Калык эктонъя «Чебеляй» нылпи студия 15 ар тырмонзэ пусйиз

Удмурт Дунне
By Удмурт Дунне 29 марта, 2016 12:01
чебеляй

15 ар куспын «Чебеляе» кӧня пинал ветлэмын но ветлэ.

Ужрад ортчиз кылем арняе Ижысь Удмурт театрын.

Ужрад огшокчемен ортчиз. 2 час ӵоже студиысь нылпиос, азьвыл отчы ветлэмъёс удмурт, ӟуч, кунсьӧр эктонъёсты возьматӥзы. Сцена 1 секундлы но ӧз чалмылы. Пиналъёсын ӵош люкаськемъёсты задор мылкыдынызы шулдыртӥзы Карелиысь куноос, «Айкай» ансамбль, Брангуртысь песянайёс. Брангуртъёс татысь воксё паймыса кошкизы. Оскытӥзы: табере, пе, ми но эктыны кутскомы!

15 ар куспын «Чебеляе» кӧня пинал ветлэмын но ветлэ — студилэн кивалтӥсез Наталья Чиркова вераны ӧз тоды. Пусйиз гинэ: тро-о-ос! Зэмзэ но, сцена вылын капчиен бергась нылпиосты лыдъяса вуттоно ӧвӧл — Ижысь Кузебай Герд гимназиысь вань дышетскисьёс татчы люкаськиллям кадь. Угось ӵапак та гимназиын ужа-шока «Чебеляй».

— Милям вань «Выж» проектмы, — вера Наталья Николаевна. — Кылдӥз со 2005-тӥ арын. Та проект юрттӥз студимылы ӟеч кусып тупатыны Эстониысь, Финляндиысь, Карелиысь, Россиысь пӧртэм улосъёсысь нылпи ансамбльёсын. Табере ми ог-огмылэсь эктыны дышетскиськомы.

Гимназилэн кивалтӥсез Анжелика Михеева шуэ: таӵе бадӟым ужез 1 адямилэн кужыменыз гинэ уд быдэсты, соин ик маин быгатӥмы — юрттӥмы. Гимназиын, «Чебеляй» сяна, вань на мукет студиос — «Куарагур», «Выль крезьгур», «Айно», «Крезь куара», «Шулан». Нылпиос отысь зэмос артист луыса пото. «Айкайёслы» сюлмаськоно ӧвӧл — кивоштӥсьёссы будо.

Шуныт кылъёссэс веразы на шаерысьтымы культурая но туризмъя министр Владимир Соловьёв, «Удмурт Кенеш» огазеяськонлэн кивалтӥсез Татьяна Ишматова. Татьяна Витальевна пусйиз: «Чебеляе», оло, тамында пиналъёс ӧй но люкаськысалзы. Наталья Николаевналэн вань аспӧртэмлыко кужымез — котькуд покчилэн сюлэмаз тылгизьы ӝуатыны быгатэ.

Нылпиоссы понна шумпото анай-атайёс. Учкисьёс пӧлысь огез Иван Каракулов шуэ:

— Саша пие «Чебеляе» 2 ар ветлэ ни. Та сяна, пыласьконъя, киын жугиськонъя кружокъёсы пыриське. Шуисько: пие, жадиськод, гуртэ уждэ лэсьтыны кужымед уг тырмы ни. Ойдо, эктыны ум ветлэ ни. Нош Сашамы паймытске: кызьы-озьы?! Туала пияш, пе, эктыны быгатыны кулэ.

Ольга Корепанова

 

 

 

Удмурт Дунне
By Удмурт Дунне 29 марта, 2016 12:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<