Покчи нылпиос удмурт кылэз видео пыр дышетозы

Удмурт Дунне
By Удмурт Дунне 1 февраля, 2016 15:38

чингыли«Шунды» огазеяськонысь егитъёс нылпи садэ ветлӥсь но пичи классъёсын дышетскись пиналъёс понна «Чингыли» проект малпазы. Табере пиналъёс удмурт кылэз но шаермылэсь историзэ дышетозы электрон шудонъёс но видео пыр.

Ичи лыдъем калыкъёслэн улоназы одӥгез тужгес сюлмаськытӥсез ужпум – анай кылэз но лулчеберетэз утён. Таӵе югдур удмуртъёс пӧлын но. Покчиослэсь мылкыдзэс бурдъяны юрттозы компьютер технологиос. Кунгожсьӧр кылъёсты дышетон понна сыӵе программаос трос ни, нош удмурт кылъя мультимедийной пособиос тырмыт ӧвӧл.

Югдурез тупатон борды басьтӥськиз удмурт егитъёслэн «Шунды» огазеяськонзы. Егит азьветлӥсьёс нылпи садэ ветлӥсь но пичи классъёсын дышетскись нылпиос понна «Чингыли» диск поттыны малпало. Покчиос 6 минутъем видео-урокъёс пыр удмурт кылэн, лулчеберетэн, шаермылэн историеныз но котыр дуннеен тодматскыны быгатозы, дышетскозы утьыны инкуазез но пӧйшуръёсты, гажаны анай-атайёссэс но эшъёссэс.

Оглом кылдытэмын луоз 10 видео-урокъёс. Котькудӥз бордын юнматэмын луозы кылтӥрлыкез узырмытӥсь но йырвизез сынась шудонъёс. Выль удмурт кылъёсты дышетыны юрттоз иллюстрациосын аудиословарь. Со сяна, дискысь шедьтыны луоз егит удмурт гожъяськисьёсын малпам аудио-выжыкылъёсты, кылбуръёсты но мадиськонъёсты.

Мультимедийной проект бордын ужаны удмурт азьветлӥсьёс кутскизы ни, толэзь ортчыса, нырысетӥ емышъёссэс адӟыны луоз.

«Чингыли» проект вормисе потӥз коммерческой луисьтэм мерлыко огазеяськонъёс куспын радъям Дышетонъя но наукая министерстволэн вожвылъяськоназ. Проект бордын тыршо удмурт егитъёслэн «Шунды» огазеяськонзы, Удмурт Элькунысь Дышетонъя но наукая министерство, «Мынам Удмуртие» телеканал. 

Анастасия Тутаева

Удмурт Дунне
By Удмурт Дунне 1 февраля, 2016 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<