22-тӥ тол шудонъёс: Эграос — 12-тӥ ползэ чемпионъёс

Удмурт Дунне
By Удмурт Дунне Март 14, 2016 11:47

сельские игрыВормонэ нуись дарт

Эгра каргуртын ортчизы гурт спортсменъёслэн 22-тӥ тол шудонъёссы. Медаль понна нюръяськонэ 900 мурт пыриськиз. Тужгес бадӟым командаос вал Эгра, Дэри но Ува ёросъёсысь. Ӵапак соос ик вормисе но потӥзы.

 Вырйылысь вуюись

Эграос тол шудонъёслы кутскон сётӥсьёс луо: 1994-тӥ арын шудонъёсты нырысьсэ радъязы ёрослэн дась лэсьтэм спортплощадкаосаз, куас базаяз. Со дырысен уно аръёс ортчизы, табере куно пумитась ёрослы бадӟым кузьым — куас база яке стадион — лэсьто. Эгра ёросысь спортсменъёслы сое 22 ар витёно луиз. Та вие кыкез ик базаос ужало. Кызьы ивортӥз ёрос администрациысь мугорез кыдатон культурая но спортъя управлениен кивалтӥсь Николай Мерзляков, соин валче спортэн эшъяськисьёслэн лыдзы данаклы йылыны кулэ.

10 иськем сюрес вылэ потӥзы воргоронъёс.

10 иськем сюрес вылэ потӥзы воргоронъёс.

Выль пуктэм база Иж-Глазов сюрес вылын сылэ, вуюись выллем кыдёке ворекъя. Та юртын, куас дасян, дӥськут воштон, мисьтӥськон интыосыз сяна, тренажёр залэз вань. Тросэз адямиос уж бере куасэн бызьыло, базаысь сюресъёслэн оглюкетсы югдытӥське.

— Та вакытэ шаерамы 3 сюрс интыын спортэн вырыны луэ. Выль усьтэм базаос но спортплощадкаос кужмо спортсменъёсыз будэтыны юртто, — шуиз Удмурт Республикалэн Тӧроез Александр Соловьев Эгра ёросысь «Радуга» базаез усьтон дыръя. — Оскисько, Эгра ёросысь пиналъёс но спортын выль вормонъёс басьтозы, Олимпиадаозь ӝутскыны быгатозы но ошмесо шаермес быдэс дуннелы данъялозы.

Вал интыын - атай.

Вал интыын — атай.

Гуртысь спортсменъёс пӧлын Эгра ёрос одӥгез кужмоез лыдъяське, гурт шудонъёсын со 11 пол чемпион вал ни. Гурт удысын тыршисьёс но спортсменъёссылэсь бере уг кылё. Кылем арын ёросысь пудо утисьёс котькуд скаллэсь нуналлы быдэ 18,1 килограмм йӧл кыскизы. Шарканъёс бере эграос та лыдпусъя 2-тӥ интыын. Озьы тӥни, кин ке гуртэз ӝутэ, кин ке ёроссэ выль вормонъёсыныз данъя.

Эгра каргурт 4 нунал ӵоже яркыт буёлъёсын ворекъяз. Гурт шудонъёслэн мынэмзы сярысь валаны луиз ни, каргуртэ пырыку ик. Сюрес кузя сылӥсь юбоосы ӧтёнъёс, плакатъёс юнматэмын, ӝытъёсы ульчаосты югдытӥзы юри ошылэм лымы пырыос (снежинкаос). Куноосты шумпоттӥз Гурт шудонъёслэн утисьсы — Гондырпи. Сое суредам дизайнер Андрей Прокошев. Эграослэн Гондырпизы конькиен но куасэн нискылаз, баскетболэн шудӥз, ыбылӥськиз.

Кивалтӥсьёс пӧлысь тужгес шаплыез - Дэри ёросысь Борис Хабибзянович Зиятдинов.

Кивалтӥсьёс пӧлысь тужгес шаплыез — Дэри ёросысь Борис Хабибзянович Зиятдинов.

Ялан огъёсыз

Гурт шудонъёс толалтэ но гужем ортчо бере, Ува, Шаркан, Дэри но Эгра ёросъёсын та ӵошатсконъёслы нимысьтыз командаос возьыны тыршо. Мукетъёсаз гурт спортсменъёссы котыр ласянь профессионалъёс выллемесь. Куд-ог кивалтӥсьёслэн амалзы луысал ке, оло, одӥг муртэ вань ӵошатсконъёсы пуктысалзы. Но соосты валаны луэ: пичи ёросъёсын спортсменъёсты люканы туж секыт. Соин ик Гурт шудонъёс возисько, шуысал, спорт понна висисьёс вылын.

Тол но гужем ӵошатсконъёсы тросгес пырисько полиатлонистъёс. Куд-ог куасэн бызьылӥсь спортсменъёс гужемзэ гира ӝутканэ выжо. Арлы быдэ та шудонъёсы пырисько шаерысьтымы нимо-дано спортсменъёс. Эграын ортчем шудонъёс дыръя куас сюресъёс вылын кужымзэс эскеризы 2012-тӥ арын Лондонын ортчем гужем Олимпиадае пыриськем спортсмен Елена Наговицына, шаерысьтымы одӥгез кужмо биатлонист Валентина Назарова (Телицина). Тросэз куасэн бызьылӥсьёс Удмуртилэсь данзэ утё Россиысь ӵошатсконъёсын: Дина Некрасова, Анастасия Осипова, Григорий Хохряков, Роман Широбоков но мукетъёсыз.

Люконтэм эшъёс — кужым но визь

Куд-огез, оло, шуоз но, спортэн эшъяськон понна трос визь кулэ ӧвӧл, ӟигарыд вань ке — бызь. Улонын озьы гинэ уг луы. Спортын вормонъёс басьтон понна нырысь ик йыр ужаны кулэ. Арысь аре ас вылазы сое шӧдо шахматэн но шашкиен шудӥсьёс. Кечато пул сьӧрын 2 нунал ӵоже султылытэк пукыны ваньмыз уз чидалэ, дыр.

Эшшо но чидасьгес луыны кулэ полиатлонистъёс. Ӵошатсконъёс дыръя соос ыбылӥсько, суй кужымзэс эскеро но куасэн бызьыло. Ува ёросысь пичи мугоро Жанна Кудрявцева шоры учкыса, уд но малпа, кужмо спортсмен шуыса. Азьвыл аръёсы сямен ик, туэ но со ваньзэс паймытӥз. Суй кужымзэ эскеронын котькинлэсь трос — 109 пол! — ӝутӥськиз. Озьы ик 100 лыдпусэз ортчизы Кез ёросысь Лилия Лекомцева но Яр ёросысь Любовь Васильева.

Шудо Эграысь но Воткаысь воргоронъёс.

Шудо Эграысь но Воткаысь воргоронъёс.

Арысь аре ас быгатонлыкъёсыныз паймытъяло тужгес арлыдо спортсменъёс. Нылкышно полиатлонистъёс пӧлын Яр ёросысь 64 аресъем Светлана Ракова суй кужымзэ эскеронын троссэ егитъёсты азьпалтӥз но 40 арессэс ортчем спортсменъёс пӧлын огъя зачётын 9-тӥ интые ӝутӥськыны быгатӥз. Вормисьёс дорозь ӧжытаклы гинэ сузьтӥськыны ӧз кылды Глазов ёросысь 72 аресъем Пётр Арафаиловлы. Полиатлонистъёслэн ӵошатсконазы со огъя 4-тӥ инты басьтӥз. Турникын ӝуткаськемезлы уноез пиос синмаськизы. Угось троссэ со пыд улаз лёгаз, шуыны луоз: 39 пол ӝутӥськиз. Вань воргорон полиатлонистъёс пӧлысь, соос 57 кузя вал, 18 мурт гинэ Пётр Арафаиловлэсь тросгес ӝутӥськыны быгатӥз.

Пичи ке но, шӧртчи

Гурт шудонъёсын ялан маке выльзэ пыӵатыны тыршо. Кылем толалтэ семьяос понна нырысьсэ пыртэмын вал комбинированной эстафета. Ма со сыӵе? Нырысь ик стартэ пото нылпиос. Хоккейын сямен, пиналъёс шарез питыртыса нуо но сое капкае 5 метр кемысен пырто. Кырыж «ыбылӥсьёслы» 3 луонлык сётӥське. Отӥяз эстафетаез сёто анайёслы. Соос вуэн тырмытэм ведраосты карнанэн нуо 40 метр кеме. Пальккам ву понна штраф (мултэс секундъёс) ватсало. 3-тӥ этап — атайёслэн, соос семьязэс бадӟым дӧдьыен нуо. Вань спортсменъёс одно ик бызьыло гын сапеген.

50 арес но солэсь ятыр, 3 иськем: Валентина Чиркова (Эгра), Юлия Рудина (Яр) но Алевтина Бехтерева (Дэри).

50 арес но солэсь ятыр, 3 иськем: Валентина Чиркова (Эгра), Юлия Рудина (Яр) но Алевтина Бехтерева (Дэри).

Толло нуналаз стадионын Гурт шудонъёсыз сӥё-дано усьтон ужрад ортчиз бере, бызьылон инты  волятэмын вал. Тросэз пиналъёс гылӟыса усьылӥзы. Озьы ке но финише семьяос ӝутскем мылкыдын вуизы.

Таяз учыре тужгес пичи пиналэн семья Сьӧлта ёросысь вуэмын вал. Светлана Сергеевна но Михаил Петрович Волковъёс 3 пинал будэто: 9 аресъем Илья, 8 аресъем Настя но 1 аресъем Захар. Гурт шудонъёсы соос нырысьсэ лыктӥллям. Пичи Ильяез нокыӵе сюлмаськонъёс ӧз кышкатэ, ас ужзэ ӟеч быдэстӥз. Пи нылпиен 12 семья пӧлын Волковъёс 4-тӥ интыозь ӝутскыны быгатӥзы.

— Вормон дорозь но сузьтӥськыны луысал, ми кузпалыным семьямес бере кельтӥмы, — сюлэмшугъяськонзэ уг ваты Михаил Волков. — Дартс шудонын одно ик 20 очкое йӧттоно, пимы милесьтым тросгес очко люказ, нош ми кырыж ыбылӥмы. Эстафетаосын бызьылон ваньмылы кельшиз.

Михаил Волков ужа Сьӧлта черкогуртысь тылпу кысонъя частьын. Ӵемысь пыриськылэ ас удысазы ортчылӥсь ӵошатсконъёсы, 2015-тӥ ар понна шаерысьтымы устоез тылпу кысӥсь луиз. Волковъёс пу медаль басьтэмзылы уг куректо, вуоно арлы ӟечгес, пе, дасяськом. Пичи Ильялы кемалы вунонтэм кылёз фейерверкез адӟемез.

тужгес арлыдоез куасэн бызьылӥсь - Кизнер ёросысь Глафира Ивановалы 61 арес ни...

Тужгес арлыдоез куасэн бызьылӥсь. Кизнер ёросысь Глафира Ивановалы 61 арес.

 Ӝамдэлы Эграе пегазы

Ӟырдыт нюръяськон пуромиз командаен шудӥсьёс куспын. Воргоронъёслэн баскетболъя финалзы февраль толэзе ик Ижысь гурт хозяйствоя академилэн спортзалаз ортчиз ке, нылъёс Эгралан вожвылъяськизы. Таяз учыре паймытӥз Пичи Пурга ёросысь команда — чемпион луиз. Ува ёросысь нылъёс кылем арын чемпионъёс вал, таяз учыре 2-тӥ луизы. Ӧзгес удалты алнашъёслы, котькуд шудонын 1-2 очко келязы. Баскетболэн шудӥсь нылъёс пӧлын 3-тӥ интые потӥзы эграос.

Тужгес трос калык люкаськиз хоккей коробка котыре. Соку ик шӧдӥськиз, Эграын хоккеез гажало шуыса. Гурт шудонэз радъясьёсты кышкатӥз вал тулыс шуныт куазь. Ӵошатсконэз ортчытоно луизы бер ӝыт но вазь ӵукна. Тужгес ӟырдыт нюръяськон пуромиз шудонлэн берпуметӥ нуналаз. Одӥг пол но ӧз келялэ Вотка ёросысь хоккеистъёс. Азвесь понна нюръяськизы Дэри но Эгра ёросъёсысь воргоронъёс.

— Гуртысь нуналлы быдэ жингыръязы, кызьы шудэммы сярысь юалляськыса, нош финалын ку но кинэн шудэммес тодэмзы бере куд-ог висисьёсмы, ужысьтызы куриськыса яке обедлы шуыса, Эграе ӝамдэлы вуылӥзы, — шумпотэмзэ уг ваты Дэри ёросысь Хохряки гуртысь хоккеистъёслэн тренерзы Марат Бикмансуров. — Таӵе висисьёслы луыса возьыт вал келяны. Эграысь хоккеистъёс пумитъяськыны выризы ке но, командамы 2-тӥ интые потӥз.

Тужгес пичиез спортсмен Илья Волков но солэн анай атаез, Сьӧлта ёрос.

Тужгес пичиез спортсмен Илья Волков но солэн анай-атаез, Сьӧлта ёрос.

Гурт шудонъёсын хоккей тужгес кышкытэз луэ. Воргоронъёс ог-огзэс уг жаляло, тросэз вӧсь луыны шедё. Азьвыл аръёсы та ӵошатсконъёсын вормисьёс пӧлы шедьылӥз Глазов ёросысь команда. Таяз учыре сое ӵошатсконлэсь палэнтӥзы, укыр тросэз спортсменъёссы городысь вылӥллям.

 Чигем бодыен вормон 

Шудонъёслэн берпуметӥ нуналазы котьку но эстафетаос ортчо. Куас сюрес вылын бызьылон ик возьматэ ёрослэсь тол ӵошатсконъёслы дасяськемзэ. Нырысь ик стартэ пото семьяос. Атайёс 3 иськем, анайёс — 2, нылпиос 1 иськемез ортчо. Пичи Пурга ёросысь Филимоновъёслэн семьязы куас сюресэз укыр ӝог ортчиз, финишын сылӥсь судьяос ик «кӧлэме» кылё ни вал. Семьязы, ёроссы понна очко люкан — анай-атайёс понна бадӟым сюлмаськон. Одӥгез атай ас этапаз уродмиз, ярано коть, сюрес кузя сылӥсь учкисьёс спортсменлы нырысетӥ юрттэт сётӥзы, отӥяз эмъясьёс но вуизы.

Нылкышно эстафетаын но паймымон учыртэк ӧз ортчы. Огдыре 25 команда стартэ потэ, сыӵе дыръя ӵемысь усьылон но куас боды тӥяськон учыръёс луо. Шаркан ёрос понна нырысетӥ этапын бызиз Ольга Батаногова. 3 иськем сюреслэсь ӝынызэ пал бодыен ортчем. Соин валче эшъёсызлэсь кыдёке кылиз.

Берпуметӥ этапсэ тӧлпери кадь ортчиз Дина Некрасова. Шаркан нылъёслы со юрттӥз 3-тӥ интыозь ӝутскыны. 1-тӥ но 2-тӥ интые потӥзы Ува но Эгра ёросъёсысь командаос.

Тужгес кужмоез семья - Пичи Пурга ёросысь Филимоновъёс: Александр, Светлана но Оксана.

Тужгес кужмоез семья — Пичи Пурга ёросысь Филимоновъёс: Александр, Светлана но Оксана.

Воргоронъёслэн эстафетазы дыръя но вормисьёс ялан вошъяськизы. 5 команда одӥг выллем мынӥз. Ӵошатсконлэн берпуметӥ люкетэз гинэ вормисьёсты шараяны юрттӥз. Шарканысь Роман Широбоков командаезлы зарни медаль басьтыны юрттӥз, 2-тӥ но 3-тӥ интые потӥзы Дэри но Пичи Пурга ёросъёсысь воргоронъёс.

Вань спортсменъёс синмаськизы паськыт мычем куас сюресъёслы. Гурезё интыостӥ тросэз усьылӥзы ке но, йыркуръяськисьёсыз ӧй вал. Мукетыз но ушъямон: спортсменъёслэн быземзы куас база дорысен ик кыдёке адӟиське. Тренеръёслэн кесяськем куаразы кыдёке шуккиське.

Эграос - вормисьёс.

Эграос — вормисьёс.

— Нылъёслы пыдыныд выреты шуыса кесяськисько, — шуэ Пичи Пурга ёросысь егит нылъёслэн тренерзы Василий Трошкин. — Россиын ортчылӥсь ӵошатсконъёсы потаськомы, алигес кунгож сьӧрысь вуимы, котькытын мед луом, спортсменъёсылы удмурт сямен кесяськисько. Соин сэрен Россиысь тросэз тренеръёс удмурт кылэз табере тодо ни.

Эграын но Василий Трошкинлэн кесяськемез кыдёке кылӥськиз. Эстафета дыръя спортсменъёсты бурдъязы на трасса кузя сылӥсь висисьёс. Жаляса верано, учкисьёс пӧлын туж ичи вал Эгра ёросын улӥсьёс.

Кивалтӥсь ке кужмо, ёрос но дано  

Кивалтӥсьёс бордысен кутскыса, котькуд спортсмен ас ёросэзлы тросгес очко люканы тырше. Арысь аре командазылы вормон басьтыны юртто Дэри, Эгра, Шаркан, Ува ёросъёсысь кивалтӥсьёс. Соос борды туэ итӥськизы Алнаш, Юкаменск, Сьӧлта ёросъёс.

Вормисе потӥзы Эгра, Дэри но Ува командаос.

Вормисе потӥзы Эгра, Дэри но Ува командаос.

Синмаськисько шарканъёслы но уваослы. Эстафетаын бызьылӥсь спортсменъёссэс финише вуэмзы бере шуныт кылъёсын бурдъяло, пӧсь чаен удо. Валамон ни, соос ик кужмоосызлы быгатэмзыя коньдон кузьым висъяло. Бызьылэмедъя бызьылэмед потоз, соос доры ик егитъёс но кыстӥсько. Ёрос кузёос асьсэос но мугорзэс кыдато бере, пиналъёслы но спортэз гажан мылкыд пыӵато. Шарканъёс понна висьыны вуиллям Максим Вылегжанинлэн анай-атаез, ёрослэн азьвыл йырыз Александр Прохоров но мукетъёсыз.

Гурт шудонъёс йылпумъяськизы. 1-тӥ группае пырись ёросъёс пӧлын вормисе потӥзы Эгра, Дэри но Ува. 2-тӥ группаын вормись луизы Шаркан, Якшур-Бӧдья но Яр ёросъёс, 3-тӥ группаын висъяськизы Юкаменск, Дэбес, Красногорск ёросъёс.

Вуоно тол шудонъёс ортчозы Якшур-Бӧдья ёросын. Гурт спортсменъёс дасясько ни гужем ӵошатсконъёслы. 25-тӥ гужем шудонъёс ортчозы Сарапул ёросысь Сигаево черкогуртын.

Валентина Емельянова

Туспуктэмъёсыз авторлэн

 

 

Удмурт Дунне
By Удмурт Дунне Март 14, 2016 11:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<