Спорт иворъёс

Удмурт Дунне
By Удмурт Дунне Февраль 19, 2016 13:02

Куасэн бызьылон

 Вылегжанин вормиз!

Азьланьтӥське дуннеысь куасэн бызьылӥсьёслэн кубок понна нюръяськонзы. Берло ӵошатсконъёссы Швециын ортчизы. Максим Вылегжанин вормисьёс пӧлы шедьылӥз.

Таиз тол Шарканысь спортсмен понна секытэн сётске, угось котыртӥз бергазы висёнъёс. Ярано, сезон йылпумъяськон азьын ке но, Максим медальёс дорозь сузьтӥськиз. Классика амалэн 10 иськеме бызьылонын зарни медаль басьтӥз. Нош 15 иськемъем масс-старт секытэнгес сётскиз: вормисе потӥз Сергей Устюгов, нош Максим Вылегжанин 6-тӥ инты басьтӥз. Пусйыны кулэ, куать кужмо спортсменъёсты висъяз 1,3  секунд гинэ.

Биатлон

Кутсконэз ӟеч

Удмуртиысь спортсмен Александр Поварницын кужымзэ эскериз дуннеысь биатлонистъёс пӧлын. Америкаысь Преск-Айл городын ортчем ӵошатсконъёсын со ассэ умоен возьматӥз.

Дуннеысь биатлонистъёслэн кубок понна нюръяськоназы егит спортсмен малпамтэ шорысь вуиз. Угось ӵапак та вакытэ Россиысь кужмо биатлонистъёс Евгений Гараничев но Алексей Слепов Тюменьын ортчоно Европалэн чемпионатэзлы дасясько. Егит биатлонистмы нимо-даноос пӧлын ӧз ыштӥськы. Спринтын со 28-тӥ вал, преследование амалын 10-тӥ интые ӝутскиз. Эстафетаын но аслэсьтыз этапсэ умой ортчиз. Жаляса верано, Россилэн командаез эстафетаын 4-тӥ интые кылиз.

Лэчыт син

Можгаысь биатлонист Ульяна Кайшева Россиысь ӵошатсконын вормонъёс басьтӥз.

Тюмень улосысь Уват городын Россиысь биатлонистъёслэн кубок понна нюръяськонзылэн оглюкетэз ортчиз. 7,5 иськем сюрес вылын но марафонын вормисе потӥз Ульяна Кайшева. Ӧжытак ӧз удалты суро эстафетаын. Евгений Шамеевен џош бызьылыса, 4-тӥ интые кылиз.

Олимпиада азьын

 Вормисьлы — коньдон

5-тӥ-21-тӥ августэ Бразилиысь Рио-де-Жанейро городын Олимпиада ортчоз. Удмуртиысь отчы 17 мурт мыноз.

Олимпиадаын но Паралимпиадаын медаль басьтэм спортсменъёслы коньдон премия висъяське. Кызьы ивортӥз мугорез кыдатон культурая, спортъя но егитъёсын ужан политикая министрлэн воштӥсез Павел Вечтомов, зарни, азвесь но туй медаль басьтэмъёслы Удмуртилэсь 1,8 миллион, 1 миллион но 700 сюрс манет висъяськоз. Со сяна, Россилэн бюджетысьтыз зарни понна  4 миллион манет, азвесь понна 2,5 миллион манет, туй медаль понна 1,7 миллион манет сётыны чакламын.

Спартакиада

 Вормонэз берыктоно!

Та нуналъёсы Ижысь Г. Кулакова нимо спорткомплексын Россиысь Кыл кутытонъя управлениын ужасьёслэн тол спартакиадазы ортче. Вожвылъяськонэ вуэмын 37 улосъёсысь командаос.

Кыл кутытонъя управлениын ужасьёслэн куасэн бызьылонъя но тол двоеборьея ӵошатсконъёссы кыкетӥ арзэ Удмуртиын ортчо. Кылем арын шаерысьтымы кыл кутытон удысын ужасьёслэн командазы огъя зачётын нырысетӥ инты басьтӥз вал. Туэ но вормонзэс утьыны тыршо. Нырысетӥ нуналаз нылкышноос 5 иськеме, воргоронъёс 15 иськеме куасэн бызьылӥзы. Вормисе потӥзы Киров улосысь но Коми Республикаысь куноос. Удмуртиысь команда понна бызьылӥсьёс Александр Уткин но Кирилл Вичужанин 4-тӥ, 7-тӥ инты басьтӥзы.

Валлян вань спортсменъёс вакчи сюресэ бызьылыны быгатэмзэс эскеризы. Таяз учыре но шаерысьтымы спортсменъёс вормон дорозь ӧз сузьтӥське. Со понна Удмуртиын вордскем Ольга Сергеева, Лилия Васильева, Елена Решетникова, Дмитрий Япаров но мукетъёсыз ас вормонъёсынызы мукет улосъёсты данъяло…

 

 

Удмурт Дунне
By Удмурт Дунне Февраль 19, 2016 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<