«Куарагур» проектын — яркыт тусбуйёс, кужмо куараос!

Удмурт Дунне
By Удмурт Дунне 9 марта, 2016 16:27
ахметханова1

«Куарагурын» вормиз К. Ахметханова.

Рок, рэп, лэймыт кырӟанъёс… Кыӵе гинэ гуръёсты кылыны ӧз луы «Куарагур» концертысь. Туэ сое «Шунды» огазеяськон 3-тӥ арзэ ортчытэ ни.

Тӧдьы юсь выллем сцена вылтӥ гылӟе Яна Кузьмина, калык ансамбльысь арганэныз вуэм Радис Гайниятов, уй дискотекаысь ик концертэ кожем кадь Герман Волков…

— Та концерт — егит крезьгурчиосын, кылбурчиосын, кырӟасьёсын ар ӵоже валче ужаммылэн емышез, — вера «Шунды» огазеяськонлэн тӧроез Ольга Тронина. — Проект усьтэ выль усточиосты.

Концертлэсь программазэ туэ мытӥз Татарстанысь Агрыз ёросысь Варклед-Бӧдья гуртысь Марина Матвеева. Кырӟанэзлэсь кылбурзэ гожтӥз Алнаш ёросысь егит кылбурась Марина Пахомова, крезьгурзэ — ачиз.

Кылбурчиослы но крезьгурчиослы лякытгес, соос ас ужзэс вазенгес быдэстӥзы ни. Нош кырӟасьёс тулкымъяськыса сцена сьӧрын сыло. Башкортостанысь Радис Гайниятов гинэ номырлэсь уг кышка кадь, оло, гадь бордаз ӝиптэм арганэз юрттэ.

— «Ой, мусое, мусое» кырӟанме гожтӥз Николай Анисимов. Аслым туж тупа — задор, капчи мылкыдо, — вера со.

Радис али дышетске Воткаысь П. Чайковский нимо колледжын. Солэн ки улаз улӟо фортепиано, баян, крезь но мукет крезьгуро инструментъёс. Туж яратэ арганэз. Сцена вылэ, «эшсэ» кыскаса, потӥз.

Герман Волков рэп кырӟанъёсын школа дырысеныз выре ни, ачиз ик кылъёссэ но гожтэ. Мур пуштросо. «Ул ми кадь» кырӟаназ со егитъёсты пышкылэ. Мар кулэ соослы туала вакытэ? Интернетын уен-нуналэн пукон, селфиен висён, тамак кыскон но вина юон…

Оло тулкымъяськеменыз, оло куаразэ пуктымтэеныз, Герман кырӟакуз вань кылъёссэ сииз кадь. Озьы ке но нылъёслы кельшиз. Качок!

герман

Герман кырӟакуз вань кылъёссэ сииз кадь. Озьы ке но нылъёслы кельшиз. Качок!

Сцена вылэ потыса, копак воштӥськиз Яна Кузьмина. Ненег, востэм нылаш пӧрмытскиз зэмос кинодивалы. Яна дышетске 9-тӥ классын Ижысь Кузебай Герд нимо гимназиын. Быдэстӥз Мария Васильевалэн кылъёсызъя гожтэм «Та дуннее ӧм лыктэ, дыр, юнме» кырӟанэз. Крезьгурзэ гожтӥз Владимир Жуйков.

Башкортостанысь Янаул ёросысь Ксения Ахметханова тросэзлы тодмо вал ни филармонилэн «Выль куара» проектэзъя. Отын со 2-тӥ инты басьтӥз.

«Тонэ веръян — со нырысетӥ лымыез шӧмъян кадь…», — чузъяськизы сцена вылысен Марина Пахомовалэн чуръёсыз. Соку ик мугор юзыр-кезьыр луиз. Нылашлэн куараез туж кужмо, со быгатэ лэйканы крезьгурлэн тулкымъёсыз вылын. Крезьгурез но туж валаса гожтэмын. Тау со понна Peace Pu  группаысь кырӟасьлы Настя Рысаевалы.

Конкурсэз йылпумъяз Кизнер ёросысь Ирина Яковлева. Быдэстӥз Ольга Трониналэн кылъёсызъя гожтэм «Зундэс» кырњанэз. Крезьгурез Мария Бочкаревалэн.

Вис. Ваньзы пуко телефонъёсазы — кельшем кырӟасьёслы смс-куара лэзьяло. Кузебай Герд нимо гимназиысь пиналъёс классэн-классэн лыктӥллям. Валамон, висё асьсэ эшъёссы Евгения Аркова но Яна Кузьмина понна.

В. Мадазимовлэн образэз али но син азьын сылэ.

В. Мадазимовлэн образэз али но син азьын сылэ.

— Кыкназы понна ик куараме сёто, — шуэ Вадим Крестьянинов. — Телефонам сим-картае 2!

Концертлэн кыкетӥ люкетаз кырӟазы «Куарагур» проектэ азьвыл пыриськемъёс — Алексей Пикулев, Peace Pu рок-группа, Мария Бочкарева. Выль кырӟанъёсынызы шумпоттӥзы Анна Образцова, Эльвира Панченко.

Тани вуиз кема витем дыр.  Кин вормоз? Ужъёсты дунъязы «Шулдыр ӝыт» ансамблен кивалтӥсь Наталья Ушакова,  «Удмурт дунне» газетлэн валтӥсь редакторез Зинаида Рябинина, «Камали» студиысь дышетӥсь, кырӟась Светлана Ручкина но Удмуртиысь Крезьгурчиослэн огазеяськонэнызы кивалтӥсь Марина Ходырева.

Вормисьёс пӧртэм номинациосын пусъемын. Тужгес быгатӥсь кылбурчи — Алнаш ёросысь Анна Бурдина, крезьгурчи — Кез ёросысь Иван Белослудцев. Нимысьтыз куара сётон мынӥз вотэсын но учкисьёс пӧлын. Калык лыдъямъя усто кырӟазы Кизнер ёросысь Ирина Яковлева но Алнаш ёросысь Анастасия Сапожникова. «Удмурт Кенеш» огазеяськон нимысьтыз кузьым сётӥз Евгения Арковалы.

Нош кин тужгес усто кырӟаз жюрилэн малпамезъя?

— Яркыт тус, кужмо куара — ваньмыз со синмальдымон Ксения Ахметханова сярысь! — ивортӥз Наталья Ушакова.

Табере Анна Бурдина быгатоз кылбур бичетсэ поттыны, нош Ксения Ахметханова — клипсэ лэсьтыны.

Мария Векшина

Туспуктӥз Ю. Васильева

 

 

 

 

 

 

 

Удмурт Дунне
By Удмурт Дунне 9 марта, 2016 16:27