Вуюисьлэсь ворпо «Радуга». Павел Чушъялов сюлмаське гуртоос сярысь

Удмурт Дунне
By Удмурт Дунне 4 февраля, 2016 14:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
DSC_чушъялов

Павел Чушъялов.

Пичи Пурга черкогуртын но ёросысь тросаз гуртъёсын ужбергатӥсьлэн Павел Чушъяловлэн «Радуга» нимо магазинъёсыз но кафеосыз ужало. Гурт калык понна соос шумпотон ваё — татысь дунтэм вуз басьтыны луэ, тросэз ужбергатӥсь доры ужаны интыясько. Толшор толэзе «Радуга» магазинъёс усьтӥськем дырысен 25 ар тырмиз.

— Павел Васильевич, ёросысьтыды тросаз гуртъёсын тӥляд магазинъёсты ужало. Пичи Пурга черкогуртын но Кечол каргуртын 2 этажъем вуз карон центръёсты усьтэмын. Пичи Пургаын эшшо бадӟым юрт пуктыны кутскиды на. Таяз мар луоз?

— Пичи Пургаысьсэ ке верано, татын сиён-юонэн, дӥськутэн, лэсьтӥськон тӥрлыкен но мукет арбериосын вуз каро, вылӥяз офисъёс интыяськемын. Удмурт Республикаысь Кун Кенешлэн депутатэз луисько бере, мон доры пӧртэм юанъёсын адямиос вазиськыло, офисъёсын ужало юрист Пётр Басов но мынам юрттӥсьёсы. Улӥ этаже кафе интыяськемын. Отын адямиос нуназеяло, ӝытъёс ортчытъяло. Али лэсьтӥськисез юрт сярысь ке верано, ар но ӝыны талэсь азьло Пичи Пургаысь вуз карон центре вӧзы ик 2 сюрс квадрат метръем юрт пуктон сярысь малпаськыны кутски. Таиз но улыно-вылыно луоз. Азьлоосыз сярысь, со 2-лы-3-лы бадӟымгес луыны кулэ. Нырысь-валысь ёрос кивалтӥсьёс пыд пуктылыны шӧтазы. Но мон та малпанэлэсь ӧй куштӥськы, азьлань мынӥ. Уж каллен-каллен интыысьтыз вырӟиз. Табере тани ваньмыз син азьын, юрт липет улын сылэ ини.

— Нош ку сое усьтоды? Маин отын вуз кароды?

— Отын ужез туж трос на: буяно, тыл кысконо, сузяно… Туэ гужем одно ик со усьтӥськоз. Нырысетӥ этажаз быдэсак супермаркет луыны кулэ. Кыкетӥяз калыклы юрттэт сётӥсьёс — вуриськисьёс, техника тупатъясьёс, массажистъёс, пинь эмъясьёс, парикмахеръёс — ужалозы.

— «Радугадылэсь» юбилейзэ нокызьы но ӧд пусъе шат? Ужбергатон понна 25 арез пичи шуыны уг луы.

— Юбилеймес одно ик ортчытомы. 10-тӥ тулыспалэ Яган-Докья черкогуртысь, мон татын вордӥськемын, культура юртын бадӟым концерт ортчоз. Калыкез шулдыртыны лыктозы шаерысьтымы тодмо коллективъёс: «Ерпечкаос», «Вить кырӟась сюлэмъёс», Удмуртиысь калык артист Геннадий Ганьков но мукетъёс. Ужрад «Радуга» магазинъёсын но кафеосын ужасьёслы гинэ чакламын ӧвӧл, отчы лыктыны быгатозы вань мылкыд карисьёс. Малпасько, милям гинэ та праздникмы ӧвӧл, вань басьяськисьёслэн но гуртоослэн. Гурт калык концерт учкыны городэ мыныны уг быгаты, билетъёс но куд-огез понна куртчылӥсько. Соин ик та нуналэ концертэз ваньмыз дунтэк учкыны быгатозы.

Пичи Пургалась лэсьтӥськись вуз карон центр.

Пичи Пургалась лэсьтӥськись вуз карон центр.

— Вуоноезлы малпанъёстэс вераны быгатоды-а? Соос тӥляд, ужбергатон удысын тыршись муртлэн, трос, дыр?

— Малпанъёс трос. Но соосты улонэ пыӵатыны мед быгато вылэм. Та вакытэ, колхозъёс куашкамен но оптимизация ортчытэмен, кӧня адями ужтэк кыле. Куд-огез, сюресъёс уродэн но коркаосазы газ пыртыны быгатытэк, гуртысь кошконо луо. Уката ик егитъёс. Соин валлин бушесь кылё нылпи садъёс но школаос, ворсасько клубъёс, магазинъёс, фельдшер-акушер пунктъёс. Пичи Пурга ёросэз гинэ ке но басьтоно, та вакытэ 4 участковой больницаос ворсаськизы. Мар кароно адямиослы таӵе дыръя? Райцентрлэсь соос 50-60 иськемын ке уло? Тае малпаса, сюлэм вӧсь луэ. Гуртэз утён сярысь асьмеос али ӧм сюлмаське, саклык ӧм висъялэ ке, нокинлы со кулэ уз луы. Егитъёсты гуртэ кельтон  понна нырысь ик лэсьтоно но тупатъяно сюресъёсты, ульчаосын мед ӝуалоз тыл, мед луоз уж. Али уж интыос кылдытъян  сярысь трос верало Россилэн Президентэз Владимир Путин но Удмуртилэн Тӧроез Александр Соловьёв. Милям ёростћмы Москва-Ижевск федерал сюрес ортче, солы матын улӥсьёс ас ваньбурзэс — бакча сиёнзэс, йӧл-вӧйзэс но вандэм пудо-животсэс — вузаны отчы потто. Озьы ик хозяйствоос но сюрес дурын, барыш поттыса, сылоно луо. Нош отын нокыӵе условиос ӧвӧл. Кезьыт, тӧло-жобо но зоро куазен кырын сылоно луо. Вуз карисьлэсь сиён-юонзэ отын нокин уг эскеры, чылкыт-а со, кырсь-а, вандэм пудо-животэз таза вал-а, висись-а? Соин валче таӵе малпанэ вуи: малы бигеръёслэн, бускельёсмылэн, федерал трассаязы «Татарский двориксы» вань, нош асьмелэн, удмуртъёслэн, ӧвӧл. Отын соос быгато будэтэм бакча сиёнъёсынызы но сӥль-йӧлынызы вуз карыны. Уча (Ильинск) черкогурт доры «Удмурт азбар» лэсьтоно. Адями  шуныт интыын вуз карыны мед быгатоз поттэм сиён-юонэныз. Отын ик мед луоз бакча сиёнъёсты возён инты но, малы ке шуоно республикаысьтымы вылӥ кивалтӥсьёс верамъя, асьмеос мултэс бакча сиён будэтӥськом. Соин ик, дыр, Правительстволэн Тӧроез Виктор Савельев бакча сиёнъёсты возёнъя но вузанъя логистической центр усьтон сярысь сюлмаське. Мон малпасько, «Удмурт азбармы» та куронъёслы тупалоз. Со сяна, отчы ик интыяськемын мед луоз ветеринарной лаборатория — вуз карись сое палэнэтӥ утчаса медаз  ветлы. Сюрес вылын мынӥсь-ветлӥсьёс, татчы пырыса, шутэтскыны мед быгатозы. Мынам малпамея, отын луыны кулэ мунчо яке душ, медпункт, сиськон но кӧлан интыос. Учке ай, кӧня ужась киос отчы кулэ луозы. Лэсьтӥськон бордысен кутскыса вуз каронозь. Адямилэн ужез ке вань, со капчи шокчыны но калык рад улыны быгатэ. Но пичи уксёен номыр уд кары. Пичи Пурга черкогуртысь али лэсьтӥськись объектмес йылпумъяса, Учае ужаны выжом ини.

Любовь Тихонова

Туспуктэмъёсыз В. Беломорскихлэн но Л. Тихоновалэн

Удмурт Дунне
By Удмурт Дунне 4 февраля, 2016 14:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<