Пальышатэк шудэмез уг луы

Удмурт Дунне
By Удмурт Дунне Февраль 1, 2016 09:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
izqTHMlKMbM

В. Фирстов.

Удмурт кун филармонилэн директорез Алексей Фомин та артист сярысь вера: креативной балалаечник. «Золотая мелодия» оркестрлэн концертаз ветлӥсьёс шуо: ми мынясь артистэз учкыны лыктӥм. Зэм но, Удмуртиысь дано артист, «Треш-фолк» дуэтэз кылдытӥсь Владимир Фирстов балалайкаен усто шудэменыз но мусо пальпотэменыз учкисьёслэсь сюлэмзэс кемалась ас палаз берыктӥз ни.

— Владимир Аркадьевич, кызьы тӥ артист луиды?

—  Телевизорлы луыса.

— ?

— Тодам ваёно ке, ма бордысен ваньмыз кутскиз, берытсконо пичи дыре. Азьло гуртысь пиналъёс урамын шудыса будӥзы, ӧй вал компьютеръёс, айфонъёс. Телевизорез лэзиськод но, отын кыӵе ке симфонической концерт мынэ. Кысӥськод но выльысен ульчае, эшъёс доры дыртӥськод. Нош огпол пель сьӧрам кылӥськиз воргоронлэн балалайкаен шудэмез. Та рад телевизорез ӧй кысы, куаразэ бадӟыматӥ но пукон вылэ пукси: у-ух! кыӵе шудэ, со крезьгур, экран пыр потыса, пушкам пыриз кадь. Пумозяз кылзӥ. Сыӵе яраз. Малпасько, вот мон тазьы шудыны быгатысал ке. Озьы мон 10 арескам нырысьсэ кылӥ балалайкалэсь куаразэ но синмаськи та инструментлы. Бӧрысь ини, шудыны кутскеме бере, ӵужае шуиз, тынад дедушед балалайкаен но арганэн туж усто шудэ вал. Капка азе потоз но, ӟус вылэ пуксьыса, ну шудоз, пе, вал.

— Кин тодматӥз инструментэн?

— Балалайкаез телевизорысь нырысьсэ адӟеме бере ар ортчыса, Дэри ёросысь Кияик гуртамы ужаны лыктӥз Ижысь «Танок» ансамбльысь мыйыко чебер пиосмурт, Удмуртиысь дано артист Иван Вахрушев. Иван Иванович  — усто балалаечник. Милемлы пение урокез нуиз. Огнунал школае лыктӥмы но ялон адӟимы: кинлэн шудэмез потэ балалайкаен, арганэн, гитараен, домраен, мыноно клубе. Культура юртэ зал тыр калык люкаськем, клубын кезьыт, ми фуфайкаосын кынмыса пукиськом. Черодмес витиськом прослушивание шуонэ. Кыӵе кышкаса пуки отын. Иван Иванович азьлапал ик шуиз: эн куатаське, ваньды кружоке уд шеде. Мон эшшо но золгес куалекъяны ӧдъяй. Сыӵе бадӟым мылкыды, нош ӧз ке басьтэ? Черодэ вуиз но, инструментэз гитараез сямен кутӥ, дымбыр-дамбыр коканы ӧдъяй, балалайка-балаболка. Мон отчыозь уг тодӥськы вал ук, та инструментэн туж небыт, лякыт выроно шуыса. Но Иван Иванович монэ кружоказ кутӥз, ми ньыль кузя крезьгурен тодматсконмес азьланьтӥм. Туж мыло-кыдо мон отчы ветлӥ.

«Золотая мелодия» оркестрен.

— Крезьгуро инструментэн умой шудон понна, кружокын сяна, дорын но киез ялан волятоно, дыр?

— Одно ик. Котькуд нунал самой ичизэ куинь час. Мамае Галина Митрофановна чидаса кылзылӥз, нош папаелэн Аркадий Андреевичлэн пельёсыз  ик шуяло вал кадь  огпӧртэм тринь-бриньлэсь. Нырысь кутскыку, шудыны уд пӧрмытӥськы ук, ялан одӥг куараосты поттӥськод. Со шуэ вал, оло, маке мукетсэ шудод ини, нош мынам дринь, дринь сяна уг пӧрмы ай. Огпол, аслам  пӧрмымтэелы воже потыса оло папаелы йыры кур луыса, балалайкаме кутӥ, гидэ потӥ. Мамалэсь скал кыскон пуконзэ шедьтӥ, пукси но крезьгурме ӧръяй. Огпалаз скал турын сыске, мукет палаз кунян сиське. Котырак чал-чал, нокин уг лулӟылы, уг люкеты. Тон шудӥськод, пудо-животъёс учко, кылзо. Сокем яраз гидын шудыны, куинь часлэсь ортчемзэ ик ӧй шӧды. Мама потӥз но чабкиське: шузимид-а, гидын шудӥськод, мын корка пыр. Пумитаз шуисько: туннэ скалмы одно ик тросгес йӧл сётоз, солы кельше шудэме.

— Музыкант луон мылкыдды ик вуттӥз, дыр, шаерысьтымы крезьгуръя училищее?

— Мынам эшшо но умойгес шудэме потэ вал, но артист луо ӧй кожа. Пичи дыръям малпалляй: папае сямен, водитель луо, бадӟым машинаен дэри пӧлтӥ ворттыло. 9-тӥ классэз быдтыкум, Иван Иванович шуиз:  культпросветэ котьку вуттод, вамышты крезьгуръя училищее. Мон огшап малпаськи ай, соку визьнодасе будэтӥз: отын сомында чебер нылъёс, тыныд одно ик кельшоз. Мон шуи, ярам, мыно. Озьы шеди дышетӥселэн педагогез доры ик  Геннадий Семёнович Рузманов дӥне. 1-тӥ курсысен ик «Танок» ансамбльын шудӥ ини. Собере тодон-валанме будэтӥ на Самараысь культурая кун институтын.

— Домраен, гитараен шудӥсьёс киязы медиатор куто, соин ик чиньыоссы вӧсь уг луо, нош тӥляд кызьы азьчиньыды чида?

— Кызьы чиньые чида, ачим но паймисько. Огпол мон но выри медиаторен шудыны. Шорам кесяськизы: кин балалайкаен озьы шудэ! Ачим тодӥсько, шуи. Быдэстӥ «Криминальное чтиво» фильмысь ваньмызлы тодмо крезьгурез. Пӧрмиз туж усто. Но медиаторен шудэм бере ки уг кылзӥськы ини, суй жадьыны кутске.  Соин ик дышем сямен ик киыным шудӥсько. Балалайкаос трос пумо: бадӟымез — контрабас, альт, секунда, прима но пичиез — пикколо. Мон телевизор пыр примаез адӟи бере, соин ик шудӥсько.

— Нотаосты пегалляло-а?

— Бен, куддыр произведениез вунэтӥськод. Азьло дыръя, сураськиськод ке, куалекъяны-пӧсекъяны кутскиськод вал. «Танокын» монэ дышетӥзы: киыд мыдлане кошкиз ке, пальпот но ӝогак тупатскы. Выль арлы сӥзем шулдыръяськонъёс 20-тӥ толсурысен мынӥзы, ай эшшо январе сольной концертмес сётӥмы. Котькуд нунал сямен турлы произведениосты шудыса, «Треш-Фолклэн» концертаз одӥгаз номерын мынам ваньмыз сураськиз. Константин Кунгуровлэсь паймем синъёссэ адӟыса, валай: воксё паллянэ кошкисько. Учкисьёс валазы-а, ӧз-а, шуг вераны, залын пеймыт вал. Нялтас вераса, мыным уг кельшо пеймыт залъёс, шудыку адямилэн синъёсаз учкем потэ, солэсь мылкыдзэ шӧдэм. Но вераны кулэ, котькуд нунал 3 час ӵоже шудон киосты волятэ. Чиньыос крезьгурез бичало ини, тынэсьтыд юатэк. Уката ик произведение кельше ке, тон ачид но лычсузиськод, инструмент но, крезьгур но жингыр вазё!

Бекче вылын шудэ.

— Инструментлэн ӟечлыкез яке шудӥсьлэн быгатонлыкез валтӥсьгес луэ?

— Соос ог-огзылэсь люконтэм. Умой инструмент ачиз шудэ, тон кияд кутӥськод но, со чебер, чылкыт крезьгурзэ кисьтэ ини. Мон сое валай, пӧртэм балалайкаосын шудыса. Инструмент тонэ, нош тон сое шӧдыны кулэ.

— Нырысь ужады «Танокын», табере — «Золотая мелодия» ансамбльын. Эшшо кылдытӥды на «Треш-Фолк» дуэт.

— «Треш-Фолк» дуэт азьын ай вал мукетыз. Оркестрлэн аслаз правилоосыз, куддыр тынад шудэмед потэ одӥгзэ, нош быдэстоно луэ мукетсэ. Эрик ӧзгес тырмы, лэся. Собере, мае уг яра, уз пӧрмы шуо, сое одно ик утчам потэ ук. Озьы 2003-тӥ арын, «Танокын» ужакум ай, кылдытӥмы  «Трин» трио.

— Мар шуэм со?

— Нимъёсын милям котьку ик озьы. Программа бордын ужаськом-ужаськом, нош коллективмылы ним малпаны вунэтӥськом. Сцена вылэ потон дыр вуиз но, милесьтым юало, кызьы тӥледыз учкисьёслы ялоно. Катанчи сьӧрын малпаськыса сылыны дыр ӧй вал ни, нырысез, мар йырам лыктӥз — «трин» кыл. Балалайкаез адӟо ке, ваньмыз шуо: триньди-бриньди, эшшо ке ми куинь кузя (Мария Быданова (флейта), Надежда Суворова (солистка) но мон). Озьы нырысетӥез коллективмы сыӵе нимын ужаз ньыль ар. Но 2006-тӥ арын мон кошки Кубанской казачий хоре.

— Кызьы  отчы вуиды?

— Нош ик телевизор юрттӥз.  Мон соку ужасько ни вал «Золотая мелодия» оркестрын. Телевизор пыр учки Кубанской хорлэсь концертсэ, ух! макем кельшиз. Та хор быдэс Россиысь тужгес арлыдоез но тодмоез, кылдэмын 1811-тӥ арын. Кызьы пичи дыръям балалайкалы синмаськи, озьы ик коллектив но йырысьтым ӧз поты. Жингыртӥ хорлэн  кивалтӥсезлы Виктор Захарченколы, шуи: тӥледын ужаме потэ. Соку уг тодӥськы вал ук, мон кадь юалляськисьёс трос шуыса. Телефонлэн сопал пумаз огшап шып улӥзы, паймизы, лэся. Юазы кытысь луэмме. А-а, Ижевск, тӥ дорын кезьыт о-о, тодӥсько, тодӥсько. Лыкты январе, кенешом, шуиз. 7-тӥ толшоре соослэн концертсы Краснодарын луыны кулэ вал, отчы ик мон мынӥ. Захарченкоез адӟеме бере малпай: кыӵе мусо дедуш. Мон сыӵе гочасько песятайёслы, малы ке шуоно дедушъёстэк будӥ. Ӵыжы-выжыеныз кадь монэн вераськиз со. Нырысь ик юаз, чукынэмын-а, кирос нуллӥсько-а. Мон пылатэмын, но киросэ ӧй вал. Нялтас вераса, папае кулон азяз мыным кирос басьтӥз, та, пе, тыныд мынэсьтым кузьым.

Краснодарын монэ кылзӥзы Кубанской хорлэн кивалтӥсез Виктор Захарченко, оркестрен кивалтӥсь Борис Качур, эшшо кӧня ке адямиос. Шудӥ удмурт эктонэз но ӟуч камаринскоез. Кылзӥзы, молодец, пе, но техникаед бордын ужано луоз на. Соос ӧз тодэ ук, кызьы мынам пушкы куалекъяз, чиньыосы дырекъязы — быдэс Россилы тодмо кизилиос азьын нырысьсэ шудӥ ук! Виктор Гаврилович хорлэн концертъёсыныз трос-трос дискъёс кузьмаз но юаз: ку дорамы ужаны кутскод, кӧня дыр тыныд кулэ? Шуисько: кык нунал Иже бертыны, бичаськыны но эшшо кык нунал дорады лыктыны. Озьы, арня ортчыса, мон Краснодарысь хорын шудӥсько ни вал. Нырысетӥ концертэз уг ни вунэтӥськы. Отын оркестр хор азе интыяське. Тани артистъёс, 100 адями, гурез мытӥзы, со кырӟан кужмо тӧл кадь тыбырам ик пыкъяськиз. Вераны луонтэм мылкыд кылдӥз.

— Филармониысь кивалтӥсьёслэн но анай-атайдылэн лэземзы уг поты вал, дыр?

— Мон соку «Золотая мелодия» оркестрын шудӥсько ни вал, соин кивалтӥз Сергей Кунгуров. Кошкон мылкыдме верай, со шуиз: уг лэзьы. Мон мынӥ филармонилэн директорез доры. Дмитрий Кокорин юаз, мар, пе, тыныд отын сӥзизы, квартира яке бадӟым уждун? Мамае алекмиз: кытчы, малы, ку? Папае шуиз: бырйид бере, мын. Но мон 4 толэзь гинэ ужай. Концертъёсысь но сюрес вылысь ӧм пыраллялэ, гастрольёс ӝыны толэзен. Ӵапак соку Сочиын ортчоно Олимпиадалы дасяськон мынэ вал. Кунгож сьӧрысь куноосты, бадӟым кивалтӥсьёсты пумитан-шулдыртон ми вылын вал. Но соку папае сюрес вылын шудтэм учыре шедиз, машинаез вылэ КамАЗ пыриз, озьы мон Краснодарысь бертӥ. Тани матысь дыре та хор нош ик концертэн Иже лыктэ, ми одно ик пумиськом.

Анаез но атаез.

Анаез но атаез.

— Нош ик вамыштӥды филармоние?

— Ӧй, мынӥ лавкае, саморезъёсын, шурупъёсын вуз кари.

— ?

— Ну, Кубанской хор бере Удмуртиын кытчы мынод на? Кулэ вал вис карыны. Краснодарысь бертэме бере мон кык ар балалайкаме ӧй кутылы. Собере  лэсьтӥ пуконъёс. Ужан нунал быре ке, гужемзэ бертӥсько вал гуртэ, нош толалтэ мӧзмыны кутски, маке ӧз тырмылы. Уж бере пиосмуртъёс ларёке мыно, сур юо. Мынам уг поты. Ачим но валасько ини: нуназезэ пукон лэсьтон, ӝытазе сур юон мыным  воксё уг тупа.

Огпол урамысь адӟи Алексей Фоминэз, со «Золотая мелодия» оркестрлэн дирижёрез вал. Шуэ: кӧня пегалод на, тонэ Кокорин вите. Мон оски, кин тодэ, оло, со озьы пӧяз гинэ. Но филармоние лыктэме бере Дмитрий Фёдорович монэ адӟиз но шуиз: наконец-то!

— Ку вал со?

— Уд оске, 2009-тӥ арын 1-тӥ апреле. Ваньмыз шуизы: Фирстов берытскиз филармоние? Ум оскиське, шутка. Соин-а, мар-а приказ гожтӥзы 2-тӥ апреле. Со аре ик кылдӥз «Треш-Фолк»: Константин Кунгуров (баян), Любовь Устинова (домра) но мон. 3 арзэ ми вал трио. Но тӥ, нылъёс, куддыр декретэ кошкылӥськоды ук. Люба нылпи вайиз. Табере ваньзы дышизы ни кадь, ми Костяен кыкнамы шуыса.

— Треш, англи кылысь берыктыса, жуг-жаг шуэмез возьматэ ук.

— Солэн мукет пуштросэз но вань, кылсярысь, крезьгурлэн ӧрез, маке вылез, дыбыртӥсез, жингыртӥсез, куке ваньмыз пӧзе, дырекъя, мугор кузя кузьылиос бызьыло. Ми озьы ик шудыны тыршиськом. Мыным туж уг кельшо изись яке акыльтэм тусын шудӥсь артистъёс. Соин ик дуэтмы сцена вылэ потон азьын мар йырам лыктӥз, озьы ик шуим. Концертэз нуисьлэн синъёсыз ик питыръяськизы: треш?! Мон сое ӝогак буйгатӥ: фолк! Озьы милемды 8-тӥ арзэ «Треш-Фолк» дуэт шуыса тодо ни.

«Треш-Фолк» дуэт.

«Треш-Фолк» дуэт.

— Кызьы асьтэ сярысь одӥг-кык кылын верасалды?

— Одӥг-кык кылын уз пӧрмы, мон туж пӧртэм: гужем но тол кадь, тулыс но сӥзьыл кадь. Яратӥсько ческытэз, учкисьёс та сярысь тодо ни. Концертэ лыктыкузы, сяська интые кудыен шоколад ваё.

Мон котьку ик ӟечезлы оскисько, куддыр со туж секыт ке но. Шонерзэ вераса, оптимист луыны капчи ӧвӧл, но адями ялан умойгес луыны, ассэ будэтыны, кияз кутыны кулэ. Маке уг кельшы ке, воштыны. Капчи, дыр, магазин азьын, сур юыса, костаськыны, мынам озьы улэме уг поты.

— Мар люкетэ, нош мар юрттэ улыны?

— Адямилы номыр люкетыны уг быгаты, ачиз сяна. Нош юрттэ — семья. Ужысь коскаса бертӥсько, ӧсэз усьтӥсько гинэ, 4 аресъем Максим пие пумитам бызе, киосыныз но пыдъёсыныз обезян кадь кырмиське. Пуксисько диван вылэ, ӟыгыртэ Юля нылы, мукет палаз Юра пие, соку ик валаськод: тани со, шуд. Нылпиосылы крезьгур дунне матын, но кыӵе удысэз соос быръёзы, асьсэос тодозы. Куддыр Юляен ӵош шудӥськом, солэн флейтаен туж умой пӧрме. Кузпалэным Татьянаен тодматски «Танокын», со отын эктэ вал, али тырше Ижысь Октябрь ёросысь нылпи творчествоя юртын. Тодматскеммы-вераськеммы бере шӧдӥ: та мынам адямие. Татьяналы шуи: 3 нылпи вайид ке, кышно басьто. Кузпалъяськимы 1999-тӥ арын.

— Кызьы кузпалды тӥледыз Краснодарысь хоре, казак нылъёс доры, лэзиз?

— Лэзиз. Милям Юлямы но Юрамы вал ини. Кулэ бере, ветлы, эскеры, шуиз. Мон вожаны муг уг сётӥськы, куддыр та пумысен сюлмаськемзэ шӧдӥсько ке но. Мон туж яратӥсько но дунъясько кузпалме но пиналъёсме.

— Галина Митрофановна пиеныз данъяське-а?

— Мон малпасько, данъяське. Сольной концерт бере со юа: тонэ адӟыны тамында калык ветлэ-а, нош мон сыӵе шер учкисько… Мамаез гуртысь поттыны секыт. Ой, кинлы скалме кельтом, кин юртэз учкоз… Мон понна шумпотэмзэ вера дышетӥсе Иван Иванович Вахрушев. Со али Москваын улэ-ужа. Кусыпъёсмы уг ышо. Со ӵектэ, ойдо, пе, Москваын концерт пуктом. Но мон талы дась ӧвӧл на, вазьгес ай.

— Учкисьёс пусъё, та Фирстов киосыныз гинэ уг, синъёсыныз но шудэ, тросэз синмаськемын тӥляд пальпотэмдылы.

— Калык кунэрес тусъёсты урамысь но тырмыт адӟе. Соин ик мон котьку пальпотӥсько. Адямиос мынясь муртъёсты адӟыны дышемын ӧвӧл-а, мар-а, талы туж паймо но концерт бере, пе, шуо: та Фирстовды сцена вылэ юыса пота, лэся. Но мыным ай Иваныче (Иван Вахрушев) шуылӥз: адямиос концертэ лыкто шутэтскыны, ӟеч мылкыд басьтыны, кузьма соослы крезьгуро дуннелэсь чеберлыксэ. Учкы залын пукисьёс шоры кылчинъёс шоры кадь. Сцена вылэ пот умой мылкыдын, одно ик пальпотыса. Мон озьы ик тыршисько.

Галина Семёнова

Туспуктэмъёсыз аслаз геройлэн

Удмурт Дунне
By Удмурт Дунне Февраль 1, 2016 09:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<