Сьӧлта ёросысь Мадьяр гурт: Улонзы майбыр

Удмурт Дунне
By Удмурт Дунне 14 марта, 2016 16:08

Сьӧлта ёросысь Мадьяр гурт пырак райцентрен артэ интыяськемын. Со Иж палась лыктыку  черкогуртэ  мынон сюрес вылын сылэ.

Куинь борды одӥг

Гуртлэн улэм-вылэменыз тодматӥз Кильмезь муниципал кылдытэтысь секретарь Валентина Кунгурова:

— Мадьяръёс райцентрлы матын уло бере, егитъёс уг кошко, отчы ик пуктӥсько, пинал ваё. Ма, мар али гуртын улонтэмез? Газ вань, ву корка пыртылэмын. Вазен соослэн асьсэлэн клубзы но, нылпи садзы но, медпунктсы но вал. Бӧрысь соос быризы. Табере мадьяръёс котьмарлы ик Сьӧлта черкогуртэ ветло. Гуртын та вакытэ 200-лэсь ятыр улӥсез. Куинь ульчазы ке вал, али эшшо вылез  кылдэ на. Табере татчы сьӧлтаос но пуктӥсько. Ульчаосазы жиль-жиль нылпиос бызьыло. Гуртын староста луэ Виталий Леушин.

Гуртын кык магазин — одӥгез райполэн, мукетыз — ужбергатӥсьлэн. Кыкез ик соос бадӟым сюреслэн мыд-мыд палаз пуктэмын. Гурт калык отысь гинэ уг басьяськы, мукет вуз карисьёс но машинаосын ӵем гинэ, пе, кожыло.

З. Тураева котькыџе улонэз адӟиз.

З. Тураева котькыӵе улонэз адӟиз.

Машинаысь васькеме бере Валентина Воробьёваен пумиськи.

— Мон та гуртысь нокытчы ӧй кошкылы, — шуэ Валентина Петровна. — Весяксэ ик колхозын ужай.

Нылкышно, кезьытлэсь пегӟыса кадь, магазинэ пыриз, мон гуртэн тодматскыны азьлань вамыштӥ.

— Кудды ке «Удмурт дунне» газетэз басьтӥськоды-а? — юасько ульчаетӥ ортчись арлыдо нылкышноослэсь.

— Ум калтӥське, почтамы милям Сьӧлта черкогуртын, гожтӥськон понна отчы мыныны кулэ ук. Вазен чисто, ятэ, «Советской Удмуртиез» басьтӥськом вал. Табере вань на-а меда сое но лыдӟись?

— Мар тон вераськиськод, Зина, солэн кемалась нимыз «Удмурт дунне» ини, — итӥське вӧзаз сылӥсь кышномурт.

— Обидно, ятэ, обидно, котьмар ужез лэсьтӥськиз, всяко улонэз улӥськиз, нош синъёс, шуко уга, воксё адӟемысь дугдӥзы ини, — вера Зинаида Тураева. — Кызьы мон али лыдӟиськом на?

— Нош гурттэс малы меда Мадьяр нималлям? — мукет юан вылэ выжисько.

— Кин тодэ на сое, олокызьы кылдэм. Куке-соку Мадьяр нимо воргорон-ло улыны татчы интыяськем.

— Вазен Мадьяр гурт Ленин нимо колхозэ пырыӥз, — гурт сярысь вера шаертодонэн тунсыкъяськись Пётр Коробов. — Соин кивалтӥз визьмо но ас удыссэ ӟеч валась воргорон Николай Соловьёв. Узыр вал колхоззы, арысь аре со азьмынӥсьёс радын ветлӥз. Юнме шат писатель Генрих Перевощиков «Йыбыртты музъемлы» книгазэ быдэсак со хозяйствоын тыршисьёслы сӥзиз. Берло аръёссэ одӥг гурт гинэ нимаз кариськиз но «Нива» колхоз кылдытӥз. Соин кивалтэ Пётр Базилевских. Али но мадьяръёс быгатыса ужало, гурт калыксэс ужтэк уг возё.

— Ленин нимо колхозэз верано ке, Совето вакытэ со республикаысьтымы одӥгез кужмоез хозяйство лыдъяськылӥз, — вера Пётр Ильич. — Етӥн но, ю-нянь но будэтӥзы, пудо но олокӧня гидъёсын куайытӥзы, скал но кыскизы. Со хозяйство ваньмызлы  адӟем карымон вал. Перестройка кутскемен, тросэз воштӥськиз, улонзы кир-пазь луиз. Туэ тани, 15-тӥ оштолэзе, «Нива» колхозмылы 15 ар тырмоз ини. Быгатэммыя ужаськом, пыд йыламы сылӥськом: ветыл вордӥськом, скал кыскиськом, ю тысь будэтӥськом. хозяйствоямы ваньмыз-ӧвӧлэз 370 йыр пудо-животмы. Соос пӧлысь 150-эз скалъёс. Музъеммы бадӟым ик ӧвӧл, 1 сюрс гектар гинэ. Но ми артысь гуртъёсысь бушам музъемъёсты арендовать кариськом. Кылем арын юмы удалтӥз, ёросамы котькинлэсь трос — 20 центнер —  басьтӥмы. Азьло аръёсын ӵошатыса, та лыдпус бен ушъяськымон ик ӧвӧл. Куке-соку, ӟеч улон дыръя, 30 центнер но басьтылэммы вань. Ужасьёсмы туж ик трос ӧвӧл, фермаын но лудъёсын 40 адями тырше. Гужемзэ бен тросгес ик луэ — 50 котыр люкаське. гуртмы бадӟым ке но, райцентрлы матын улӥськом бере, тросэз отчы ужаны ветло.

Мадьяре вуттӥсь сюрес.

Мадьяре вуттӥсь сюрес.

 

Городын номыр карыны

Лесная ульчаысь одӥгаз бадӟым, чебер но улыно-вылыно корка пала кожоно кариськи. Адӟиське, со йылаз-пумаз вуттэмын ӧвӧл на — лэсьтӥськон арбериос ваньмыз син азьын. Пумитам егит воргорон сюриз —  ӵапак юртлэн кузёез вылэм, ассэ Владимир Батуев шуиз. Владимир Фёдорович Иткул гуртын вордскем. гуртэныз данъяське. Отын, пе, вордскемын тодосчи Анна Зуева-Измайлова. Но неперспективной шуыса, гуртсэс быдтӥлям. Соку тросэз иткулъёс Сьӧлта черкогуртэ но со котырысь гуртъёсы улыны выжиллям. 1979-тӥ арын Батуевъёс но гуртысьтызы кошкиллям, Мадьяре интыяськиллям.

— Тани весь лэсьтӥськон ужен вырисько на ай, — шуэ воргорон. — Гуртын улӥсьлэн со озьы ини: огзэ лэсьтӥськод кадь, мукетыз борды кутсконо луэ. Семья бадӟым бере, улон интыез но бадӟымгес карем потэ.

Батуевъёслэн семьязы.

Батуевъёслэн семьязы.

Владимир Фёдорович Надежда кузпалэныз 6 пинал будэто. Бадӟымез, Никита пизы, быдэ вуэмын ини, со Санкт-Петербургын лэсьтӥськон удысын ужа. Наталья, Удмурт кун университетэз йылпумъяса, Югдон шор ёзо школаын покчи классъёсы ветлӥсь нылпиосты технологилы дышетэ, озьы ик со библиотекарьлэсь но вожатойлэсь ужзэс быдэсъя.

Батуевъёс корка лэсьто.

Батуевъёс корка лэсьто.

Ксюша нылзы, Наташа апаез сямен ик, тодон-валан люка Удмурт кун университетын. Со но дышетӥсь луоз. Нылаш но, дышетсконзэ йылпумъяса, улыны гуртэ ик бертыны малпа, городын номыр карыны, шуэ.

Покчиосыз Батуев сузэр-вынъёс — Вика, Маша но Сергей — школаын дышетско на, 5-тӥ, 7-тӥ но 10-тӥ классъёсын. Жаляса верано, Батуевъёс ваньзы ӟуч кылын верасько, озьы капчигес, шуо.

 

Любовь Тихонова

Удмурт Дунне
By Удмурт Дунне 14 марта, 2016 16:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<