Гурезь мында книга бугыръямын!

Удмурт Дунне
By Удмурт Дунне Март 4, 2016 08:44

2-тӥ тулыспалэ потэм номерамы радъямы вал «Кутскон сётӥсьёс» конкурс. Йырвизьзэс сынаны мылкыд карисьёс 20 пала люкаськизы.

  1. 20-тӥ даурлэн кутсконаз ик, 1901-тӥ арын (куд-ог тодосчиослэн верамзыя, 1902-тӥ арын), 4 егит удмурт дышетӥсьёс — И. Шкляев, И. Яковлев, Ф. Волков но С. Калимуллин — кылдытӥзы лушкем кружок. Ас азязы ужпум пуктӥзы: удмуртъёсты общественно-политической движение кысконо.
  2. 1920-тӥ арын Сарапулын ортчиз удмурт нылкышноослэн нырысетӥ конференцизы. Та конференцилэн тӧроез (председателез) вал Трофим Борисов.
  3. 1980-тӥ аръёслэн пумазы шаерамы вордӥськиз «Удмурт клуб». Сое кылдытӥз инженер Николай Симанов.
  4. «Удмурт Кенеш» огазеяськонэн бӧрсьысь бӧрсьы кивалтӥзы: 1991-тӥ-1993-тӥ аръёсы М. Шишкин, 1993-тӥ-1994-тӥ аръёсы Р. Яшина, 1994-тӥ-1996-тӥ аръёсы И. Гришкин, 1996-тӥ-1997-тӥ аръёсы В. Осипов, 1997-тӥ-2008-тӥ аръёсы В. Тубылов, 2008-тӥ-2012-тӥ аръёсы Н. Мусалимов, 2012-тӥ-2016-тӥ аръёсы И. Семёнов.
  5. Чупчи вылланьёслэн дӥськутсы возьматэмын паллянысен нырысетӥ нылкышно вылын.
  6. Текст басьтэмын В. Владыкинлэн но С. Виноградовлэн «Удмурт оскон» книгаысьтызы. Вераськон мынэ Вӧйдыр вакытэ ортчись сям-йылолъёс сярысь.

Вань юанъёслы тужгес ӝог но шонер валэктонъёс сётӥзы Эгра ёросысь Чутыр гуртысь Фаина Васильева,  Шаркан ёросысь Тюар гуртысь Нина Юферева но Дэри ёросысь Пероггуртысь Борис Боталов. Соосты возьмало «Удмурт Кенешлэн» синпель кузьымъёсыз — удмурт книгаос но бадӟым фин-угор календарь. Кузьымъёслы вазиськоно «Удмурт дунне» газетлэн редакцияз. Егитъёс пӧлысь нимысьтыз пусйыны чакламын на Удмурт кун университетысь студентэз Степан Черепановез но Пичи Пурга гимназиын дышетскись Игорь Елизаровез. Соосты но пичияк кузьым вите.

Пыр-поч валэктонъёс сётэменыз тужгес но паймытӥз Алнаш ёросысь Писэйгуртысь Кадрова Елизавета Леонидовна. Жаль, кӧня ке бергес кылиз. Аслаз электрон гожтэтаз со пусйиз: «Таӵе вожвылъяськонъёсты визез бичато, соку ик юанъёслы валэктон утчаны кутсконо. Таиз конкурсты, азьлоосыз сярысь, секытгес потӥз, гурезь мында книгаосты бугыръятэк ӧйлась, соин валче кӧня выль тодон шедьтӥськиз… Тау тӥледлы!»

Ми но тӥледлы тау шуиськом. Кин ӧз вормы, эн ӝожоме. Визьсынанъёс азьланяз но луозы на!

Елена Миннигараева

 

 

Удмурт Дунне
By Удмурт Дунне Март 4, 2016 08:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<