Мон лыктӥ отчы, кытчы кулэ.

Удмурт Дунне
By Удмурт Дунне 1 февраля, 2016 10:23
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
IMG_6196

С. Виноградов адӟытонзэ усьтонын.

27-тӥ толшоре Удмуртиысь калык художниклы Семён Виноградовлы тырмиз 80 арес. Таин валче Ижысь Суредан искусствоосъя музейын усьтӥськиз солэн бадӟым адӟытонэз.

Семён Виноградовлэн выставкаяз трос калык люкаськиз: удмурт но ӟуч интеллигенция, тодосчиос, студентъёс, гуртоос. Тамында адямиосты адӟыса ик, валаськод, макем гажа калык Семён Виноградовез. Нош ачиз Удмуртиысь калык суредась, профессор туж востэм но кепыр вайыса кадь сылӥз. Шӧдӥське, дышемын ӧвӧл со ушъян кылъёслы.

Художникъёс куспазы паймыса вераськизы, макем усто но зэмлыко возьматэ гурт улонэз Семён Виноградов, макем чебер пќлэстӥсько турлы но нырысь учкыса тупасьтэм буёлъёс. Выставкаын возьматэмын художниклэн 50 ар ӵоже суредам ужъёсыз. Татысь котькудӥз шедьтоз сюлмызлы, мылкыдызлы тупасьсэ. Зэм но, кинэ ке паймытӥз пичи гуртлэн шыпыт чеберез, мукетъёсыз синмаськизы скал кыскись нылкышноослэн тык-тык мугоръёссылы, куинетӥосыз тодазы вайизы, луоз, асьсэлэсь нэнэйёссэс, Семён Николаевичлэн анаезлэсь тусбуйзэ учкыса.

Выставкае лыктэмын вал Алнаш ёросысь Азамат гуртысь «Уӵыос» но «Азамат ӧрӟиос» ансамбльёс. Ужрадэз усьтон азьын соос музейын кырӟаса но, эктыса но вуттӥзы. Мылкыд сётыса Семён Николаевич ачиз но азаматысь усточиосын ӵош удмурт эктонэз тапыртӥз. Азамат школаысь дышетӥсь Ольга Владимировна Рябина вера:

— Нылпиос солэсь суредъёссэ учко ке, шуо: тазэ тодӥськом, созэ но тодмаськом… Нош вордӥськем Шайтангуртэзлэн суредамтэ сэрегез ик ӧвӧл, дыр. Шумпотӥськомы, Семён Николаевич ӵем вуылэ дорамы нылпиосын пумиськылыны, уг вунэты милемыз.

Историяя, кылъя но литературая Удмурт институтлэн директорез Алексей Загребин шуиз:

— Семён Виноградов — зэмос калык художник, малы ке шуоно солэн суредъёсаз — асьме музъеммылэн буёлъёсыз. Отын удмурт инбам, удмурт возьёс, удмурт ымныръёс. Удмурт кун университетэ дышетскыны лыктыса но этнографияя кафедрае пырыса, нырысь ик син шорам йӧтӥз С. Виноградовлэн «Колхоз праздник» этюдэз. Соку валай:  мон лыктӥ отчы, кытчы кулэ…

Семён Николаевич ужаз Историяя, кылъя но литературая Удмурт институтын но. Удмурт пужыосты, пусъёсты эскериз но калыке поттӥз, озьы наукалэн историяз солэн аслаз бамез. Та паймымон адями улэ искусствоен, но малпаське учёной сямен.

Скал возьмась.

Скал возьмась.

Шуныт кылъёссэ ас пал адямиезлы ӧз жаля культурая но туризмъя министр Владимир Соловьёв:

— Семён Николаевич туж ӟеч но востэм адями. Монэ шумпоттэ, со министерствое кожалля шуыса. Но мон калык художник шуыса, ќсэ уг џыжы, черодзэ вите приёмнойысь диван вылын. Огпол умме но усем. Шумпоттэ солэн ужамез, буйгасьтэм мылкыдыз.

Удмурт Элькунлэн Тӧроез Александр Соловьёв Удмуртиысь калык художникез телеграммаен ӟечкылаз. «Аспӧртэмлыко суредась, тодмо этнограф, шаермылэн но калыклэн данъяськонэз. Тӥтэк син азе уд пукты удмурт элитаез. Картинаосты зэмлыко возьмато огшоры калыклэсь улонзэ но мылкыдъёссэ-малпанъёссэ, Удмурт шаерлэсь чеберлыксэ но лул-кужымзэ, вашкала сямъёсты но йылолъёсты. Оскисько, уно поколениос ӵапак Тӥляд суредъёсты пыр тодматскозы но усьтозы асьсэлы чебер но узыр удмурт дуннеез», — гожтэмын отын.

Галина Семёнова

Туспуктӥз Кристина Романова

Удмурт Дунне
By Удмурт Дунне 1 февраля, 2016 10:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<