Л. Буранова: Удмурт — со туала!

Удмурт Дунне
By Удмурт Дунне 29 февраля, 2016 11:47

Кыӵе инты басьтэ асьмелэн улонамы анай кыл? Малы удмуртъёс соин герӟаськем ужпумез валтӥсь радэ потто? Анай кыллэн нуналэныз валче та ужпумъёсъя кенешиськом нациосын ужан политикая министрен Лариса Бурановаен.

_DSC0013

Л. Буранова: удмурт калыкез возьматоно пӧртэм проектъёс пыр.

— Лариса Николаевна, тӥ вордӥськиды но быдэ вуиды шоркарын. Мар тӥ понна анай кыл? Кыӵе вал со доры сюрес…

— Анай кыл — со семья, мынам ӵужае, песяе, Дэри, Кучыран гуртъёс. Отын мынам тужгес шудо пичи вакытъёсы ортчизы. Дэриысь ӵужае дорын ми котьку удмурт сямен вераським, ӟучсэ со урод тодэ вал. Алнаш ёросысь Кучыран гуртысь песяе но удмурт сямен вераськиз.

Огпол песянай доры гужемлы кельтӥзы. Отын ик вынъёсы улӥзы. Соос ӟуч кылэз ӧз тодэлэ, нош мон — удмуртсэ. Куд-ог верамзэс воксё уг валаськы, апае доры мыныса, юасько ни. Со валэктэ. Собере юасько: тани тае удмурт сямен вераме потэ, кызьы шуоно? Апае валэктэ. Шумпотыса вынъ-ёсы доры бызисько, со вискын ӝынызэ кылъёсме нош вунэтӥсько ни… Городэ бертэме бере анай-атае кенешизы: кызьы ке тае удмурт кыллы дышетоно. Озьы ар ӵоже семьяын удмурт сямен вераським. Вуонояз гужем нош ик Кучыранэ келязы. Ну, малпасько, возьмато, кыӵе чебер удмурт сямен вераськисько. Нош вынъёсы монэн ӟуч сямен вераськыны кутскизы, школае мыныса, ар ӵоже дышетӥллям…

— Али учконо ке, паймымон югдур кылдэ: гуртоос анай кылзэс вунэто, нош шоркарын улӥсьёс удмурт кыл пала берытско. Ижын удмурт кылэз дышетонъя курсъёс но туэ трослы йылӥзы. Маин со герӟаськемын?

— Ижын 9 интыын али удмурт кылъя курсъёс ужало. Со сяна — Воткаын, Глазовын, Вавожын, Можгалан, Сьќлталан но Кезын. Та, малпасько, куке-соку быръем стратегимылэн емышез. Ма сярысь вераськон? Тани учке ай, мукет фин-угор калыкъёслэн (коми, пор, мордва) кылъёс сярысь законъёссы кутэмын ни вал 1990-тӥ аръёсы, асьмелэн 2001-тӥ арын гинэ. Выль даур, выль шӧдонъёс. Тросэз мукет калыкъёс законъёсазы анай кылзэс одно дышетоно шуизы но гань-гань кариськизы. Милям катмы ӧй вал бере, со буш омырез маин ке тырмытоно, будэтоно вал. Ижын удмурт кыл ӧз чузъяськы, татын сомында удмуртъёс улӥзы ке но! Ӧй вал удмуртлыкез вӧлмытонъя проектъёс, ваньмызлы усьтэм бадӟым ужрадъёс. Азямы ужпум пуктӥм: удмуртъёсты, удмурт культураез пӧртэм проектъёс пыр возьматоно, шарае поттоно. Али эскеронъёс но возьмато: шонер сюрес бырйиськеммы, удмуртлыкез пыӵатон шоры ӟечен учкисьёслэн лыдзы арлы быдэ йылэ. Соин ик дыр вуиз кун кылъёс сярысь законамы но воштонъёс пыртыны.

— Удмуртилэн Тӧроез  А. Соловьев удмуртъёслэн 13-тӥ съездазы вераз, кун кылъёс сярысь законэ воштонъёс Кун Кенешын дасясько ни шуыса. Кун Кенешлэн Тӧроез В. Невоструев но тае пусйиз. Парламентын кылдытэмын законэ воштонъёс пыртонъя нимысьтыз группа. Тӥляд министерстводы та уже кызьы пыриське?

— Ми со кат понна кыл кутћськом. Ӵем дыръя милям министерствомы ик Кун Кенешысь группалы маза уг сёты. Али туж ӝег уж мынэ, со проектысь котькуд кыл эскериське: пумит уг луы-а со федерал законлы, уг тӥя-а кинлэсь ке правооссэ? Ваньмы ӵош — «Удмурт Кенеш» огазеяськон но, Культурая но туризмъя, Дышетонъя но наукая министерствоос но — кенешиськом, огкылэ вуиськом. Малпасько, та проектэн депутатъёс азе ачиз элькунмылэн Тӧроез потыны кулэ. Со — кун политика, со — культурая инвестициос.

Но удмурт кыл мед гинэ луоз шуыса законэз кутонлы мон пумит. Лэсьтоно ке — умой-умой. Мар герӟаськемын удмурт кылын, удмурт культураен, со ваньмыз 2-3 поллы ӟечгес мед луоз: тужгес устоез методика, тужгес устоез дышетӥсь… Адямиослы тунсыко мед луоз. Сотэк, шуом, лыктоз адями нырысетӥ уроке, пукоз, кылзоз но, пыдыз отчы кыкетӥзэ уз кыскы ни. Ма, косӥзы бере ветлоз ни, но огъя мылкыдыз урод кылёз ук, сыӵе мылкыдзэ со нылпиосызлы но палалоз. Озьы луыны кулэ ӧвӧл. Соин ик азьлань мынонъя аспӧртэм карта дасяно. Мар лэсьтоно нырысетӥ араз, мар кыкетӥяз… Шуом, куд-ог школаосын удмурт кылэз одно дышетоно, нош куд-огзэ талы дасяно гинэ ай.

Али удмурт кылъя дышетӥсьёслы уждунзы борды 15 процентъем ватсэт тыриське. Кулэ, дыр, мукет удысъёсын 2 кылын ужасьёслы но сыӵе ватсэтъёс сярысь малпаськыны. Шуом, социальной юрттэт сётӥсь адямиослы, соос пересьёсын анай кылынызы верасько ке. Али Интернетын тулкымъясько: сыӵе ватсэтъёс, пе, нырысь ик чиновникъёслы висъяны малпало. Со озьы ӧвӧл. Чиновникъёсты лыдъяны капчигес бере, соос вылын возьматыны гинэ тыршемын: со ватсэтъёслы кӧня коньдон кулэ луоз. Депутатъёс мед адӟозы: со понна сокем трос уксё кулэ ӧвӧл.

Но мукет сюлмаськон кылдэ на: туннэ нуналлы асьмеос ум тодӥське, кызьы дунъяно адямилэсь удмурт кылын макем ӟеч вераськемзэ. Нош уждун вӧзы ватсэтъёс пыртыны дэмласьком бере, пусъёно: кыӵе ужын кызьыгес тодыны кулэ удмурт кылэз. Адями «Ӟечбуресь!» но «Ӟеч луэ!» вераны быгатӥсько шуыса, ассэ удмурт сямен вераськисько медаз малпа на. Шуом, журналист ке тон, удмурт кылэз тужгес ӟеч тодыны кулэ, нош кыӵе ке музъем комитетын пукиськод ке, оло, сокем мур тодэм но кулэ ӧвӧл.

— Берло аръёсы шоркарамы удмурт кыл тросгес луиз, сое адӟиськом пӧртэм учреждениосысь, лавкаосысь гожъямъёсъя. Но янгышъёс, ӟучысь удмуртэ шонер берыктонъёс пумысь ӵашетонъёс уг чалмо…

— Али малпаськомы шонер гожъяськонъя нимысьтыз сайт усьтыны. Отын пӧртэм удысъёсъя дэмлам выль кылъёсъя кенешон мыноз: кудӥз тупагес кадь, кызьы умойгес луоз. Котькуд 2-3 кыл понна быдэс комиссиез уд люка ук. Милемлы егитъёс но юрттыны дась, «Удмурт-а мон?» форумын соос оскытӥзы: янгышъёсты люканы тыршозы, нимкылъёсъя но шонер гожъяськонъя комиссие ваёзы. Ваньмыз шонер берыктэмын луыны кулэ.

— Тунсыко: 2014-тӥ арын ортчытэм эскеронъёс возьматӥллям, шоро-куспо арлыдоосын ӵошатыса, егитъёс удмурт кылэз ӟечгес тодо

— Мон талы туж шумпотӥсько! Эскеронъёс дыръя адямиослы юан сётэмын вал: кызьы малпаськоды, макем ӟеч тӥ тодӥськоды анай кылдэс? 61,1 процентэз егитъёс «ӟеч» шуизы, 30-40 аресъемъёс пӧлын сыӵеос 53 процент гинэ, нош 50 арессэс ортчемъёслэн — 77 процент. Макем зэмзэ но ӟеч тодо кылзэс егитъёс, вераны шугъяськисько, но та лыдпусъёс возьмато: соослэн асваланзы ӝутскемын. Соин ик азьланезлы осконмы вань.

— Нациосын ужан политикая министерстволэн пӧртэм проектъёсын ужанъя опытэз бадӟым. Берлозэ гинэ учконо ке — «Пельнянь нунал» фестиваль.  Нырысьсэ кадь Ижысь Шор площа
Left Side Content
Right Side Content
дьын сомында удмурт кыл чузъяськиз.  Асьтэос солы кыӵе дунъет сётысалды?

— Пельняньлы сӥзем фестивалез дасясь командалы бадӟым тау. Но, чынзэ вераса, мыным отын удмурт кыл ӧзгес тырмы, фестивальлэсь кабъёссэ возьыны ӧмгес быгатэ. Нырысетӥ фестивальмес ортчытыку, тросэз паймо вал: малы тӥледлы со кулэ?  Но мон верай ни ук, ми бырйимы сыӵе амал: пӧртэм проектъёс пыр удмурт калыкез возьматон. Семьяен, дорен герӟаськем тема пыр поттоно удмуртсэ. Эшшо тросгес адямиос мед адӟозы: удмурт — со мурт ӧвӧл, со ческыт, шулдыр, туала! Фестивале пыриськем котькуд огазеяськонлэн йыраз та малпанэз пыӵатыны луысал на ке…

Арня талэсь азьвыл гинэ шаерамы ортчиз Кун Думаысь пӧртэм калыкъёслэн ужъёссыя комитетлэн кенешез. Солэн ужаз пыриськисьёс удмурт гуртэ но, музейёсы но ветлӥзы. Паймыса веразы: тӥ — зэмосэсь. Удмуртъёс, пе, мукет ӧжыт лыдъем калыкъёсын ӵошатыса, аспӧртэмлыксэс ӧз ыштэ, муртъёслы возьматон понна гинэ удмурт уг карисько, соослэн асьсэлэн дуннезы.

— Лариса Николаевна, вераськонъёс мыно элькунысьтымы Правительстволэн Тӧроез бордын кылэз азинтонъя координационной совет кылдытон сярысь. Мар бордын со ужалоз?

— Та — чагыр малпанэ! Проект дась ини. Удмуртъёслэн съездзы дыръя но ваньзы вераллязы: сыӵе кенеш кулэ. Туж трос юанъёс, кудъёссэ милям министерствомы огназ уз лэсьты. Удмурт кылэн трос огазеяськонъёс выро, но ваньзы асьсэ понназыгес. Нош котькуд арлы умой-умой пусйид ке: туэ тани талы саклык висъяськом, собере ваньмы огъя кужымен мукетыз уж борды басьтӥськом — пӧртэм министерствоос, институтъёс, «Удмурт Кенеш», вань иворчиос… Тӥни соку азьлань ӝоггес мыном, бадӟым ужъёсты капчиенгес быдэстом.

Елена Миннигараева

Туспуктӥз А. Горбунов

 

Удмурт Дунне
By Удмурт Дунне 29 февраля, 2016 11:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<