Нунал бӧрсьы нунал. Ёросъёсысь ивор сузьет

Удмурт Дунне
By Удмурт Дунне Февраль 19, 2016 14:44

Яр

Гурезь пушкын — ты

2014-тӥ арын Укана черкогуртын туристъёс понна «Поркар веранъёс» маршрут усьтӥськиз.

Черкогуртысь библиотекаын ужась Елена Булдакова  верамъя, Укана сярысь трос тунсыко веранъёс кылемын, соосты калык доры вуттон сярысь сюлмаськыса ик, туристъёс понна сюресъёс кылдытэмын. Укана котырын вань вашкала калыклэн тушмонъёслэсь утиськон интыез но аспӧртэмлыко ошмес. Пӧзисьлэн вуэз гурезьысь потэ. Со адямилы огпол гинэ усьтӥське, кыкетӥзэ сое адӟыны уг луы ни, пе.

Нялтас вераса, Яр ёросысь тэльёс пӧртэм будосъёсын узыр. Кылсярысь, шедьтэмын шер пумиськылӥсь но Горд книгае пыртэм кикыката (венерин башмачок) сяська.

Балезино

16 вал пыдъяськиз

Мурт ваньбурлы 4 мурт синмаськем.

Удмурт Республикая МВД-лэн пресс-службаез ивортэмъя, Балезино ёросысь 4 мурт вал лушканы дышем. Фермаос вӧзысь вал котыртэмъёсысь пудоез «Газель» машинаязы пуктыса, нуылӥллям но вузаллям. Йыртэмасьёс ӵемгес кузёяськиллям уйпал ёросъёсын. Озьы 2011-тӥ-2015-тӥ аръёс куспын 16 валэз лушкаллям. Йыртэмасьёс вылэ уголовной уж ӝутэмын, эскерон азьланьтӥське на.

Якшур-Бӧдья

Тэльлы гочазы

Кыква гурт котырысь тэль ворасьёсты ӝегатӥзы.

Кык воргоронъёс одӥг машина пу келямзы бере, кыкетӥзэ тырмытӥллям ни вылэм. Тодмотэм адямиослэсь укыр ӝог бергамзэс синйылтэм со вакытэ тэльын ужась бригадалэн кивалтӥсез. Со ик полициын ужасьёслы ивортӥз. Тэль ворасьёсты кырмизы. Якшур-Бӧдья ёросысь следователь Елена Кашина ивортэмъя, лушкаськисьёс ӝегатэмын, уголовной уж ӝутэмын. Лушкем ужзы понна соос 5 арлы пытсэт сьӧры шедьыны быгатозы.

Дэри

Граната зыръязы, автомат бичазы

Арлы быдэ ёросысь пиналъёс вожвылъясько «Юнармеец» конкурсын, таяз учыре соос Изгурт школае люкаськылӥзы.

Ужрадэ лыктӥзы ёросысь 14 школаысь 24 командаос, ваньмыз-ӧвӧлэз 96 пиналъёс. Ыбылӥськыны, автоматэз сэрттыны-бичаны быгатэмзэс возьматэм сяна, шуг-секытъёсын полосаез ортчизы. Отын пиналъёс граната зыръязы, противогазэн бызьылӥзы, шуге-леке вуэм муртлы нырысетӥ юрттэт сётӥзы. 10-тӥ-11-тӥ классъёсын дышетскисьёс пӧлын ваньзэс азьпалтӥзы Совхозной, Якшур но Казьмас школаосысь командаос, нош 7-тӥ-9-тӥ классъёс пӧлын вормисе потӥзы Казьмас, Ожмос но Ягул школаосысь пиналъёс.

Камбарка

Буре вайизы

15-тӥ феврале Камбаркаысь шор площадьын буре вайизы Афганистанын оже пыриськемъёсты.

Ёросысь военной комиссариатлэн ивортэмезъя, афган оже Камбарка ёросысь 34 мурт ветлӥз. Покчи сержант, боевой машиналэн водитель-механикез Владимир Чернышев, покчи сержант, спецназысь нимысьтыз ёзлэн командирез Марс Шабакаев но рядовой, танклэн водитель-механикез Василий Мичков улэпкын ӧз бертэ, соос пусъемын Горд Знамя орденэн. Жаляса верано, вордскем палъёсазы бертэм воин-интернационалистъёс пӧлысь но туннэ нуналлы 13-ез улэп ӧвӧл ни.

Сьӧлта

Ӵошатскозы пуныос

Вуоно арняе Кӧпка черкогуртысь лайка выжыысь пуны вордонъя питомникын ӵошатскон ортчоз.

Ужрадэ вуыны чаклало Россиысь пӧртэм улосъёсысь лайкаосты вордонэн вырись 20 пала командаоссы. Кӧпкаос но та ужрадлы тыро-пыдо дасяськемын, вожвылъяськонэ 3 команда пыриськоз. 3 нунал ӵоже соос возьматозы, кызьы лайка пуныосын ӵош кутоно кырпарсез но гондырез. Пуныослэсь кышкасьтэм, провор луэмзэс дунъялоз нимысьтыз кылдытэм комиссия. Кӧпка питомникен кивалтӥсь Владимир Рябов верамъя, таӵе вожвылъяськон 25-тӥ арзэ ортчытӥське. Пусйыны кулэ, Удмуртиысь лайкаос ӵем дыръя вормисьёсы луо.

Кияса

Анай-атайёс но дышетско

Ёрос центрысь 5-тӥ-8-тӥ классъёсын дышетскись нылпиослэн анай-атайёссы понна педагогикая но психологияя курсъёс кутскизы.

Кияса ёрос администрациысь дышетонъя управлениын ужась специалист Людмила Уткина верамъя, туала вакытэ мумы-бубыос но пиналъёс куспын трос валамтэос кылдыло. Кусыпъёссэс тупатон вылысь нимысьтыз курсъёс радъямын. Школае люкаськем анай-атайёслы он-лайн амалъя лекциос лыдӟо Ижысь специалистъёс. Соос тодмато нылпиосты визьнодан амалъёсын, законъёсын. Нырысетӥез урок 10-тӥ феврале ортчиз, отчы 13 мурт лыктӥз. Ужрадэз ортчытӥсьёс оско, визь-кенеш басьтыны мылкыд карисьёслэн лыдзы азьланяз йылоз.

Дасяз Валентина Кутузова

Удмурт Дунне
By Удмурт Дунне Февраль 19, 2016 14:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<