«Артек» нылпи лагерь уг пытсаськылы толалтэ но

Удмурт Дунне
By Удмурт Дунне Март 21, 2016 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Крымысь «Артек» лагерь ужа тол но, гужем но. Кылем арын ноябре отын дунтэк шутэтскизы Удмуртиысь 15 пиналъёс. Шуд пуйыос пӧлын вал Ижысь Кузебай Герд гимназиысь 5-тӥ классын дышетскись Денис Мишкин но.

Мишкин 4

Денис Мишкин (3-тӥез) шутэтскиз «Артек» лагерьын.

Денис «4»-лы но «5»-лы дышетске, капчи атлетикая ӵошатсконъёсы пыриськылэ, гимназиысь «Крезь куара» фольклор ансамбльын кырӟа-эктэ, картон бумагалэсь пӧртэм шудонъёс дася.

— Дипломъёсыз, грамотаосыз трос-трос люкаськемын, — вера пияшлэн анаез Елена Петровна. — «Артекысь» 18-тӥ смена Россиын улӥсь пичи калыкъёслы сӥземын вал. Озьы 15 пинал пӧлысь 4-ез К. Герд нимо гимназиысь вал.

Зэм, Денис Сьӧд зарезьын ӧз пыласькы — ульчаын шуркынмон толэзь вал.

— «Артекын» нырысь нуналъёсаз пие туж мӧзмиз, — вера анай. — Ӵем жингыръяз, гожъялляз. Классысьтызы 3 мурт одӥг отрядэ шедем, нош Денис — мукетаз. Ярам, ас ёзъёсыныз кусып капчиен тупатэм. Берло нуналъёсаз соин телефон пыр вераськыны ик уг луы вал ини: я, шуэ, мыным ӵошатсконъёсы мыноно, я кыӵе ке концерт соослэн, я шулдыръяськон…

«Артек» интыяськемын Гурзуф каргуртысь Аю-Даг (Гондыр) гурезь дорын. Лагерьёсыз 10 котыр: «Лазурный», «Янтарный», «Хрустальный»… Удмуртиысь пиналъёс шедизы «Морскояз». Лагерьзы бадӟым: 20 отряд, котькуд отрядын — 20-лэсь ятыр пинал.

— Нылпиос куспын валамтэос, керетонъёс чик ӧй вал, — вера Денис. — Пинь миськон пастаен зыраськыса но ӧм ветлэ. Угось комнатаосамы уйин 12 котырын гинэ вуиськомы вал. Катьтэммыса соку ик умме усьылӥмы. Отысь школаын дышетскем сяна, резь-куаж дасяськылӥмы пӧртэм ужрадъёслы.

Школазылы нылпиос кушем ним сётӥллям — Хогвартс. Великобританиысь пинал магъёслэн Хогвартс школаязы выллем ик, пе, «Артекысь» дышетӥсьёс нылпиосты мудрон сямен дышето.

— Школа сылэ гурезь йылын. Милемыз нырысь-валысь туж шугъяськытӥз отчы тубон сюрес, — серекъяса маде пияш. — Кипарисъёсын, кедръёсын узыр гурезе йыромыны кема ӧвӧл вылэм. Ма, чильк-вальк школаын но йыр берытске — сомында классъёс, пиналъёс!

Удмурт нылпиос зарезь дурын асьсэды котыр ласянь ӟеч возьматӥзы. Кылсярысь, Денислэн классэз отысь лагерьёс пӧлын тужгес устоез луиз. Та сяна, «Инкуазь но пуш дунне» конкурсын Мишкин нырысетӥ инты басьтэм.

— Инкуазьлы сӥзем кружокмы вал. Зарезь ярдуртӥ поръяллямы, тунсыко изъёсты, ньӧръёсты, ӵыжинъёсты бичаса. Соослэсь ик шудон лэсьтӥ. Дунъясьёслы кельшем — дипломен бертӥ, — шуэ пияш.

Денислэн сюлэмаз тужгес юн кылиллям ӝыт тылпу котырын шудонъёс, кырӟанъёс. Киоссэ выллань карыса ик, со вера: со-о-о быдӟа, пе, тылпу вал — отысь 1 пичи эгырзэ Иже но вайи. Туала эктонъёслы, пӧртэм калыкъёслэн кырӟан-веранъёссылы сӥзем ужрадъёс али но пияшлэн йыраз на.

— Котькуд нунал сямен экскурсиосы поталлямы, — шуэ Денис. — Севастополе, Ялтае ветлӥм. Та сяна, «Артеклэн» аслаз 5 музеез вань. Тужгес кельшиз «Космос». Отчы ачиз Юрий Гагарин вуылэм. Инэз эскерон тӥрлыкъёссы макем тунсыкоесь!

Анай-атайёс нылпиоссы пумысен ӧз сюлмаське. Лагерьлэн вань нимысьтыз ёзэз — нылъёсты-пиосты кышкытлыклэсь рос-прос утё. Ӵапак со вакытэ Крымын тыл кысылӥз. Та сярысь пиналъёс ӧз ик тодылэ — «Артекын» юг-юг улӥз. Дӥсь но сётӥзы: шуныт куртка, изьы, дэрем, футболка. Кӧттырон но — кылдэ ньылод!

— Улон интымы зарезь дурын ик вал. Зол тӧласькылыку, инкуазез комнатаысьтымы котырес укно пыр гинэ учкылӥмы. Тулкымъёс ми дорозь ик вуозы кожаськомы вал ини. Нош огполаз тӧл сыӵе шуэръяськиз — ярдурысь пластмассалэсь дасям кыллён интыос зарезьын уязы, — паймемзэ уг ваты Мишкин.

Туннэ Денис анай-атаезлы шуэ: зарезь дуре мыныны кылдӥз ке, быръёз «Артекез» гинэ. Гужемлы али ик калленэн дасяське ини — уксё люка. Атаеныз ӵош арнялы огпол ветлэ Ижысь визез сынанъя «Мар? Кытын? Ку?» шудонэ. Озьы ӝыт куспын ог 200 манет поттэ.

Ольга Корепанова

 

 

Удмурт Дунне
By Удмурт Дунне Март 21, 2016 12:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<