Вунонтэм суредъёс

Удмурт Дунне
By Удмурт Дунне Февраль 9, 2016 14:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
А. Евсеева

А. Евсеева

Пинал дырысеным артист луон мылкыды вал. Но улон сюрес мукет пала валтӥз. Озьы ке но вань улытозям Удмурт театрен артэ вамышъяй, кема аръёс ӵоже театрысь литературая ёзэн кивалтӥ.

Йыромон

Мыным 4-5 арес котыр. Монэ кельтыса, мамаен папа Вася братме нылпи лагерьысь пумитаны мынӥзы. Нош со возьманы чидамтэ, доре бертэм. Вася сьӧразы уйиськыса мынӥз, нош мон — со бӧрсьы. Бере кыли но йыроми, «Колос» кинотеатр (али Александр Невский собор) кузя бӧрдыса ветлӥсько. Кык егит нылъёс монэ адӟизы но кытын улэмме юало. Мон вераны уг тодӥськы. Милицие нуом шуэмысьтызы туж зол кышкай, пегӟыны турттӥсько ни вал. Ветлыса-ветлыса анай-атаен пумиським. Ну йӧтӥз ук соку Васялы!

Кузьмалы — кузьым

1943-тӥ ар. Мыным 10 арес. Удмурт театр война дыръя Алнашын ужаз. Апрель толэзе папае Яков Перевощиков чорыганы мынӥз, туж трос тыпарсь (линь) кутэм. Бертӥз но, кӧнязэ ке чорыгзэ сумкае поныса, мыным шуэ: мын ай та сумкаез Кузьма Ложкинлы ну. Сюрес вылысен монэ параллельной классысь пиос кутӥзы. Удмурт сямен вераськыны шугъяськемысьтым, «ӟуч» шуыса исало вал. Сумкаме киысьтым ишкалтӥзы но, чорыгъёсы лымы вуэ усизы. Пиос соосты ну тыро ук кисыязы шумпотыса. Мон бӧрдӥсько, кӧня ке чорыг гинэ кылиз на сумкаям. Кузьымме нуи ик Кузьма Ложкинлы, нокинлы ӧй вера та учыр сярысь. Аръёс ортчыса гинэ, Кузьма Алексеевич но атае тодӥзы синвуэн пылатэм чорыгъёс сярысь.

Кока

Кузьма Алексеевич туж эшъяське вал Игнатий Гавриловен. Игнатий Гавриловичлэн но Клавдия Кузьминичналэн Лёва но Тамара нылзылы Ложкинъёс кироснойёс вал. Ми Тамараен эшъяським. Со Кузьма Алексеевичез «кока» шуэ вал (озьы нимало киросанай-атаез). Эшелэсь кылыса, мон но озьы ик вазиськылӥ. Верамме кылыса, папае огпол юа, малы, пе, сое озьы шуиськод? Тӥни соку тодӥ Кузьма Алексеевичлэсь нимзэ. Аръёс ортчыса ини, Ложкин серекъяса юа вал: малы, пе, кока ӧвӧл?

Мурт кышно, пе

Братэ Василий Перевощиков артистын ужа ни вал, кышнояськемын. Мон но сокугес гинэ бызи. Васяен Ижысь Гоголь бульваретӥ ортчиськом. пумитамы пиосмурт чутыса лыктэ. Шуэ:

— Ӟечбур, Вася! Мар мурт кышноосын калгиськод? Бакишеваедлы верало ай.

— Тодматскы, та мынам сузэре, Николай Евсеевлэн кышноез.

Озьы тодматски Трофим Архиповен.

Сценаез шӧмъян

1946-тӥ ар. Удмурт театрлэн аслаз юртэз ӧй вал, Короленко нимо ӟуч театрын арняяз 3 пол удмурт спектакльёс мынылӥзы. Война сярысь постановкаын пиналъёслэсь фронтлы юрттэмзэс возьматӥзы. Тамара Гавриловаен ми 6-тӥ классын дышетскиськомы. Сое кутӥзы спектакльын шудыны. Липет вылэ тубыса, Тамара кесяськыны кулэ вал: «Татын бомба!» Мон но кӧня ке пиналъёсын ӵош массовкае сюри, декорациос улын пукыса, кесяськимы: «Татчы, татчы лыктэ!»

Кык полэс песянай

1993-тӥ арын мыным огдырлы артист луыны кылдӥз ик. Удмурт театрын мынэ нылпиослы «Приключения кота Леопольда» выжыкыл. Спектакле мон внукъёсыным лыктӥ. Куинетӥ звонок сётӥзы ни. Нош песянаез шудӥсь артист ӧвӧл вуэмын, сое воштӥсь но дасямтэ. Труппаен кивалтӥсь Евгения Григорьева мар карыны паймемын. Литературая люкетэн кивалтӥсько бере, мон спектаклез ӟеч тодӥсько. Егит дыръям художественной самодеятельносте но ветлэмын. Ойдолэ, пе, эскером. Верано кылъёс сётӥзы, кызьы кулэ дӥсязы. Катанчи усьтӥськиз. Озьы мон актёръёсын ӵош одӥг действиез шудӥ. Нокин валаса ӧз вутты, внукъёсы но. Театрысь администрация мыным соку тау каремзэ вераз.

Анна Евсеева

Удмурт Дунне
By Удмурт Дунне Февраль 9, 2016 14:13 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<