Ижысь искусствоосъя 9-тӥ нылпи школаын ортчиз «Ижик» конкурс

Related Articles

• Кун Кенешлэн сессиез: Уждунэз йылтыны коньдон вань 0 26.Апр
• «Удмуртия» издательство нылпиослы 11 ӝӧк выл шудон поттӥз 0 24.Дек
• Иж дунтэм квартираосъя 5 каръёс пӧлы пыриз 0 09.Июл

«Ижик» конкурсын буш интыос ӧй вал.

21-тӥ арзэ ини тулыс шаерысьтымы покчи усточиос возьмато калык инструментъёсын шудыны быгатэмзэс.

Конкурсэз радъясь, Ижысь искусствоосъя 9-тӥ нылпи школаысь калык инструментъёсъя отделениен кивалтӥсь Ольга Петрова верамъя, арысь аре та вожвылъяськонэ тросгес пиналъёс пырисько.

— 2009-тӥ арын 33 нылъёс-пиос гитараен, домраен, балалайкаен, баянэн но аккордеонэн шудӥзы ке, туэ 130 усточиос конкурсэ пыриськизы ини. Берло дыре, Ижысь, Можгаысь, Воткинскысь искусствоосъя школаосысь сяна, ӵошатсконын устолыкенызы паймыто Пичи Пурга, Эгра, Балезино, Дэри, Глазов но мукет ёросысь нылпиос, — шуэ Ольга Алексеевна.

«Ижик» конкурс ӝыны нуналлэсь кема кыстӥськиз. Пиналъёсты дунъязы Удмуртиысь культура удысысь дано ужасьёс, Ижысь крезьгуръя колледжысь дышетӥсьёс, Удмурт кун университетысь педагогъёс. Жюриын вал Москваысь крезьгуръя М. Глинка нимо нылпи школаысь аккордеонэн но баянэн шудыны дышетӥсь Ольга Щуклина но.

Туэ Гран-При басьтӥзы: Воткинскысь искусствоосъя П. Чайковский нимо 1-тӥ нылпи школаысь домраен шудӥсь (покчи группа) Елизавета Плюсина, устоез луиз на та школаысь ик домраен шудӥсь (11-12 аресъем пиналъёс пӧлын) Мария Мещерякова но Кезысь искусствоосъя нылпи школаысь баянэн шудӥсь Никита Ложкин.

Конкурсэз радъясьёс пиналъёслы ческыт кузьым дасяллям. Котькудӥз нылпи та вожвылъяськонысь «Ижик» тортэн дораз бертӥз.

Галина Савина

Туспуктӥз Вера Пушкарёва