Сюрсо шайтан — озьы нималлязы Афганистанын ожмаськем десантникъёсты

Удмурт Дунне
By Удмурт Дунне Февраль 24, 2016 09:22
bekreev

С. Бекреев Афганистанын десантник вал.

Сергей Бекреев ожмаськиз Афганистанын. Парашютэн тэтчанъя СССР-ысь спортъя мастере кандидат. Кивалтӥз  Ижевскысь «Пограничник» военно-спортивной клубен. Та дыре элькунысьтымы ДОСААФ-ысь валтӥсь специалист.

Лобась мылкыд

Сергей Бекреевлэн пичи дырысеныз ик лётчик луэмез потэ вал: макем вожъяськылӥз инметӥ лобась тылобурдоослы! Бадӟым классъёсын дышетскыкуз, Ижевскысь авиаклубысь пинал лётчикъёслэн секциязы гожтӥськиз. Армие мынэмезлэсь азьло парашютэн сюлэсь трос пол тэтчыса вуттӥз. Но служить карыны ыстӥзы Забайкальее пограничникъёс пӧлы.

Сергей Бекреевлэн воздушно-десантной войскоосы выжтыны куриськонъёсыз пумысен командиръёсызлэн валэктонзы одӥг вал: Родинаез утьыны пограничник но кулэ. Сергей ӧз сётскы — егит солдатэз выжтӥзы 345-тӥ парашютно-десантной полкысь 9-тӥ ротае.

Нош 1979-тӥ арын 1-тӥ декабрьысен Сергей Бекреевлэн службаяз выль вакыт кутскиз. Афганистанлэн президентэз Файзулла Амин американецъёсын кусыпъёссэ юнматэмен валче КПСС-лэн ЦК-езлэн Политбюроез лушкем кенешиз Афганистанысь кивалтэтэз воштон пумысен. 9-тӥ ротаез вань боевой снаряжениен вуттӥзы Узбекистанысь Фергана аэродроме, отысен, АН-22 самолётэ пуктыса, Афганистанысь Баграм городэ келязы. Десантникъёслы утьыны оскизы Совето Союзэн герӟась аэропортэз, татчы вуттылӥзы странаысьтымы армейской подразделениосты, КГБ-ын ужасьёсты.

Вазь ӵукна, кезьыт омырез сайкатыса, чузъяськылӥз муэдзинлэн куараез. Ӝужыт минарет йылысен со мусульманъёсты ӧтьылӥз вӧсяськыны.

Ӝуась музъем

19-тӥ декабре десантникъёсты выжтӥзы Кабулысь вуж казармаосы. Афган форма сётыса, шуизы: тӥ, пе, вуэмын Афганистанлэн уйпал ёросъёсысьтыз президентэз Файзулла Аминэз утьыны.  Аминлэн резиденциез интыяськемын вал Кабул сьӧрысь вырйылын писпуосын но куакъёсын котыртэм Тадж-Бек дворецын. Котырак минаос пуктылэмын, ватскыса возьмаськизы 2 танкъёс. Дворецын интыяськемын Аминлэн оскымон гвардиез. Артысь казармаосын вал эшшо 2 сюрс пала солдатъёс.

Дворецез басьтон азьын арня солэсь азьло десантникъёс огъя учениос ортчытъязы ГРУ-ысь (Главное разведывательное управление) спецназэн. Нош 27-тӥ декабре ӝыт сиськемзы бере 9-тӥ рота спецназэн ӵош Аминлэн дворецез пала вырӟиз. Ваньмыз — ог 500 боецъёс. Сергей Бекреев ротаенызы КГБ-лэн «Гром»  спецподразделениезлы азьлань мыныны сюрес усьтыны кулэ — быдтоно дворецез возьмась 2-тӥ батальонэз. Шоразы мертаськем гумыослэсь утиськыны, ватскыны нокытчы, ваньзы син шорын. Нырысь ик гудыртӥзы «Шилка» зенитной установкаосмы. Но соослэн снарядъёссы борддор пыр потыны ӧз ворме. Соку дворец пала вань кужмысь ширтӥзы кӧня ке БТР-ёсмы. Нырысетӥез машина тылын ӵушкась интыез ортчыны быгатӥз, нош кыкетӥзэ пулемёт  гомӟытӥз. Кузёзэс утьыны турттыса, афганецъёс вань укноосысь вистэм-вожтэм ыбылӥзы спецназ но десантникъёс шоры.

Десантникъёслэн ротазы дворецлы тужгес матын вал. Соос ыбылӥзы кыкетӥ но куинетӥ этажысь укноосы. Афганецъёс чигнам бере сюрес усьтӥськиз казармаос шоры мертаськыны. Но мышласянь асьмелэнъёс шоры нош ик ыбылыны кутскизы. Отчы но мертаськытэк ӧз луы. Ӝоген ваньмыз чалмиз, афган батальонлэн командирез, кӧня ке офицеръёс но солдатъёс сётскизы. Президент Файзулла Амин бырыны шедиз.

Нош со вакытэ Аминлы юрттыны танкъёс вырӟиллям. Та сярысь асьмелэнъёслы ивортӥзы рация пыр. Десантникъёслэн ротаенызы кивалтӥсь старшой лейтенант Вострокин команда сётӥз соос пумит противотанковой ракетаосысь ыбылыны. Кӧняез ке танкъёс гомӟем бере мукетъёсыз берлань чигназы. Но десантникъёс, БМП-осы пуксьыса, соослы пегӟыны ӧз сётэ. Ӵуказеяз вазь ӵукна казармаосы кылем афган солдатъёс но сётскизы.

Та ожъёс мыныку, мукетъёсыз советской подразделениос киултӥзы Афганистанысь обороная но югдурез утёнъя министерствоосты, Пули-Чарх тюрьмаез — пытсэт сьӧрын пуко вал Аминлэн политикаезлы пумитъяськисьёс. Дворец понна ожмаськон дыръя десантникъёслэн ротаысьтызы 5 адями бырыны шедиз. КГБ-лэн «Гром» спецподразделениез но сомында ик ыштон адӟиз, нош ГРУ-лэн батальонысьтыз 9 мурт быриз.

Кык нунал ортчыса, Сергей дворецен тодматскыны ветлӥз. Кузь-кузь коридоръёс, 50-лэсь ятыр висъетъёс синэз палёмыто узырлыкенызы но чеберенызы. Но котькытын костасько пияла юдэсъёс, штукатурка, гильзаос.

Ожъёс но сяськаё возьёс

4 нунал ортчыса, ожгарчиосмес Кабулысь выльысь Баграме келязы. Азязы пуктэм ужпумез быдэстӥзы бере, 1980-тӥ арын полкын вераськонъёс потӥзы, десантникъёслэсь ротазэс Союзэ келялозы шуыса.  Но Афганистанын ожмаськон ӧз дугды. Со вал 9 арлэсь кема кыстӥськем ожлэн кутсконэз гинэ. Кунгожъёсты висъясь Амударья шур вамен гудыръяса выжизы ни асьмелэн танкъёсмы. Сергей Бекреевлы та ӝуась музъем вылын эшшо 9 толэзь ортчытоно луиз на.

Десантникъёслэн ротазы транспортэн колоннаосты, вертолёт площадкаосты душманъёслэсь утиз. Вертолёт пуксьылон интые одӥг пол кӧня ке гранатаос ошизы. Уйин гудыртэм кылӥськиз. Учко но, музъем вылын 2 «духъёс» кыллё, вӧзазы — автоматъёс. Та учыр бере кӧня ке дыр ӵоже котыразы чалмыт вал.

Сергей эшъёсыныз ӵош трос котыръяз гурезьёсты но. Сюрес возьматыса, сьӧразы боевой заданиосы ветлӥзы афган милиционеръёс. Зоре я лымыя, 40 килограмм кыскись грузэн кӧня ке нуналъёс ӵоже гурезьёсы потазы. Молитва лыдӟон вакытсы вуэ но, келясьёссы, тыбырысьтызы ваньзэ куштыса, ковёр вылэ пуксё. Быдэс группа возьма, ку соос вӧсяськозы.

— Гурезьёстӥ ветлыны туж кышкыт вал, — тодаз вае Сергей. — Я мина вылэ султыны шедьтод, я изъёс сьӧрысь, гыркъёсысь шорад ыбылыны кутскозы. Соку гинэ вуэм солдатъёсты ожмаськонэ сьӧрамы ӧм басьтылэ, жалямы.

Кышкатэк ожмаськемзы понна десантникъёсты «духъёс» сюрсо шайтанъёс шуылӥзы. Солдатъёс улӥзы палаткаосын, душманъёс сяна, доразы кожаллязы скорпионъёс но кыйёс. Нош гужем макем чебер ӝужаллязы мак сяськаен возьёс!

Ваньмыз умой

Сергейлэн берлоез служить карон интыез вал Алихейль кишлак. Отчы пырон азязы мина вылын пазьгиськиз 7-тӥ роталэн БМД-ез. Нокин улэп ӧз кыльы. Быремъёсты мукетаз машинае интыяса, Кабулэ нуись сюрес вылозь келяны кӧня ке десантникъёсын ӵош ветлӥз Сергей но. Бырем эшъёссэс ватӥськонэн вырись командалы сётыса, нош ик берытскизы кишлаке. Татысь кошкыкузы ини, выльысь сюризы «духъёслэн» гранатомётъёссы шоры. Таяз учыре сӧсырмыны шедиз командирзы капитан Вострокин. Броняез пасяса, граната пазьгиськиз бронетранспортёр пушкын. Ымнырзэ киыныз ватэмен, командирзы улэп кылиз: кӧня ке корт чалепъёс кияз мертчиськизы. Нош душманъёс, шокчыны маза сётытэк, гурезь йылысен ыбыло но ыбыло. Десантникъёс рация пыр ӧтизы авиациез. Ӝоген вуизы кык МИ-8 вертолётъёс. Ожмаськон гуньдӥз, но одӥгзэ вертолётэз «духъёс» уськытӥзы ик.

1980-тӥ арын августэ Сергей гепатитэн висьыны усиз — тросэз та пыр потӥзы. Сое келязы Туркменистанысь Мары городэ. Дораз ӧз ик тодылэ кытын служить каремзэ но, ожмаськемзэ но, висемзэ но. Вакчи гожтэтъёсаз ивортылӥз, ваньмыз умой шуыса. Конверт вылын адресэз гожтэмын: Москва, 515, Б/2.

Больницаын толэзь кыллемез бере С. Бекреевез толэзьлы отпуске лэзизы. Ижевске бертӥз  поездэн. Дораз возьма ни вылэм демобилизация сярысь приказ. Ӝоген Бекреев рядовойлы сётӥзы военной билет. Афганистанын ожмаськемез пумысен отын пал кыл но гожтэмын ӧй вал.

Асьме войскоосты Афганистанысь поттэм дырысен 25 ар тырмонэн валче 2014-тӥ арын феврале Сергей Михайловичез пусйизы Россия Федерациысь Обороная министерстволэн «В память о выполнении воинского долга» медаленыз.

Александр АБДУЛАЕВ,

Россиысь Писательёслэн союззылэн ёзчиез

 

Удмурт Дунне
By Удмурт Дунне Февраль 24, 2016 09:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<