Балезино ёросысь Шур гурт: Нимыз вань, ачиз ӧвӧл

Удмурт Дунне
By Удмурт Дунне 14 марта, 2016 14:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гуртлэсь кылдэмзэ тодэ на куасьмем ӧр гинэ…

Нюлэс пушкы, чугун сюрес дуре интыяськем Шур пыре Балезино ёросысь Вӧёгурт муниципал кылдытэтэ. 2 ульчаын — Песочной но Садовой —   29 юрт сылэ, улӥсез 50 котыр.

Шурзы ӧвӧл

Вӧёгуртлэсь Шур ог 8 иськемлы палэнэ пуксемын. Машинаен ширтыку, писпуос вискысь 1-2 корка сяна уг адскы. Но отчы кожиськод — юртъёс син азе культыр-культыр пуксё. Ваньмыз сямен — пулэсь. Куд-огез, аръёслы чидатэк, ланьырскемын, бушамын, лымыен согиськемын ни.

В. Владыкина Шурын 25 ар улэ ини.

 

В. Владыкина Шурын 25 ар улэ ини.

 

Йӧн-йӧн сылэ Владыкинъёслэн корказы. Гуртазы пырась-потасьёс шер луо бере, милесьтым машинамес адӟыса, кузё кышно укноысь укное паймыса ветлэ: кинъёс ай та вуиллям?! Валентина Анатольевна ӝогак ульчае потӥз.  «удмурт дуннеос» шуыса тодӥз но… ӝогак коркаяз пыриз: чебер дӥсяськыса, пе, дорады пото. Кышномурт гуртэз кадь ик шыпыт вылэм — Шурын улэм-вылэмзы сярысь либыт куараен, гань-гань вера:

— Ми дорын магазин, медпункт ӧвӧл бере, юрттэт курыса, сельсоветэ жингыръяно луиськомы. Соин ульчаысь мурт машинаез адӟиськомы ке, соку ик ураме бызьыса потӥськомы. Озьыен, милемлы мар ке но вайизы.

Владыкинъёс 3 кузя уло: Валентина Анатольевна, кузпалыз но пересь дедушсы. Юля нылзы Ижысь медакадемиын 6-тӥ курсын дышетске. Городын 2 арня улэ но, адскыны шуыса нош бертэ — туж зол мӧзмисько, пе.

Колчин фермерлэн юртъерез.

Колчин фермерлэн юртъерез.

— 3 аресозь нылы чылк-чылк удмурт сямен вераське вал, — тодаз вае кышномурт. — Собере дедушмы шуэ: ма, Валя, Пибаньшурын ӟучъёс уло, нылдэ отчы школае сётӥд ке, кызьы вераськоз?! Ӟуч ӵыжы-выжыосмы гужемлы куное вуизы вал на. Озьы ачим но валатэк кыли — нылы ӟучомиз.

Валентина Анатольевна Шурын ог 25 ар улэ ини. Вордӥськемын Кез палъёсын. Егит вакытаз сюрес вылысь уг ик пыралля вылэм. Озьы кузпал но аслыз шедьтэм. Картэз электромонтёр луыса чугун сюрес вылын кема аръёс ӵоже ужам. Али пенсиын шутэтске.

Туннэ кышномурт ужа Пибаньшурысь школаын — выж миське. Талэсь азьвыл бускель гуртъёсысь библиотекаын, культура юртын тыршем. Ярам, автобус Шур вӧзтӥ ӵем ортчылэ — Пибаньшуре мынон-ветлон ласянь шуг-секытъёс уг кылдыло, пе.

— Ульчаын пеймыт кариське гинэ — гуртамы чус-чус луэ, — шуэ Валентина Анатольевна. — Поезд куара гинэ куддыр со шыпытэз тӥя. Ваньмы мӧйыос улӥськом бере, вазь кӧлыны выдӥськом. Тани соседкае — Тамара Обухова. Вордӥськемын татын. Но 43 ар улэмын Ижын, ужамын радиозаводын. Ог 2 ар талэсь азьло выльысен Шуре берытскиз. Али тани вынзэ чакласа возе — соизлэн тазалыкез лябгес…

Гуртэ васькиз акшан.

Гуртэ васькиз акшан.

— Шуръёсты татын ӧвӧл кадь. Нош гурттэс Шур шуиллям, — тунсыкъяськиськом.

— Гуртмылэн кылдэмез сярысь рос-прос вераны уг тодӥськы. Но кылэме вань: азьло аръёсы чугун сюрес сьӧрын Разъездшур нимын гурт вылэм. Тӥни со бордысен ик милесьтымзэ но Шур шуиллям — гуртамы одӥг

Ульча выл пуныос.

шур но ӧвӧл ке но. Ву колодчаысь нуллӥськомы, — валэктэ нылкышно.

Вӧёгурт муниципал кылдытэтлэн йырыз Надежда Лекомцева но пусъе, ёросамы, пе, шур кылэн трос гинэ гурт нимъёсмы — Ушур, Пибаньшур, Андрейшур, Ӟат-чашур, Бадӟымшур, Люкшур…

Выжзы вань

Шурысь пу коркаос пӧлысь соку ик син шоры йӧтэ кирпичлэсь ӝутэм одӥг гинэ юрт — трос укноё, вӧл-вӧл. Валентина Анатольевна валэктыны дыртэ: Колчинъёслэн семьязы отын улэ. Ужбергатӥсь Александр Генрихович Шурын пудо котырын берга, ю тысь будэтэ. Хозяйствозэ пиеныз ӵош валтэ. Скалъёсыз, шуо, ёросысь фермеръёс пӧлын тужгес трос. Огвакытэ Колчинъёс парсь вордон борды но басьтӥськылӥзы вал.

— Туннэ скал гинэ вордӥськомы на — ог 160 йыр. Парсьёсын ум выриське ни, — вера Александр Генрихович. — 2001-тӥ арын выль корка пуктӥ. Вуоно араз гурт удыс борды басьтӥськи. Шурын вордӥськи бере, татчы ик выжыме лэземе потӥз. Ярам, бордам юрттӥсьёсы вань — кузпалы но пие.

Александр Генриховичлэн нылыз но вань на. Но Шуре вуылыкумы, соин адӟиськыны ӧз кылды — дуннеез котыръямысь, пе, уг дугдылы.

Цивилизация - телефон.

 Цивилизация — телефон. 

— Нылы Москваын улэ, — данъяськыса кадь вера кузё. — Отын мугорез шонер куасаллянлы — йогалы — дышетскиз. Быръем удысэз сюлэмызъя луиз, шӧдске. Табере калыкез ачиз визьнодаса ветлэ, тодон-валанъёссэ муромытэ. Алигес вуылӥз Таиландэ, Вьетнаме…

Нош Александр Генриховичлы Шурез кадь шулдыр инты нокытын ӧвӧл кадь потэ. Туннэ гурт вӧзтӥзы шур уг визыла. Но вашкала дыръёсы со одно ик жильыртӥз, луоз, пусъе воргорон. Угось музъемез портыса ик ортчем шур ӧрлэн бервылыз туннэ но вань на. Со нюк вамен гуртоос выж вылтӥ пото.

Ольга Корепанова

Удмурт Дунне
By Удмурт Дунне 14 марта, 2016 14:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<