс пыр валэктон уж нуиське. Соос тодон-валанзэс будэто Уфаын ортчылӥсь курсъёсын, кудъёсыз радъямын Россилэн Президентэзлэн Приволжск федерал округъя оскем муртэзлэн М. Бабичлэн кичӧлтэмезъя. Тани алигес Ижысь мечете воргорон пыраз: арлыдыз вань ни, пиналъёсыз лачак. Интернетысь шедьтӥ, пе, таӵе иворез — осконо-а солы? Имам солы ваньзэ рос-прос валэктӥз, кулэтэм малпанъёссэ тӧлӟытӥз. Со сяна, паськыт уж радъяськомы шаерысьтымы колониосын. Отын пукисьёс пӧлын угось ӵемгес пумисько террористъёсын кушласькисьёс.

Александр Ярославцев, элькунысьтымы Кышкытлыклэсь утиськонъя кенешлэн секретарез:

— Дуннелэн пӧртэм сэрегъёсаз сьӧд ужзэс быдэсто террористъёслэн 200 пала огазеяськонъёссы, со пӧлысь 140-эз пыкъясько оскон вылэ — уноез дурбасьто исламлэн кышкыт ӧръёсызлы. Интернетын пукисьёс гинэ курике уг шедё, террористъёслэн оскем муртъёссы выжыясько улосъёсысь мусульманъёс пӧлы. Соосты шараяны туж секыт. Уг тырмо, малпасько, традиционной исламлэсь куронъёссэ ӟеч тодӥсь имамъёс. Калык пӧлын валэктон ужмы трослы паськытгес луыны кулэ, террористъёслэн лушкем ужзы сярысь. Дасяно нимаз программа.

Алексей Рассамахин, Кун Кенеш бордысь Егитъёслэн парламентсылэн ёзчиез:

— Учке ай, Интернетын пукисьёс азе кыӵе чурыт куронъёс пукто США-ын, Китайын, Латвиын: паспорттэк яке нимаз пластик картатэк нокин но пырыны уг быгаты ивор вотэсэ. Асьмелы но дыр вуиз Интернетысь иворез сӥсъяны. Чакласа потӥмы Чечнялэсь террористъёсын нюръяськонъя программазэ. Ми но табере ӵектонъёсмес дасяськомы. Кылсярысь, социальной сетьёсысь пытсано нимтэм сэрегъёсты, сайтъёсты. Дасям программамес эскерыны ӵектомы Кун Кенешысь депутатъёслы.

Елена Никитина

Туспуктӥз А. Горбунов

Удмурт Дунне
By Удмурт Дунне Март 31, 2016 11:18 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<