«Гурт адями» — Грак ёросысь «Конный завод» хозяйствоен кивалтӥсь Геннадий Петров

Удмурт Дунне
By Удмурт Дунне 1 марта, 2016 11:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Гурт адями-2015» конкурсэ «Устоез кивалтӥсь» номинацие ӵектэммы потэ Грак ёросысь «Конный завод» хозяйствоен кивалтӥсез Геннадий Петровез.

P1030589

Грак ёросысь «Конный завод» хозяйствоен кивалтӥсь Г. Петров.

Геннадий Петров вордскиз Ува ёросысь Лучег гуртысь удмурт семьяын.

Геналы пичи дырысеныз кельшизы валъёс. Вожъяськыса учкылӥз агаезлэн ужамез шоры: со пудо першал вал.

Малпанэз быдэсмыны ӧдъяз 8-тӥ классэз йылпумъямез бере. Колхоз сое Асанысь совхоз-техникуме дышетскыны келяз.

Отын тодон-валан люказ, ӟеч специалист луиз. Чувашиысь эшез, вал вордонъя фермалэн кивалтӥсез, Генаез ӧтиз аслаз шаераз. Озьы Геннадий Андронович кузпалыныз ӵош чуваш шаере кошкиз. Но 2 но ӝыны ар ортчыса, Петровъёс Ува палъёсазы берытскизы.

Геннадий Петровлы 2 хозяйствоын уж ӵектӥзы. Со бырйиз «Дружба» хозяйствоез — отын вордӥзы трос вал. 2 ар зоотехникын ужамез бере сое хозяйстволы кивалтӥсе юнматӥзы.

1980-тӥ аръёслэн пумазы паськыт пыӵаны ӧдъяз пӧртэм кунъёс куспын специалистъёсын вошъяськон. Америкаысь вуэмъёс быдэс странаысь бырйизы 15 муртэ: соослэсь, пе, квалификацизэс будэтом Америкаын. Соос пӧлы шедиз Геннадий Петров но. Кунгожсьӧръёслы со кельшиз мылкыдзэ меӵак но чеберъяськытэк вераны быгатэменыз.

Кунгож сьӧрын дышетскон висказ куашказ Совето Союз. Вордскем палъёсаз бертыса, Геннадий Андронович йырзэ тӥяны ӧдъяз: кытчы интыяськоно? Ӝоген солы оскизы ёрос администрациысь гурт удысъя ёзэн кивалтыны. Но та удыс солэн сюлмаз ӧз пыӵа.

Солы ӵектӥзы Грак ёросысь «Конный завод» хозяйствоен кивалтыны. 4 ар ӵоже та предприятиен кивалтытозяз, хозяйствоын шӧдскымон ӝутскиз йӧл поттон: ар куспын 2 сюрс 200 килоысен 3 сюрс 700-озь. Но таяз радэ но Геннадий Андроновичлы та удысэзлэсь куштӥськоно но мукет уж борды басьтӥськоно луиз. Озьы улон сое одӥг хозяйствоысь мукетаз вуттылӥз, одӥг ёросысь — мукетаз. Котькыӵе вакытъёсы Геннадий Петровлы юрттӥзы валась кузпалыз Валентина Вениаминовна но Вера, Татьяна, Анна нылъёсыз.

2014-тӥ арын тулыс Грак ёрослэн йырыз Михаил Крестьянинов Геннадий Андроновичлы ӵектӥз «вуж» удысэз борды басьтӥськыны — «Конный завод» хозяйствоен кивалтыны.

Зэм, хозяйствоын югдур ӟеч ик ӧй вал, но визьмо кивалтӥсь сое пыд вылаз султытӥз. Ар куспын та предприятиын кыско 4 сюрс 672 килограмм йӧл — таӵееныз котькудӥз хозяйство ушъяськыны уз быгаты. Секытгес югдур валъёс ласянь, угось соослы кулэяськись ӧвӧл ни…

Геннадий Петров валъёстэк улыны уг быгаты. Соосты вешаны нуналлы быдэ кожалля. Валъёс пӧлын со ачиз но чылкак воштӥське кадь: синъёсыз шумпотонэн пачылало, мылкыдыз ӝутске, шуг-секытъёс вуно.

Николай Берёзкин, 

Грак черкогурт

Удмурт Дунне
By Удмурт Дунне 1 марта, 2016 11:18