Бызьыло, чильпасько, гыро

Related Articles

• Коронавирусэн черламъёсты йӧнатыны шаерамы 3 сюрс 2 койка усьтэмын
• Пуштэм бервыл пумтэм…
• Маин юрттоно удмурт роклы

Удмурт Республикалэн Тӧроез сӥлы кариз 85 егитъёсты, пӧлысьтызы 68-эз Удмуртилэсь данзэ утизы Россиын ортчем ужрадъёсын.

Россиын предметъёсъя олимпиадаосы, спортъя ӵошатсконъёсы пыриськыса вормонъёс басьтэм пиналъёслы арлы быдэ сётӥське «Быгатӥсь егитъёс» премия. Удмуртиысь пиналъёс ӟеч тодон-валанъёссэс возьматӥзы технология, химия, искусство, информатика предметъёсын. Пӧлазы вал на егит экскурсоводъёс, инкуазен тунсыкъяськисьёс, нош тужгес трос — спортэн эшъяськисьёс.

Нимысьтыз пусъёно Пичи Пурга ёросысь Пугачёво школаысь Татьяна Вершининаез но Ижысь 30 номеро лицейысь Никита Николаевез. Та пиналъёс физкультурая но экологияя олимпиадаосын вань эшъёссэс кыдёке азьпалтӥзы. Кружокъёсы ветлӥсь пиналъёс но шаермес данъязы. Дэри школаысь 9-тӥ «Б» классын дышетскись Арина Кычанова 6-тӥ арзэ вологодской амалэн чильпаське. Солэн киужез калыккуспо конкурсын вормисе потӥз.

Пичи Пурга ёросысь Брангуртысь Марина Девятова удмурт кылъя но литературая элькун олимпиадаын кылем арын вормись луиз. Та вакытэ Удмурт кун университетысь Удмурт филологияя, финно-угроведениея но журналистикая институтын дышетске.

 

85 егитъёс пӧлысь 15-ез студентъёс вал. Ижысь медициная академиысь  Станислав Сергеев кылем ар понна «Россиысь студент» ним утӥз. Вормонъёсыныз шумпоттэ Якшур-Бӧдья ёросысь Альман гуртысь Егор Шишкин но. Та вакытэ со Ижысь 23 номеро училищеын тракторист-машинистэ дышетске. Кылем арын егит механизаторъёслэн Глазовын ортчем вожвылъяськоназы нырысетӥ инты басьтӥз. Табере шаермылэсь данзэ утьыны дасяське Россиысь ӵошатсконын.

Кин ке та нуналэ 60 сюрс манетлы узырмиз, кин ке — 30 сюрслы. Александр Соловьев шумпотыса шуиз: тӥляд та нырысетӥ вормонды, шаермес азьланяз но данъялэ, азинсконъёсты мед йылозы.

Валентина Емельянова