Быдӟым ожысь ветеранлы Фёдор Михайлович Михайловлы — 90 арес

Удмурт Дунне
By Удмурт Дунне 9 марта, 2016 09:52

Можга ёросысь Пычас черкогуртлэн гинэ ӧвӧл, быдэс Можга ёрослэн данъяськымон адямиез — Быдӟым ожысь ветеран Фёдор Михайлович Михайлов.

Удмуртилэн Тќроез А. Соловьев вордћськем нуналэныз њечкылаз Ф. Михайлов ветеранэз.

Удмуртилэн Тӧроез А. Соловьев вордӥськем нуналэныз ӟечкылаз Ф. Михайлов ветеранэз.

Та нуналъёсы солы тырмиз 90 арес. Аръёслы уг сётскы та воргорон: йӧно возиське, ымныраз котьку пальпотон шудэ. Сое ӟечкыланы, шуныт кыл вераны вуылӥз Удмурт Элькунлэн Тӧроез Александр Соловьев. Ветеранлы кузьым сётыса, Тӧро тунсыкъяськиз: кыӵе мылкыдыз-тазалыкез?

— Ма, котькыӵе дыръёсы луыло, — пальышаса вера Фёдор Михайлович. — Мылкыд ӟеч дыръя гурт калык сярысь тросгес тодэм потэ — кызьы уло, маин шокало. Нош куд-ог дыръя «скороез» но ӧтьытэк уг луы.

Фёдор Михайлов вордскемын Можга ёросысь Бальӟашур гуртын трос нылпиё удмурт семьяын. Пиналъёс пӧлысь самой бадӟымез бере, вань секытэз со вылэ усиз: юртъер котырын, колхоз бусыын уен-нуналэн тыршон, покчи вын-сузэръёссэ утялтон. Чырткем пияш котькытчы вутскыны тыршиз. Гурт ужез но быдэсъяз, Пычасысь 7 классъем школаез но йылпумъяз. Со вакытэ шерез быгатылӥз покчи классъёсты гинэ но пырпотыны.

Армие басьтӥзы сое 1943-тӥ арын ноябре. Ожмаськыны келязы Прибалтийской фронтэ. Война сярысь Фёдор Михайлович трос вераны уг яраты. Вакчияк гинэ шуэ: кызьы вунэтод со аръёсты, оломае но адӟиськиз. Тушмонэз жугыса, Фёдор Михайлович вуиз Калининградозь. Пусъемын Горд Кизили орденэн, «За взятие Кёнигсберга» медален. Инмар ӧз кушты: ож лудын бырыны ӧз шедьы. Но вордскем палъёсаз берытскиз ай 1950-тӥ арын гинэ.

— Гуртам вуи но, юртъёс куашкан калэ вуэмын, колхоз но мырдэм возиське, калык сютэм, нянь уг тырмы, — тодаз вае ветеран. — Ма, тросэз воргоронъёс кошкемын вал ук войнае. Вань поттэм-будэтэм емышсэс-няньзэс гуртоос келязы государстволы, сое ож бере пыд вылаз султытоно вал.  Басьтӥськоно луиз гуртэз ӝутон борды.

14 ар ӵоже со бергатӥз комбайнлэсь рульзэ, 7 арлэсь ятыр тыршиз трактористъёслэн бригадирзы луыса, бӧрысьгес басьтӥськиз гурт техникаез тупатъян борды. 1971-тӥ арын солы оскизы Пычас сельсоветэн кивалтыны. Та удысэз нуиз 8 ар ӵоже. Котьку тыршиз гуртоосызлы юрттыны, улонзэс капчиятыны.

— Гуртоос сярысь со мынэсьтым юалляськемысь уг дугдылы: сиён пӧракум, ӝӧк сьӧры пуксёз но, пельыз кылэ-а, уг-а — кутскоз ук юалляськыны, — шуэ Фёдор Михайловичез чаклась соцработник.

Нылпиосыз палэнын уло ке но, Фёдор Михайловичез эскерыны туж ӵем вуыло. Ветеранлэн юртаз шуныт, чылкыт но сайкыт. 90 аресэныз ӟечкыласа, Тӧро Александр Соловьев Фёдор Михайловичлы сётӥз Россилэн Президентэзлэсь ӟечкыланзэ. Ачиз Путин ӟечкыла, иське! Туж тау, мылкыдыз ӝутскиз ветеранлэн. Трос-а кулэ мӧйы муртлы…

Елена Никитина

Туспуктӥз А. Поздеев

 

 

 

Удмурт Дунне
By Удмурт Дунне 9 марта, 2016 09:52