Кыӵе азьлань сюресэз шаерысьтымы гурт удыслэн?

Удмурт Дунне
By Удмурт Дунне Февраль 8, 2016 08:43
3-5-1

Кылем арын 100 пала трактор басьтэмын.

Марлы дышетӥз гуртоосты 2015-тӥ ар? Мае возьмано 2016-тӥ арлэсь? Та но мукетыз сярысь журналистъёслы мадиз Правительстволэн Тӧроезлэн воштӥсез Сергей Токарев.

Улӟозы етӥн бусыос?

Берло дыре гуртоослы куазен уг удалты. Таин сэрен миым 10 сюрс гектар вылысь ю-нянез калтыны ӧз быгатэ. Ыштонъёс адӟизы етӥн будэтӥсьёс но. Лыз буртчин кизисьёс пӧлысь уноез туэ мар карыны ик ӟудэмын, куд-огез ужезлэсь куштӥськыны но малпалля ни. Кидыс уго ӝынызэ сяна люканы ӧз пӧрмытэ. Сое басьтыны Тюмень, Алтай палъёсы мыноно — матысь улосъёсын асьсэос етӥн кидыслы ёрмо. Котьма ке но шумпотымон иворъёс но вань.

— Сьӧлта ёросын етӥн будэтонзэс но, заводзэс но ас вакытаз аналтӥзы вал, — шуэ Сергей Токарев. — Но заводэз выльысь улӟытыны, 4 сюрс гектар музъемез лыз буртчинэн кизьыны ог 5 миллиард манет висъяны дась луисьёс шедизы. Шаерамы переработка улӟиз ке, мертчанлэсь пӧртэм арбериос лэсьтыны ӧдъямы ке, со барыш вайыны кутскоз. Эгра но Шаркан ёросъёсын заводъёс вань, но соос йылаз-пумаз вуттэмын ӧвӧл. Азинтӥськыны мылкыдзы но усемын, лэся.

Лэсьтыны чакламын ю тысь куасьтон но шертон комплексъёс,  ӝутыны туала куронъёслы тупась фермаос, басьтыны техника. 2015-тӥ арын басьтэмын 100 пала трактор, ю-нянь калтыны 60 комбайн, пудо сиён дасяны 40 комбайн. Туэ 16 процентлы уногес техника басьтыны заявка сётэмын ке но, рос-прос ужан понна та ӧжыт.

Скаллы быдэ — юрттэт?

Миым ар кутсконын гуртоос азбаръёсазы вордӥзы 23 сюрс скал. Ар ӵоже ог 4 сюрс 500-зэ вандӥзы. Гуртоослэсь пудо вордыны мылкыдзэс ӝутон вылысь кылем ар пумын нимысьтыз программа кутэмын вал. Соя 2-5 скал возисьёслы йырлы быдэ 3 сюрс манет висъяны чакламын. Но гуртоос дорозь та коньдон ӧз вуы на. Огъя быдӟалаез 19,5 миллион манет. Сергей Токарев оскытӥз: феврале уксё ёросъёсы кошкоз, отӥяз пумен калык дорозь вуоз.

Нялтас вераса, шаерысьтымы хозяйствоосын но сюроослэн лыдзы усиз. 2014-тӥ арен ӵошатыса, миым 450 йырлы ӧжытгес лыдъяськиз. Шаерамы кысконо скалъёс али 132 сюрс. Гуртоос азе ужпум пуктэмын 2020-тӥ арозь араз 1 миллион тонна йӧл кыскыны. Кылем арын 729 сюрс тонна йӧл люкаськиз. Ужпумез быдэстон понна эшшо 38 сюрс скал басьтоно.

089883,СПК Авангард,Увинский район,корова,ферма

Гуртоос азе ужпум пуктэмын 2020-тӥ арозь араз 1 миллион тонна йӧл кыскыны.

— Тамында пудоез интыян понна фермаос ӝутыны кулэ. Кылем арын 3 сюрс 732 скаллы инты лэсьтэмын вал. Туэ 11 сюрс 116 инты лэсьтыны чакламын, — шуэ Сергей Токарев. — Та лыдпус вормымон. Туэ январь толэзе Удмуртиысь Правительство но «Росагролизинг» огазеяськон огкыл гожтӥзы. Соя «Росагролизинг» пуктӥськон понна   7 процентэн гинэ 10 арлы кредит висъялоз. Та дыр ӵоже фермаос «Росагролизинглэн» лыдъяськозы. Та азинтӥськыны бадӟымесь луонлыкъёс сётэ. Зэм, йӧл кысконэз будэтон понна, гид ӝутэм сяна, ӟеч пудо сиён но дасяно, техника но басьтоно. Вань та ужпумъёсты быдэстон понна ог 7 миллиард манет кулэ.

Но туннэ хозяйствоосын кивалтӥсьёсты мукет ужпум сюлмаськытэ: йӧллэн асдуныз, закупочной дун сярысь, улӥын возиське. Туннэ переработкаен вырисьёс 1 килограммзэ йӧлэз 19 манет 76 копейкаен басьто. Озьыен, йӧл вылын заводъёс но магазинъёс узырмо, нош хозяйствоос ыштонъёс адӟо. Кылсярысь, йӧллэсь 44 процент барыш басьто переработкаен вырисьёс, нош хозяйствоос — 32 процент. Сергей Токарев верамъя, югдур луыны кулэ воксё мукет. Йӧл поттыны уго уногес уксё кошке, солэсь маке лэсьтонэн ӵошатыса. Туннэ переработкаен вырись заводъёс ваньмыз сямен частникъёс киын бере, соос хозяйствоос пала кариськыны уг ик  малпало.

— Матысь дыре Удмуртие вуыны кулэ Россиысь Правительстволэн Тӧроезлэн воштӥсез Аркадий Дворкович. Йӧл пумысен югдур сярысь вераськон ӝутомы, — шуиз Сергей Токарев.

Скал кыскисьлы — 50 сюрс?

Егитъёсты гуртэ кыскон вылысь кылем арын 270 специалистлы подъёмной сётӥськиз. Вузъёсты но училищеосты йылпумъяса, хозяйствоосы лыктэмъёслы ог 200 сюрс манет сётӥськиз. Туэ но программа азинтӥськоз. Санэ басьтозы сюбег специалистъёсты но. Механизаторъёс, водительёс сяна, уксёен огпол юрттэт басьтозы егит дояркаос но — 50 сюрс манет. Зэм, со понна пудо утялтонъя нимысьтыз курсъёс ортчоно.

Улон интызэ умоятон вылысь 212 муртлы субсидия висъямын, та пӧлысь 130-эз — егит специалистъёс. Азьланьтӥськиз газ кыскон, сюресъёс лэсьтон. Но туала вакытэ та гинэ тырмыт меда? Гурт поселениос куспын ялэмын «Сазь гурт» ӵошатскон. Таӵе ӵектонэн Правительстволы вазиськиз Удмуртиысь Нылкышноослэн огазеяськонзы. Гуртоос таза улонэн мед эшъяськозы шуыса, ёросъёсы специалистъёс поталозы, калыкен пумиськонъёс радъялозы. Сьӧлта, Грак, Вавож, Алнаш но Якшур-Бӧдья ёросъёсын сыӵе ужрадъёс ортчытъямын ни, пайдаез шӧдӥське.

Елена Сараматова

Туспуктӥз А. Горбунов

 

 

 

 

 

Удмурт Дунне
By Удмурт Дунне Февраль 8, 2016 08:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<