Искусстволэн кунгожъёсыз ӧвӧл

Удмурт Дунне
By Удмурт Дунне Март 21, 2016 08:51
Ivanov2

Ижысь цирклэн директорез Дмитрий Иванов.

Цирк искусствоя калыккуспо фестивалез усьтон азьын Ижысь цирклэн директорез Дмитрий Иванов аслэсьтыз мылкыдзэ шараяз:

— Паймымон ини, та фестиваль ортче, татчы арысь аре тросгес артистъёс пыриськыны мылкыд каро шуыса. Туэ Ижысь фестивале шедён понна дуннелэн пӧртэм сэрегъёсысьтыз 300 пала куриськон вуиз, ми учкимы 250-лэсь уно номеръёсты, бырйимы 21-зэ, тужгес яркытсэ, чеберзэ, аспӧртэмлыкозэ. Шуг-секытъёс, санкциос шоры учкытэк, фестиваль улэ, со возьматэ: искусство понна кунгожъёс ӧвӧл. Туэ но Иже вуизы устоосыз пӧлысь устоосыз. Канадаысь Дарья Винтилова 27 час самолётэн лобиз та фестивале пыриськон понна. Вуэмез бере шутэтскытэк ик репетиция борды кутскиз. Артистъёс трос, ваньмызлы представленилы дасяськоно. Россиысь калык артистлы Николай Павленколы 2 часын уйин гинэ арена шедиз. Со татчы аслэсьтыз аттракционзэ вайиз, 12 тигръёссэ. Николай Карповичлы 72 арес. Но со, арлыдыз, сюрес вылын жадемез шоры учкытэк, чик керӟегъяськытэк, уйин репетировать кариз. Сьӧсь пӧйшуръёсын клеткаосы огназ пыриз. Юасько, тӥляд кыӵе ке кивалтосты вань-а? Со пальпотэ, малы мыным кивалтос, киям дирижёрлэн палочкаез вань… Ваньмыз та возьматэ зэмос профессионалэз. Николай Павленко 1990-тӥ арын Монте-Карлоын ортчем калыккуспо фестивальын Зарни клоунэз басьтӥз. Ижысь учкисьёсты но паймытӥз, тигръёсын оркестрен сямен дирижировать карыса.

— Дмитрий Евгеньевич, циркын ужась артистъёс юмоке шедьыло-а? Вал-а серемес учыръёс асьме фестивальёсын?

— Учыръёс пӧртэмесь луыло. Кылсярысь, Бельгиысь огез артист фестиваль бере паспортсэ ыштӥз. Сое валаз аэропортысен гинэ. Валамон ини, нокин но куномес самолётэ ӧз пукты. Мон сое выльысен вайи цирке. Куинь нунал Ижын улэмез бере жингыртӥ аэропортлэн кивалтӥсезлы. Мыным шуизы, вае печатен документ, ми сое озьы гинэ самолётэ пуктом. Цирклэн печатеныз гожтэт малпаса, кунгожсьӧр куномес Москваозь келямы. Отын сое пумитазы посольствоын ужасьёс. Но та артист эшшо Москваын арня пала улоно луиз на, Бельгиысь документъёс вуытозь.

— Нош арена вылын витьымтэ шорысь учыръёс луо-а?

— Азьвылаз фестивальын Кубаысь артистъёслы кулэ вал мачта. Ми шедьтӥмы сое, но куке артистъёс тубизы вылаз, корт арбери куасалскиз. Артистъёс куалектӥзы. Кышкаменыз ик, лэся, ведущий шуиз: та боды лэсьтэмын «Ижсталь» заводын. Ӵап со нуналэ залын вал та заводлэн директорез. Ӵуказеяз ми шедьтӥмы сыӵе зол мачтаез, ведущий шуиз: тани кыӵе юн арбериос лэсьто Ижысь заводын.

— Вуоно арын фестиваль юбилейзэ пусъёз. Маин со висъяськоз?

— Вуоно аре ми юбилей фестивале ӧтьыны чакласьком вань ортчем фестивальёсын вормисьёсты. Отын уз луы конкурс, артистъёс уз вожвылъяське Зарни гондыръёс понна. Соос тунсыко программаосынызы нош ик лыктозы дорамы, учкисьёслы кузьым лэсьтозы но цирк искусстволэсь паймымон но чебер дуннезэ асьмелы усьтозы.

Галина Семёнова

Удмурт Дунне
By Удмурт Дунне Март 21, 2016 08:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<