Подшивалэ вуиз трамвай

Удмурт Дунне
By Удмурт Дунне 18 февраля, 2016 12:38

Одӥг пол вазь ӵукна валес вылам назьылляськыса кыллисько. Сюлэмам  туж шуныт, югыт, капчи. Со куспын ӧс усьтӥськиз но, кузпалы «кофе в постель» шуыса пыре. Улытозям  вайылэмез ӧй вал, паймыса синъёсме ӵушылӥсько: ишан-а, мар-а таӵе? Мыным бен со «кофе в постель» кулэ но ӧвӧл, азьтэмъёс гинэ валесын сисько. Озьы ке но сюлмам уката шуныт, югыт, капчи луиз.

065846,город Ижевск,общественный транспорт,трамвай,рельсы,поворот,улица Льва Толстова,улица Шишкина

Уже мыныны шуыса капка сьӧры потӥ но, дымбыр-дамбыр карыса, уллапалась трамвай тубе. Сюлмы вераны луонтэм шумпотонэн пачылаз. Куке но депутатъёслы вазиськи вал, милям урамтӥмы центрозь, гурт шорозь, шуисько, маршрутной автобус мед лэзёзы шуыса. Ну, малпасько, автобус гинэ ӧвӧл, трамвай лэзиллям, таксиед ик кулэ ӧвӧл. Депутатъёслы тау карыса йыбырттоно луоз. Соос но шум мед потозы милям шумпотонмылы. Трамвай мон вадьсы ик дугдӥз но, пукси. Сюлэмам шуныт, югыт, капчи луиз, прак лобӟем потэ, но бурдъёс ӧвӧл.

Центре вуи но трамвайысь васьки. Олокытысь-марысь дорам шокпуль гинэ вуиз кемалась пумиськылымтэ эше. Мынам тыныд тыронэ вань, пе,  озьы шуыса, сюрслыксэ мычиз. Сётыкуз басьтоно, ато эшшо 5 ар ум адӟиськылэ. Мычем коньдонэз  чаляк капыртӥ но кисыям понӥ. Кык-куинь вамыш лэсьтыса вуттӥ оло ӧй, бускеленым пумиськи, шуэ, сюрс манетэд ӧй сюрысал-а, пе, пунэмен? Шумпотыса ик шуисько, да не вопрос, ме, ӵапак тыныд дасяса возисько вал. Сюлэмам туж шуныт, югыт, капчи луиз.

Ужан интыям пырыса гинэ вуттӥ, одӥгез ужасьмы шуэ: тонэ директор дораз ӧте, на ковёр. Ну мынӥсько ни кышкаса, куалекъяса, нош ик лек синъёсыныз вань пуштросэз бугыртоз, пӧй. Кабинетэ пырыса, пиньёсы ог-огзы борды йыгаськемен, мырдэм ӟечбуръяськи. Куалекъямме шӧдыса, лэся, директор пуксьыны косӥз,  эн кышка, пе, Лукерья Ивановна, мон тӥледыз шумпоттыны малпасько. Куараез небыт, синъёсыз шунытэсь, ымдурыз пальпотэ. Шораз учкыса, куалекъянэ ик ортчиз. Со куспын олокытысь-марысь крезьгур куара кылӥськиз, кабинет тыр калык люкаськиз. Валаса но ӧй вутты, гадям медаль ошизы, киям конверт донгизы. Тӥ, пе, табере ужысь ветеран. Шумпотэменым тачыр эктӥсько, айы ӟазег кадь. Сюлэмам нош ик шуныт, югыт, капчи луиз: вина юытэк но, тёп-тёп ик кудӟи, ява.

Ӝытазе ужысь бертон сямен магазинэ нянь басьтыны пыри. Кык сукыри   понна вуз карись 20 копейка куриз. Паймеменым ымы ик усьтӥськиз, собере, юри серекъяса, шуисько: мыным, пӧй, 1 бутылка водка кулэ на. Счётэныз шильк-шальк лыдӟиз но шуэ, 3 манет 82 копейка, пе. Соку, пӧй, тани тӥледлы 100 манет, мар но со мерталэ ваньмызлы. Быдэс мешок тыр товаре луиз, эшшо ке сдачи сёто на вал. Соиз, шуисько, тӥледлы «чаевой». Сюлэмам шуныт луиз, малпасько, медальме куал-куал мисько ни. Лавка азе потӥ но трамваез возьмасько. Кылӥсько, жингыр гинэ сигналитьтэ, нош ачиз трамвай уг адӟиськы. Возьмасько, возьмасько, нош со уг вуы, куаразэ гинэ сётэ.  Пельы жон ваземысь, сайкай: будильнике озьы жингыртэ вылэм. Эхма, кыӵе сюлэмам шуныт, югыт, капчи вал!

ЗАХАР ГАЛИ

Туспуктӥз А. Горбунов

Удмурт Дунне
By Удмурт Дунне 18 февраля, 2016 12:38