Вуэз чылкытатонъя аппаратъёсты вузасьёс ёрто

Related Articles

• «Удмурт Кенеш» огазеяськонлэн Елабугаысь ёзэз ужзылы йылпумъянъёс лэсьтӥз 0 20.Мар
• Пенсиос йылозы 1-тӥ февральысен 0 30.Янв
• Законэз тӥялод — эриктэ ыштод 0 18.Фев

Фильтръёсын вуз карисьёслэн куриказы тужгес но ӵем шедё мӧйыос.

Роспотребнадзорлэн Удмурт ёзаз трос ӝожтӥськонъёс вуизы ни вуэз чылкытатонъя аппаратъёсты вузасьёс пумысен.

Вулы фильтръёсты вузасьёс коркаысь коркае ветло, аппаратъёссэс ушъямысь уг дугдо — учке ай, пе, кранысьтыды кыӵе кырсь ву бызе, нош тӥ сое юиськоды! Нош милям фильтрмы, пе, сое ошмесысь ву кадь чылкыт кароз. Калык мед оскоз шуыса, эсьмаса, син азязы ик эскерон ортчыто. Зэмзэ но, кызьы уд оскы: пож ву син куспын чильпырась-чылкыт луэ ке! Но Роспотребнадзорысь специалистъёс калыкез сак луыны куро. Вузаськисьёслэн эскеронзы — синпӧртман гинэ, тае валаны быгатоды, химияя книгаез усьтыса-лыдӟыса.

Фильтръёсын вуз карисьёслэн куриказы тужгес но ӵем шедё мӧйыос. Соослы та приборъёсты кужмысь ӵекто, вузало. Быдэс дунзэ тырыны уксёзы уг тырмы ке, мӧйыосын огкыл тупато но мискиньёсты ёртэмысь уг дугдо: жингыръяло, уксёзэс куро, кышкато. Дунзэ пытсаз ке но, пересь муртлы маза уз сётэ. Толэзьлы быдэ жингыръялозы фильтрлэсь ёзъёссэ воштыны косыса — таизлы но трос уксё куро.

Роспотребнадзорысь специалистъёс калыклэн тодаз уськыто: законъя улон интыяды нокинлы но пырыны лэземын ӧвӧл, асьтэос ӧд лэзе ке. Тодмотэм муртъёс ӧсады  йыгаськыса, жингыръяса ёрто ке, вазиське полицие. Тодады возе «Потребительёслэсь парвооссэс утён сярысь» закон сярысь но. Угось куд-ог учыръёсын мӧйыослы нокызьы но юрттыны уг луы ни. Соос кинюртэмзэс пукто огкылэ, кытын пусъемын товарзы соослы кельше но тупа шуыса. Нош таӵе учырын сое мукет вузэн воштыны но, берлань берыктыны но уг луы ни. Чаклалэ, кыӵе бумага вылэ кинюртэмдэс пуктӥськоды.

Елена Тугашова

Туспуктӥз А. Горбунов