Урмон висён одоле

Удмурт Дунне
By Удмурт Дунне 9 февраля, 2016 09:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
0101213,животные,природа,белка,дети

Урмонэз палато коньыос но.

Урмон висён вӧлмемъя шаермы Россиысь улосъёс пӧлын азьпал радын мынэ.

Туэ кышкыт висён нырысьсэ пусъемын Эгра ёросын. Одӥгаз хозяйствоын 68 скал пӧлысь одӥгез урмемын вылэм. Эгра палъёсысь висён кӧчиз Балезино, Каракулино, Сарапул, Алнаш, Вавож ёросъёсы. Таин сэрен али элькунамы дунтэк вакцинация мынэ. Адямиослы укол пуктыло. Кыр пӧйшуръёслы вакцинаез поно ческыт сиён пушкы.

— Урмонэн югдурез тупатон вылысь ульчаетӥ калгись пӧйшуръёсты кутылӥськомы, — вера Иж город администрациысь профилактикая но тазалыкез утёнъя управленилэн кивалтӥсез Любовь Касенкова. — Кылем арын ог 4 сюрссэ кырмимы. Та сяна, город котырысь куд-ог жуг-жаг куян интыосты утялтӥськомы. Угось тодӥськомы: таӵе интыосы пӧйшуръёс шаплы вуо.

Урмон — кышкыт висён. Ӧд ке йӧнатӥськы, улонысь кошкод. Висись пӧйшур макем вылӥе куртчиське, сокем адями шаплы быре. Кылсярысь, пыдэз сыскиз ке, висьыны усемез шӧдод толэзь яке ар ӵоже. Чырты борды кырмиськиз ке, чер нунал куспын погыртоз. Угось урмон нырысь ик йырвиымез лябӟытэ.

— 2007-тӥ арын чорыганы кошкем пиосмурт вылэ уйин ӟичы омырскем, — вера Любовь Касенкова. — Чыртызэ куртчем. Висён ассэ џукна ик шӧдытэм. Но бер вал ни — эмъясьёс пиосмуртэ улэп кельтыны ӧз быгатэ.

Кызьы утиськоно урмонлэсь? Куртчылэм интыез хозяйственной майталэн миськоно. Дуръёссэ йодэн зырано, биняно. Собере эмъясьёс дӥне дыртоно. Тазьы ик утялтоно пӧйшурен ӵабтэм яке нюлэм интыосты но, валэктэ Любовь Касенкова.

Роспотребнадзорысь эпиднадзоръя ёзэн кивалтӥсь Вера Данилова верамъя, кылем арын шаерысьтымы ог 4 сюрс муртэ пӧйшуръёс куртчылӥллям. Кырмемын 125 висись живот. Таос пӧ-лысь уноез — гурт пудо-животъёс.

— Тросэз доразы коӵыш, пуны вордо. Нош вакцина уг пукто, — сюлэмшугзэ кисьтэ Вера Данилова. — Туннэ шаерамы вуттэмын 18 сюрс доза.

Гуртъёсысь пӧйшурасьёс, нюлэсчиос, чорыгасьёс асьсэды утьыны выро ик. Городын улӥсьёслэн та сярысь тодазы уг лыкты. Нош кылем арын Ижын 3 урмон учыр пусъемын вал.

— Городысь кышномурт ульчаысь пуныез, мусоезлы синмаськыса, дораз пыртэм, — вера Ижысь пӧйшур висёнъёсын нюръяськонъя управленилэн кивалтӥсез Станислав Явкин. — Сюдэм, утялтэм сое. Арня ортчыса, пуныез кулэм. Эскеронъёс возьматӥзы: урмонэн курадӟе вылэм. Озьы кышномуртлэсь быдэс семьязэ та висён погыртыны быгатысал.

Чакласькон сярысь вунэтоно ӧвӧл. Та сярысь кивалтӥсьёс верало нылпи садъёсын, школаосын. Угось тросэз пиналъёс ульчаысь коӵышъёс, пуныос котыре чик малпаськытэк вешаськыны тэбинё. Йырын возёно: висьыны усем пӧйшурлэн нырысетӥ тодметэз — кышканэз быре. Нюлэскысь потыса, со адямилы матэ кариське.

— Пуныос гинэ ӧвӧл, коньыос но висён кузьманы быгато, — шуэ Станислав Германович. — Паркъёсын соосты кеньырен-нянен сюдонлэсь возиськоно. Шаерамы 6 пумо лобасьшыръёс уло. Таос но адямилы кышкыт луо — куртчылӥсько. Кылем арын сыӵе учыр вал ини.

Россиысь улосъёс пӧлын урмон ӧвӧл Калининград но Ленинград улосъёсын гинэ. Отын 5 ар ӵоже вань гурт но кыр пӧйшуръёслы вакцина пуктылӥзы. Али тазьы ик  каро Татарстанын. Выриськомы асьмеос но. Но ужмы уггес пӧрмы. Вакцина дуно. Нош одӥг ар вис луэ ке, та ужлэн пайдаез быре.

Пӧйшуръёслы дунтэк вакцина пукто:

  • Ижысь Воткинск шоссе ульчаысь 29-тӥ юртын,
  • Красноармейской ульчаысь 103а коркан,
  • Баранов ульчаысь 90-тӥ юртын.
  • Пӧйшур куртчыку, вазиськоно:
  • Ижысь Краев ульчаысь 37а юртэ — травматология больницае.
  • Гуртоослы вазиськоно ёрос ветстанцие. Отын вакцина пукто адямилы но, пудолы но.

Ольга Корепанова

Туспуктэм: udmfoto.ru

Удмурт Дунне
By Удмурт Дунне 9 февраля, 2016 09:04 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<