Тюрьма уг буша…

Удмурт Дунне
By Удмурт Дунне 25 февраля, 2016 09:11

Кылем арын ужамзылы йылпумъян лэсьтӥз но туэ арлы быдэстоно ужъёс сярысь вераз Россиысь Кыл кутытонъя управленилэн Удмурт Республикая ёзэныз кивалтӥсьлэсь ужзэ огдырлы быдэсъясь Игорь Криницин. Коллегилэн ужаз пыриськизы шаерысьтымы вылӥ кивалтӥсьёс.тюрьмаын

Азьвыл аръёсы пытсэт сьӧрын пукисьёс асьсэды лякыт возьылӥзы ке, кылем арын  1 адями виемын, тылпу потон учырын 1 адями быриз. 9 пиналъёс пумитъяськон ӝутӥллям, пытсэт сьӧрын улонэз капчиятыны курыса. Та ужпумез нимысьтыз комиссия эскере.

Туннэ нуналлы шаерамы 11 исправительной колониос но 3 следственной изоляторъёс лыдъясько. Пытсэт сьӧрын 8 сюрс 155 адями пуке. Берло 5 арзэ колониын пукисьёслэн лыдзы кулэсмиз, но йылӥз следственной изоляторе шедемъёслэн лыдзы. Выльысь йыруж лэсьтӥсьёс но будо. Пукисьёс пӧлын тужгес трос секыт йыруж лэсьтэмъёс (отчы пыро адями виисьёс, сантэмасьёс, кышкатыса трос ваньбур лушкасьёс, террористъёс…) но наркотикъёсын герӟаськемъёс. Кылем арен ӵошатыса, 12 процентлы йылэмын ВИЧ-инфекциен черламъёс, ӧжытгес кылемын лулсэр висёнъёсын курадӟисьёс, туберкулёзэн висисьёс, наркотикен эшъяськисьёс, юисьёс.

Бышкись ез сьӧрын пукисьёсты 1 сюрс 777 видеокамераос чаклало, троссэ машинаосты ГЛОНАСС система пыр эскеро. Нимысьтыз саклык висъяське терроризмен нюръяськонлы, угось лымшор палась вуэмъёс ичи ӧвӧл. Та вие пытсэт сьӧрын пукисьёс пӧлын 73-ез Уйпал Кавказысь, 88-эз Шор Азиысь вуэмъёс луо. Та удысын ужасьёслы, сак кариськем сяна, юн сямо луоно. Жаляса верано, пӧлазы шедё пукисьёс чотын узырмыны вырисьёс. Кызьы вераз Игорь Криницин, сыӵеос погон нуллыны кулэ ӧвӧл.

Учреждениын ужасьёс ар куспын 54 сюрслэсь трос пол эскеронъёс ортчытӥзы. Пытсэт сьӧрын пукисьёслэсь яке соослы лушкемен сётыны вырыкузы таламын: 52 сюрс 192 манет, 7 литр спирт, 107 литр самогон, 900 грамм йырез усыкмытӥсь арбериос, 804 сотовой телефон. 66 мурт кыл кутытон улэ кыскемын пытсэт сьӧрын пукисьёслы лэзьымтэ арбериос сётыны выремез понна.

— Дэри ёросысь Ягулысь 1 номеро колониын пукисьёслы кӧня ке нунал ӵоже 30 телефон сётыны выризы, ӧз пӧрмы, — шуэ Игорь Борисович. — Бӧрысь кин ке колонилэн азбараз 17 бинялтэт куштэм. Отысь 22 телефон, 10 зарядка, 9 сим-карта но кудӟытӥсь юон шедиз. Валлян одӥгезлы пукисьлы бандероль вуиз, отысь нош ик 8 телефон потӥз. Пытсэт сьӧры лушкем арбериос келяны вырисьёсты кыл кутытон улэ кыско но 5 сюрс манет штраф тырыто.

Кыл кутытонъя управлениын ужасьёс азе чурыт куронъёс пуктэмын: быдэстоно «Сюд астэ ачид» программаез. Шаерысьтымы пытсэт сьӧрын пукисьёс кылем ар куспын 340 миллион манет тыр ваньбур поттӥзы, 546 муртлы ужан интыос кылдытэмын. Кечато укноос сьӧрын вуро ужан дӥсь, лэсьто пукон-ӝӧкъёс, салазкиос, тюбингъёс, ужало пичи «колхозъёссы». Соос поттӥзы 45 тонна сӥль, 587 тонна йӧл, толлы будэтӥзы 1 сюрс тонна картошка, 75 тонна кубиста.

Валентина Емельянова

Удмурт Дунне
By Удмурт Дунне 25 февраля, 2016 09:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<