Кияса ёросысь Надежда Пахомова: Вӧсь пыр кыдан

Удмурт Дунне
By Удмурт Дунне Февраль 17, 2016 10:58
Н. Пахомова.

Н. Пахомова.

Удмуртиысь культура удысысь дано ужась Надежда Пахомова, 20 ар ӵоже  «Удмурт Кенеш» огазеяськонлэн Кияса ёросысь ёзэныз кивалтытозяз,  кыӵе но шуг-секытъёсын ӧз пумиськы.  Но вормонъёсыз синмаськымонэсь.  Кылсярысь, Надежда Викторовна Киясаын 1997-тӥ арын Кибашлыослэсь юртсэс усьтӥз, ёросысь Уддяди гуртын 2003-тӥ арын удмурт культурая центр кылдытӥз. «Инвожо» ансамбленыз кытчы гинэ уг вуттӥськы!

 Инмар кузьмаз сандали

— 10 толэзь дыръям атайтэк кыли, — шуэ Надежда Пахомова. — Сое нюлэс дасяны мыныны косӥллям. Уг шуэм, секытлэсь кышкам, лэся. Соку колхоз кивалтӥсьёс нэнэлы шуиллям: картэд уг мыны бере, ачид со интые мын. Нош нэнэлэн сям юн — Быдӟым ож вакытэ трактористын ужамын, война бере бригадир вал. Картэныз кема керетымтэ: нюлэс дасянысь бертыкум, дорын медад луы ни, шуэм. Со дырысен атай чиптэм-чаптэм ышем. Нэнэ чик ӧз куректы. Мыным азьтэм мурт кулэ ӧвӧл, юрт кутыны секыт ке но, ужасько но гань-гань изисько, шуылӥз.

Зэм, мыным атайтэк будыны ческыт ӧй вал. Со вакытэ атайтэмъёс шоры туж кырыж учкылӥзы. Кудӥз мирошка шуыса но серекъялляз. Соин пыр шымыртӥськыса будӥ. Школаын но отӥгес каремзы потэ вал, умой дышетски ке но, «4»-лэсь вылӥ отметка ӧз пуктылэ.

10-2

«Удмурт нылкышно кенешын».

Аслыз но нэнэлы, ӧз возьматы ке но, карттэк капчи ӧй вал. Уддядиысь юртмы воксё вуж, тани-тани выламы куашкалоз. Соин ик, 4-тӥ классэ потыкум, вуж коркамес кесяса, интыяз выльзэ пуктоно кариськимы. Нэнэ, ӵужай но мон кор дасяны нюлэскы ветлӥм. Секытлы чидатэк, нэнэлэн кускыз кырмиз. Гурт калыклы тау — юрттӥзы.

Корка пуктон понна скалмес вузамы бере, сюдӥсьтэк кылимы — йӧлзэ-вӧйзэ Киясае вузаны нуллыса, уксё поттӥськомы вал ай. Школае мыныны пыдкутчанэ ӧвӧл. Бӧрдӥсько. Огпол ӵужанае кукуруза пӧлысь пунысюлэз ишкыны сьӧраз нуиз. Соку со катар удалтэ вал, али ядэн быдто. Возьёс турнаны ӧй вал бере, ӵапак со пунысюлэз ыжъёслы дасяллямы. Ишкыса-ишкыса туж жади, доре куриськыны кутски. Уробо тыр медло, бичалом, буйгатӥз ӵужай. Мыкыртӥськи гинэ пунысюл доры, ки улам сюриз выль сандали. Ӵужанай шуэ: тае тыныд Инмар куштӥз, дыр. Мон сое басьтӥ, доре вайим. Школае кутчай но, пыдысьтым ишкалтозы кадь потыса, пыдъёсме парта улэ ватӥ. Нылпиос шудон сяменызы кукуруза пӧлы вунэтыса кельтӥзы, дыр, тодмалозы но талалозы кадь потӥз. Но нокин номыр ӧз куареты.

Пичи дыръям туж потэ вал клубын ужась луэме. Кенер вылэ пуксьыса, кырӟаллясько вылэм. Но нэнэ шуиз: клубын азьтэм мурт гинэ ужалоз. Мын ай, пе, бухгалтерлы дышетскы. Ачиз уго кезьыт фермаын, ялан секыт ӝутъяса, ужаз. Бухгалтер луид ке, шуныт азьын но пукод, ужед но капчи луоз, шуиз. Умой дышетски бере, вылӥ образование басьтэме потӥз. Удмурт кун университетысь экономикая факультет соку гинэ усьтӥськемын вал, удмуртъёс пӧлазы туж ӧжыт, соос но удмурт сямен вераськыны возьдасько. Нош мон ӟучсэ рос-прос уг тодӥськы. Котьма ке но дышетски ӟеч. Но 3-тӥ курсэз быдтэме бере нэнэ султаны луонтэм висьыны кутскиз. Заочное выжи. Гуртэ бертӥ, но тэк уд пукы ук.

Нылпиосыныз ӵош.

Нылпиосыныз ӵош.

Уддядиысь колхоз конторае йыгаськи. Азьвыл колхоз бухгалтеръёс туж данын вал, отчы зажиточной адямиосты кутылӥзы. Нош мон атайтэм маке, начар улӥськомы, дипломе киям ӧвӧл на. Скал кыскисе мын ай, шуизы. Табере Киясаетӥ вамышъясько, кытчы меда интыяськом шуыса. Ӵош дышетскись эше пумитам сюриз. Мон интые, пе, ёросысь «Знамя труда» газетэ корректоре мын, ачим дышетскыны, пе, кошкисько. Кыко ар янгышъёсты тупатъяме бере секретарьмы шуэ: ёрос больницаын бухгалтерзы ӧвӧл. Картэз — валтӥсь врач Матвей Иванович Кубашев, со мон сярысь кылэм вылэм ни. Соку ик валтӥсь бухгалтере пуктӥзы. Умой тыршеме понна центре квартира но сётӥзы.

 «Ашальчи»

— Со вакыт — тужгес каньылэз улонам. Калык гажа, уж пӧзе. Зэм, ноку уг бызьы малпасько вал. Синмаськисьёс вал, но мон кепыр вайылӥ, адямиос байгес уло, соос монэ уз учке шуыса. Пиосты котырысьтым палэнтылӥ.

Но шудэ азьпалан на вылэм. Тодон-валанме будэтон вылысь Иже курсъёсы ыстӥзы. Отысен эше сьӧры Пичи Пургалась Кечол гуртэ куное мынӥ. Нош Лизалэн 4 агайёсыз. Коля шорысь ачим но синъёсме ӧй вошты ни. Солы 30, мыным 28 арес. Кема ӧм эшъяське — кузпалъяським, сое сьӧрам Киясае нуи. Бӧрсьысь бӧрсе нылмы но пимы вордӥськизы.

Больницаын ужез умой нуэмме адӟизы но ёросысьтымы банке кысканы кутскизы. Азьвыл мылпотэмъя гинэ ужаны уг луы вал — компартилэн ёросысь ёзэз мар косоз, сое ик лэсьтод. Озьы мон банке выжи. Татысен ик кутскиз, лэся, улонэлэн секыт вакытэз.

1990-тӥ аръёсы кутскизы банкез люкыны. Озьы одӥг липет улын кылдӥзы государственной но коммерческой банкъёс. Берлоезлы управляющие юнматӥзы монэ. Люкиськыкумы ми кие выжиз колхозъёсын кусып тупатон. Со вакытэ колхозъёс бусьтыр уло вал. Уксё берганы кутскемысь, артысь банк таин тэрытӥськыны ӧз быгаты. Монэ калыкен удмурт сямен но вераськыны уг лэзё ни вал. Нош удмурт адями «нылы» шуыса пыре ке, кызьы мон ӟучен валэктом? Мае валалоз мӧйы мурт? Колхоз кивалтӥсьёслы валэктӥсько вал, кызьы созэ я тазэ ужез умойгес лэсьтоно. Удмурт кылын вераськеме понна зол йӧтэ вал кивалтӥсьёсылэсь. Но мон чидай но аслэсьтым карылӥ — тазьы ужаме азьланяз удмуртлыкез ӝутонын туж юрттӥз. Ог-огедлы ӟеч лэсьтэм уг вуны уго. Троссэ ужрадъёсты ортчытыны колхоз кивалтӥсьёс юрттӥзы.

10-1

«Удмурт Кенешлэн» ӧтчамаз.

Но отӥяз шӧдыны кутски: банкын мыным таӵе ваменэс луэме ужаны уз сёты. Меӵак вераны ӧдъязы: малы, пе, удмурт адями ужаны кулэ управляющийын. Та шќдӥськыны кутскиз нылпиосы вылын но — школаын пыкылыны, бӧрњытъяны ӧдъяллям. Озьы асме быдэсак сӥзёно кариськи культуралы.

1990-тӥ аръёсы Пичи Пурга ёросысь «Зарни шеп» ансамбль туж данын вал. Нош Киясаын одӥг но ансамбль ӧвӧл. Эх, люка вал удмуртъёсты, малпасько. Дышетӥсен Зинаида Коконоваен кенешим. Малпанме умоен лыдъяз. Адямиосыз тодӥсько. Соослы ик вазиськи. 20 кузя люкаським Киясаысь клубе. Кино соку клубын уггес возьматъяло ни вал, нош ӝыт кытчы ке мынэм потэ. Концертъёслы дасяськыны кутскимы. Асьмелэн арганчимы но, ниммы но ӧвӧл, калык но милемыз уг тоды на. Оло, соин но нырысь-валысь гуртъёсы концертэн потыны автобус ӧзгес сётъялэ. Осконзы ӧй вал, лэся. Но ансамбльме аналтэме ӧз поты. Кутскимы библиотекае люкаськылыны. Соку соин Раиса Залётова кивалтэ вал. Дэмлай:  мед ужалозы одӥг липет улын бигер, ӟуч но удмурт коллективъёс. Пумиськонъёс ортчытъялом, шуи. Со соглаш кариськиз, «Рябинушка» коллектив ачиз кылдытӥз. Бигеръёс «Чулпанэ» огазеяськизы. Кырӟам сяна, удмуртъёс понна писательёсын, артистъёсын пумиськонъёс радъяны ӧдъяй. Нош уксётэк мар карод? Банкен кивалтӥсьёслы вазиськисько вал. Озьы пумиськонъёсты паськытгес ортчытъяны луонлык кылдӥз.

Огпол сыӵе пумиськонэ Удмуртиысь калык писателез Василий Ванюшевез ӧтимы. Шулдыр кырӟаськоды, пе. Кызьы ансамбльлэн нимыз, юа. Нош ми весь нимтэмесь. Мон, пе, ним быръё. Вуэ гожтэт: мон, пе, поездэн дор палъёсам бертӥсько но тӥледлы ним утчасько. Списокез кузь вал, но ми «Ашальчи» нимез бырйимы. Композитор Николай Уткин Людмила Кутяновалэн кылъёсызъя  «Ашальчи» кырӟан но гожтӥз. Со дырысен «Ашальчи» туннэ ке но калыкез шулдыртэ. «Калык ансамбль» ним но басьтӥз ни. Али соин кивалтэ Любовь Королёва. Туж данъяськисько, та ансамблез мон кылдытӥ шуыса. Зэм, ачим пумен отысь кошки: коллективе егитъёс вуизы, аслым нылпиосме дышетоно, нэнэе кулӥз. Мылкыд кырӟано но кивалтоно кадь ӧй вал.

Пичи дыр.

Пичи дыр.

 Усточиосты утчан

— Удмуртлык котырын бергамме синйылтытэк ӧз кельтэ «Удмурт Кенеш» огазеяськонын. 1991-тӥ арын монэ ёросысь ёзэзлы кивалтӥсе бырйизы. Удмурт культураен вырыны райцентрын туж секыт. Националистка но нимасез вал, удмуртъёсыз ӝутыны но данъяны кутски шуыса. Пӧртэм пумиськонъёс, конференциос ортчытъяны ӧдъяй уго. Огпол ёрос газетын статья потӥз, удмуртъёслы сиыны-юыны уксё сётъяло шуыса. Нош паськыт ужрад дыръя калыкез куноятэк луэ меда? Югдур Нациосын ужан политикая комитетозь вуиз, отысь но кивалтӥсьёс эскерыны вуылӥзы. Нимысьтыз конференция но люкамы.

Со вакытэ ёросын, тужгес но райцентрын, удмурт сямен вераськыны дӥсьтӥсь ӧй вал. Бератаз уноезлэсь кылӥ: тыныд луыса ми дугдӥмы удмурт луэммылэсь возьдаськемысь. Удмурт дэремен ураме гинэ но потыны уг луы вал —  парашютъёсын лыктӥллям, шуылӥзы.  Нокинэн уродъяськытэк, тынад культураед чебер шуыса возьматыны быгатӥськод ке, котькинлэсь йырсазьзэ воштыны луэ вылэм. Ёрос кивалтӥсьёс но удмуртлыкез ӝутонын юрттыны ӧдъязы. Удмурт гуртэ потыкум, шуисько вал: кылдытэ ансамбльёс, люкаськылэ. Туннэ котькудаз коллективзы вань. Подгорной ӟуч гуртын гинэ но удмурт «Купанча» ансамбль кылдытӥм.

Монэ котьку сюлмаськытэ вал мукетыз ужпум но. Киясаын Кибашлыослэн юртсы 1993-тӥ арысен вань шуыса лыдъяське, но ужасез рос-прос ӧвӧл, калыкез паймытыны, ушъяськыны номырин. Вамыштӥ ёрос администрациысь культурая управлениен кивалтӥсь Тамара Лёвочкина доры. Ойдолэ, шуисько, ёросысьтымы кибашлыосты одӥг интые огазеяломы. Соглаш кариськиз, асме ик Кибашлыослэн юртсылы кивалтӥсе юнматӥз.

10-4

«Удмурт Кенешлэн» исполкомез Уддядиын удмурт коркаен тодматскыку.

Со аръёсы уж шедьтыны секыт вал. Доразы пукись кибашлыосты утчаны кутски. 7 мастер шедьтӥ. Кыӵе соос шумпотӥзы! Кыксэ дышетскыны Иже пыртӥ, сьӧразы экзаменъёсы но ветлӥ. Куиськон станок пересьёслэсь шедьтӥ, нош сӥньыс басьтыны уксё ӧвӧл. Нэнэелэсь половик куыны дасям быдэс мешок сӥньыссэ кибашлыосылы сётӥ. Трос гинэ арбериосты дорысь отчы вуттӥ. Мед гинэ азинтӥськомы. Картэ котьмалы кибашлы бере, сое но кӧня ужатӥ. Кибашлыослэн юртсы чебергес но шунытгес медло шуыса, сюлмаськи. Пумен кибашлыосмы сярысь адямиос но умоен вераны ӧдъязы. Ёрос ик шулдыргес луиз кадь.

Вашкалазэ утьыны мылкыды вань шуыса, Тамара Лёвочкина оскиз на «Инвожо» ансамблез валтыны. Огдыре ик кык уж, кык уждун, кык пумо дан. Туннэ «Инвожоез» тодӥсьтэмез ик ӧвӧл ни, соин быдэс дуннеез котыръяськом, кунгож сьӧры но потаськом, алигес Эстониысь бертӥм.

Кибашлыосылэн кӧтсы пӧсь луиз. Ма, кылзэс но юасько вал, ужаны косыса. Ужысь поттэмзы потыса, Прокуратурае гожтэт пӧраллям. Янгышме ӧз шедьтэ, куд-ог ужасьёсме туздыртӥзы, но мон коллективам берытскыны ӧй быгаты ни. Мон соосты уже кутӥ, нош сооc куртчизы шуыса, сюлэмы вӧсь луиз. Асме утчано кариськи мукет азьысь.

 Вашкалаез утись

— Нэнэ весь вера вал Уддяди вӧсяськон сярысь. Вашкалаослэсь вӧсяськон интызэс но возьматӥз. Акашка дыръя нюлэскын ӝук пӧзьто, сое Уддяди урам кузя нуо, вӧсь утисьёс доры пыртыса, быдэс гуртэн сиё вылэм. Со корка пушкы валъёсты но вӧсям ӝукен сюдыны пыртало вылэм, соин ик выжъёссэ юромо корлэсь лэсьтӥллям. Со корка гурт шорын ик. Вӧсь утисьёс кулэмен, юртъерез чаклась быриз. Тани-тани куашкалоз. Укноосыз пилиськемын, садысь писпуос бордэ кырмиськыны турттӥсь икыр-кукыр киослы укшало. Но арлыдо калык вӧсяськон сямъёссэ уг вунэты. Ӝук вӧсямлы быдэ корка доры лыктэ, пырон инты шедьтытэк, азяз бӧрдыса сылэ. Огпол таӵе суредэз адӟыса, сюлэмы вирын пыласькыны ӧдъяз. Тамара Лёвочкиналы нош вазиськи: ойдолэ со коркаез басьтом, отчы удмурт корка лэсьтом, туристъёсты кыском, сям-йылолъёсынымы тодматом. Ёрос йыр Александр Максимов та малпанэз умоен лыдъяз.

Анаеныз ӵош.

Анаеныз ӵош.

Коркаез утялтћзы «Инвожо» ансамбльысь юлтошъёсы. асьсэлы кадь ужазы: сузязы, миськизы, садысь выжыосты порылӥзы. Коркан укноос кылдэм бере юртлэн тусыз ик улӟиз кадь. Соку тодэ лыктӥз нэнэлэн верамез. Вӧсез утись Одотьяпай кулон азяз нылызлы шуэм: та юрт шулдыр луоз ай. Азьвыл фотозэ учкисько но малпасько: кызьы меда кутскиськеммы сое тупатъяны, номырлы ярантэм вал ук. Но Инмар озьы косӥз, дыр. Табере быдэс дуннеысь куноос но туристъёс сое адӟыны вуыло. Со бадӟым дан но шумпотон. Ноку уг вунэты ни мӧйыослэсь Удмурт корка усьтонысен мыным синвуэн тау каремзэс. Али вӧсям ӝукез чылкыт азьын сииськом уго. Шулдыр отын туннэ. Кеносаз ас вакытаз усьтӥ музей. Быдэс ёросысь пӧртэм чалмаосты бичай.

Сюлэм вылам каньыл луиз. Сям-йылолъёсъя быдэс фильм дасямы. Табере со уз вуны. Со сяна, дорамы вуылӥзы «Мир» каналысь журналистъёс. Соослы коркась корка юмшан сям-йылолэз возьматӥмы, ваньзэ гожтӥзы.

Огез пумысен сюлэмы бӧрдэ. Уддядиын тӧл вуко вань. Сое туж потэ вал улӟытэме. Но Удмурт коркаез усьтыны но, вукоез выльысь ужатыны но огдыре кужыме уз тырмы шуыса, бордаз басьтӥськыны соку ик ӧй дӥсьты. Вань историзэ бичаса-гожтыса кельтӥ ик. Туннэ вуколэн липетэз но усемын ни. Аслам со ужез бергатыны ӟигары ӧвӧл. Арлыд но вань ни уго. Но кин тодэ, оло, тӧл вукоез но улӟытӥсь сюроз ай.

Куддыр малпасько: малы меда сомында кужымме сётӥ удмуртлыкез ӝутонлы? Нылпиосылы дырме ӧжытгес висъяй кадь. Зэм, соос мон вӧзын асьсэос но удмурт движение пыриськытэк ӧз кыле. Нылме 9-тӥ  классэ йылпумъямез бере Сарапулэ медучилищее нуи. Урод сюрес вылэ медаз султы шуыса, дораз ӵем вуылӥсько вал. Училищеын удмурт кылэз дышетӥзы, фестивальёс отчытъяло вал. Нылылэн группаез мед вормоз шуыса, ваньзылы удмурт дэремъёс нуисько вал. Сарапулын но удмуртъёс чебер мед адӟиськозы кадь потылӥз. Пие понна но тазьыгес ик сюлмаськыса улӥ. Нялтас вераса,  нылы Ижысь кардиоцентрын ужа, пие — Кияса ёросысь судъя пристав.

Нылпиосылы шуисько: улонме улӥ, нэнэме медам возьдаськыты шуыса. Табере улӥсько, тӥ медад возьдаське шуыса, тӥ но озьы ик улыны тырше. Мыдлань сюрес вылэ султыны кема ӧвӧл. Котькыӵе урод адями сюрес вылады мед сюроз, ву но, сиён но сётэ. Котькыӵе адямилэн но улэмез потэ, шуисько. Асме та улонын вӧсь карисьёс шедизы бере, нокин вӧсез медаз адӟы ни кадь потэ. Но вӧсь каремзы монэ юнматӥз гинэ.

10-31

«Инвожо» ансамбль.

Асме туж шудоен лыдъясько. Пичи дыръям малы вожъяськи, ваньмыз вань. Нылпиосылы шуисько: асьмеос райын кадь улӥськом. Коля уг юы, уг кыскы, уг кереты. Вӧзаз туж ганяк улӥсько. Картэ чик тэк уг улы. Со ялан маке лэсьтэ. 3 толэзь ӵоже, нюкъёсысь но жуг-жаг куян интыосысь запчастьёс вайыса, трактор бичаз.

Киясаысь казённой коркан улэме ӧз поты. 1990-тӥ аръёсы кирпич люканы кутским. Кредит басьтӥм. Но кредитмы коркалы ӧз кошкы — картме эмъяны. Тракторзэ скоросте кельтэм уго, ачиз кабинаысь потэм. Ас киыныз лэсьтэм тракторез вылтӥз кошкем. Картэлэн тӥяськымтэ интыез ӧй вал. Врачъёс шуизы: таид улӥсь ӧвӧл, таӵезэ ӧм адӟылэ на. Но мон ӧй оскы, кулоз шуыса. Пыд йылаз султыто, шуи. Уен-нуналэн сямен котырысьтыз ӧй кошкылы. Эшъёсыз, матысь адямиосмы ӧз куштэ. Коля пыд йылаз султӥз, коркамес пиеным ӵош ӝутӥз. Куинетӥ арзэ выль коркан улӥсько ни. Корка трос внукъёсы мед луозы кадь потэ.

Али внучкаелы вань тодон-валанме кельтыны вырисько. Гидкуазям музей усьтэме потэ. Нэнэелэн вуж чалмаосыз вань. Табере нылылэн нылыз вашкала культураез мед утёз.

Елена Сараматова

 

 

 

 

 

Удмурт Дунне
By Удмурт Дунне Февраль 17, 2016 10:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<