Спорт: маин тодэ кылёз ортчем арня?

Удмурт Дунне
By Удмурт Дунне 8 февраля, 2016 13:37

Тол амалъёс

afisha isqh hq cutuФевраль толэзь узыр спортъя ӵошатсконъёсын. Со сярысь ивортӥз шаерысьтымы мугор кыдатон культурая, спортъя но егитъёсын ужан политикая министр Игорь Краснов.

Кылем арнянуналэ Тол амалъя спортлэн нуналэз ортчиз. Россиын сое кыкетӥ арзэ радъязы. Со сӥземын Сочиын ортчем но туэ гужем Рио-де-Жанейро городын ортчоно Олимпиадаослы. 7-тӥ феврале Удмуртиын трос пумиськонъёс, спортъя шудонъёс, вожвылъяськонъёс ортчизы. Спортъя «Чекерил» комплексын следж-хоккеен но кёрлинген шудонъя, нылпиос понна гурезь куасэн нискыланъя ӵошатсконъёс ортчизы, ас быгатонлыкъёссэс возьматӥзы сноубордэн нискыласьёс. Ижысь «Динамо» стадионын стартэ потӥзы конькиен бызьылӥсьёс. «Олимпиец» йӧ дворецын хоккеен шудонъя турнир ортчиз. Тол амалъя ӵошатсконъёсы пыриськем улосчиосмылэн вань вормонъёссы сярысь тодыны луэ Ижысь спортъя музейын.

Та арняе шаерамы улӥсьёс итӥськозы «Россиысь куас сюресъёс» ужрад борды. Со 2 нунал кыстӥськоз. 13-тӥ феврале куасэн бызьылонъя праздникъёс луозы Ижысь вань ёросъёсын, Пичи Пурга, Балезино, Кез, Сарапул, Юкаменск ёросъёсын. 14-тӥ феврале стартэ потозы Глазов городын, Ува каргуртын, Шаркан черкогуртын но Ижысь Г. Кулакова нимо спорткомплексын. Ижын ӵошатскон кутскоз 11 час 45 минутэ.

Биатлон

Зарниен берто

Румыниысь Чейле Градистей городын дуннеысь егитъёслэн биатлонъя чемпионатсы ортчиз. Отчы пыриськизы Удмуртиысь 2 спортсменъёс.

Россилэн командаез бадӟым вожвылъяськонын 2-тӥ интые потӥз. Пинал биатлонистъёс 4 зарни, 2 азвесь но 1 туй медальёс басьтӥзы. Ӵошатсконлэн берпуметӥ нуналаз Россиысь юниоръёслэн командазы эстафетаын зарни медаль утӥз, кыкетӥ интые потэм командаез ог 2 минутлы азьпалтӥз. Пусйыны кулэ, 4 пиос пӧлысь кыкез Удмуртиысь вал: Ижысь Дмитрий Шамаев но Можгаысь Виктор Плицев. Мукет стартъёс сярысь ке верано, шаерысьтымы спортсменъёс медаль дорозь ӧзгес сузьтӥськылэ.

Чемпионатэ   ӧз шедьы

Россиысь биатлонистъёс кужымзэс эскеризы Тюменьын. Нимаз стартъёсын вормисе потэмъёс Россилэсь данзэ утёзы 21-тӥ-28-тӥ феврале Тюменьын ик ортчоно Европалэн чемпионатаз.

Та ӵошатсконъёсы шаерысьтымы спортсменъёс но пыриськизы. Можгаысь Ульяна Кайшева нырысетӥ стартын 8-тӥ инты басьтӥз. Отӥяз солы удалтӥз ни: преследование амалын  2-тӥ интые потӥз, нош масс-стартын зарни медаль басьтӥз. Жаляса верано, та  вормонъёсыз Европалэн чемпионатаз шедьыны ӧз юрттэ.

Параспорт

Быдэс комплект

Инвалид спортсменъёслэн куасэн бызьылонъя но биатлонъя Азилэн кубокез понна нюръяськонзы ортчиз.

Ӵошатсконъёс радъямын вал Лымшор Кореяын. Пхёнчхан городэ 6 странаысь 40 пала спортсменъёс люкаськизы. Ас кужымзэ эскериз Алнаш ёросысь Владислав Лекомцев но. Куасэн бызьылонъя ӵошатсконъёсын со зарни но азвесь медальёс басьтӥз. Биатлонъя вожвылъяськонъёсын солы ӧжытгес удалтӥз: одӥгаз стартын 3-тӥ инты басьтӥз, нош мукетаз 4-тӥ интые кылиз. Та вие Владислав дасяське февраль толэзь пумын Германиын ортчоно стартъёслы, отын азьланьтӥськоз инвалид спортсменъёслэн Дуннелэн кубокез понна нюръяськонзы.

Дасяз Валентина Емельянова

Удмурт Дунне
By Удмурт Дунне 8 февраля, 2016 13:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<