Ож нылпиосты кыклы люкизы

Удмурт Дунне
By Удмурт Дунне 18 февраля, 2016 12:45
13648,пнсионеры,отдел пенсий Ленинского района

Таяз арысен война вакытэ вордӥськем пенсионеръёслы пенсизэс будэтыны малпазы.

Таяз арысен война вакытэ вордӥськем пенсионеръёслы пенсизэс будэтыны малпазы.  Кӧня ке но манетлы бадӟымгес пенсия басьтом шуыса, пересьёс шумпотӥзы. Но таин валче нош ик ӝоже усемъёс люкаськизы.

Угось та льготаез ужам стажен герӟазы. Бадӟыматэм пенсия басьтон понна, пе, нылкышноослэн ужам стажзы 40 арлэсь, нош пиосмуртъёслэн 45 арлэсь ӧжыт медаз луы.

Кин ке малпаз меда война вакытэ стаж сярысь? Вань калык ужаз тушмонэз вормон понна. Сием потонзы шоры учкытэк, 7-8 аресъем нылпиос тыршизы колхоз бусыосын, пудо утялтонын, нош ужамзы понна бригадирлэн тетрадяз трудодень  нимаськись бодыос пуксьылӥзы.

Соин ик туж валантэм войнаысь нылпиос сярысь законэз ужам стажен герӟамзы. Вылаз ик, со вакытъёсы кыӵе архивной ужъёс йӧназ нуиськизы? Кылсярысь, Грак ёросысь «Родина» СПК-ын  1958-тӥ арысен гинэ ужам сярысь материалъёс вань. Со дырозь нокинлэн но кытын мар ужамез тодмо ӧвӧл. Со понна янгыш шат война дыръя вордӥськем но улэп кылем адямиос?  Сюлэм вӧсь луыса учконо, кызьы туннэ администрациостӥ, архивъёстӥ, калыкез улон-вылонын утёнъя но пенсиосъя фондъёстӥ ветло пересьёс. Пенсизэс кӧня ке манетлы будэтон понна утчало,  кытысь ке одӥг яке  ӝыны ар ке но стажзы уз поты меда шуыса.

Мон понна чидантэм возьыт та законэз кутэм депутатъёсмы понна. Котькыӵе умой закон мед луоз, но со кинэ ке сантэма, ултӥя яке вӧсь каре ке, сыӵе законэз кутыны уг яра. Война вакыт но, война бырем бере но 10-15 ар улон туж секыт вал. Эн жалялэ кӧня ке манет коньдондэс секыт ож дыръя улэм нылпиослы!

Редакцилэсь. Тодады вайытӥськом: 2015-тӥ арын 16-тӥ ноябре Удмурт Республикаысь Правительство юнматӥз «Куд-ог категориысь гражданъёслы улон-вылонын социальной юрттэт сётон сярысь» законэз. Вераськон мынэ ож вакытысь нылпиослы толэзьлы быдэ коньдонэн юрттэт но удостоверениос сётон сярысь. Та юрттэт чакламын кык категориосы пырись муртъёслы. Нырысь ик, 1937-тӥ арын 31-тӥ декабрёзь вордӥськем муртъёслы, кудъёсызлэн нокыӵе льготаоссы та дырозь ӧй вал, но ӟеч ужамзы понна наградаоссы, данъянъёссы сярысь кыӵе ке но документъёссы вань яке та сярысь трудовой книжкаосазы гожтэмын.  Та адямиослы толэзьлы быдэ ватсаса сётӥськоз 500 манет. Юрттэт озьы ик чакламын 1945-тӥ арын 31-тӥ декабрёзь вордӥськемъёслы, воргоронъёслэн ужам стажзы 45 арлэсь ятыр, нош нылкышноослэн — 40 арлэсь ятыр ке. Озьы ик ӟеч ужамзы понна наградаоссы, данъянъёссы сярысь кыӵе ке но документъёссы вань яке та сярысь трудовой книжкаосазы гожтэмын ке. Таосызлы 300 манет тыр юрттэт чакламын.

Та категориосы пырем муртъёслы ватсаса коньдон висъяськоз таяз арын 1-тӥ январьысен элькунысьтымы Калыкез утён, семья но демография политикая министерство пыр. Ватсаса коньдон басьтон понна вазиськоно улон интыосысь  калыкез улон-вылонын утёнъя ёзъёсы.

В. Крестьяниновлэн гожтэтэз пумысен вазиськимы Грак ёросысь калыкез улон-вылонын утёнъя управленилэн кивалтӥсезлы Н. Колчиналы. Нина Петровналэн верамезъя, та дырлы ёросын ог 38 куриськон кутэмын ни ватсэт пумысен. Ож вакытэ вордӥськемъёслы толэзьлы быдэ ватсаса коньдон сётон пумысен шаерамы закон кутэм бере управление вазиськисьёслэн лыдзы трослы йылэм. Тани туннэ но, пе, вазиськиз 39 ар ужам стажен нылкышно.

— Юрттыны ӧм быгатэ, — шуэ кивалтӥсь, — ужам аръёсыз пумысен солы азьвыл тыршем интыяз, Узбекистанэ, вазиськоно луоз. Законын куронъёс вамен милям потэммы уг луы. Калык пӧлын пӧртэм мылкыдъёс вань ке но, та пумысен милемды уг куарето. Министерство но Правительство ож вакытысь нылпиослы коньдонэн юрттэт сётон пумысен  эскерон ортчыто.

Виктор Крестьянинов,

Грак ёрос, Вуж Эгра гурт

Туспуктӥз А. Горбунов

 

Удмурт Дунне
By Удмурт Дунне 18 февраля, 2016 12:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<