Ася Корепанова анаеныз ӵош шудоз

Related Articles

• Дунъяло ортчемзэ, данъяло туалазэ. «Ӟеч-а, бур-а, Аксакшур!» книга потӥз. 0 23.Июн
• Пичи Пурга ёросысь Баграш-Бигра но Орлой гуртъёсын 0 02.Окт
• Фин-угор конференциын удмурт реп сярысь доклад. Мар? 0 26.Май

Ася Корепанова вордӥськиз Ижын.

27-тӥ южтолэзе Ижысь крезьгуръя колледжын паймымон концерт ортчиз. Одӥг сцена вылэ потазы шаерысьтымы тодмо пианисткаос Удмуртиысь дано артистка Ася Корепанова но анаез Сорейя Батыршина.

Удмуртиысь Культурая но туризмъя министерство ивортэмъя, таӵе концерт сярысь егитъёслэн «Триумф» но мукет калыккуспо конкурсъёслэн лауреатсы Ася Корепанова кемалась малпаське ни вылэм.  Таяз радэ но со  ачиз мылкыд кариз но ӵектӥз Ижын концерт пуктыны.  Кӧня ке ар талэсь азьло. П. Чайковскийлы сӥзем крезьгуро фестивале пыриськыкуз, егит усточи шуиз вал: ӵапак семьяез солы крезьгур дуннее сюрес усьтӥз.

— Пичи дырысеным монэ котыртэ классика крезьгур. Атае Сергей  Корепанов — композитор, анае Сорейя Батыршина — фортепианоен шудыны дышетӥсь. Соос ик пыӵатӥзы мыным крезьгурез шӧдон, классикаез яратон, — шуиз А. Корепанова.

Ася Корепанова вордӥськиз Ижын. Дышетскиз Москваысь консерваториын, озьы ик йылпумъяз Санкт-Петербургысь консерваториысь фортепианоя факультетэз. Та вакытэ быдтэ ини Майамиысь крезьгуръя школаез. Егит усточилэн  Москваын но, Санкт-Петербургын но умой дышетӥсьёсыз вал, но валтӥсез визьнодасез  — анаез. Сорейя Батыршина верамъя, крезьгурлэсь  пуштроссэ валаменыз  но сое учкисьёс доры вуттыны быгатэменыз ик  Ася висъяське мукет егит усточиослэсь.

Туннэ нуналлы А. Корепанова Россиын но, США-ын но улэ, озьы ке но туж яратэ вордӥськем Ижзэ но луонлык кылдэ ке, бертаны тырше: фестивальёсы пыриськыны, концерт пуктыны, мастер-класс ортчытыны. Сорейя Батыршина, нылызлэсь концертъёссэ радъям сяна, али но пиналъёсты  крезьгурлы дышетэ. Валче концертазы соос быдэстозы С. Рахманиновлэсь но Г. Брамслэсь произведениоссэс.

Галина Семёнова

Туспуктӥз Ася Корепанова