Курадӟем понна — кузь арлыд

Удмурт Дунне
By Удмурт Дунне Февраль 4, 2016 11:52
SDC13526

У. Зотова секыт улэм-вылэмзэ вера.

Пичи Пурга ёросысь Пичи Бӧдья гуртын улӥсь Ульяна Зотовалы 29-тӥ январе 90 арес тырмоз. Кузпалыз Яша агай улонысь дасо аръёс талэсь азьло кошкиз, 3 нылпиез пӧлысь пичиез гинэ кылемын на.

Жугем тыбырзэ али но шӧдэ

Быдӟым Вормонлы 70 ар тырмонэн валче Ульяна Николаевналы ёрос администрациысь Таукарон  гожтэт келяллям. Дораз пырыкум, Ульяна апай мур малпаськыса пуке вал. Война дыръя ужамме тодам вайыса, кӧты ӝож луиз, пе.  Синву пыр мадиз пинал вакытысьтыз секыт улонзэ.

— Улэмме вераны кутски ке, нунал но, кык но уз тырмы. Анае кулыку, мыным 6 арес вал, нош вынылы — 4 арес гинэ. Атаймы мукет кышно вайиз. Сюрмумы милемыз лыктэмез бере ик ултӥяны кутскиз. Кӧня ке улыса, аслаз но нылпиез вордскиз на. Вань кырсь ужез ужаны, нылпизэ утьыны монэ косэ вал. Сиён кӧттырымон уг сюры. Сиемды потэ ке, мынэ, кураське, шуоз. Мынӥсько ини. Нош ваем кӧттырме  усьтыр-табыр ватэ вал. Собере вӧзысьтымы Оги апай валэктӥз ини: тон, нылы, сётэм сиёнзэс мон доры пырты но Ивандэ, татчы вайыса, сюд, пе.

Кыӵе вожъяськыса учкисько вал школае ветлӥсь эшъёсы шоры. Монэ дышетскыны ӧз лэзе, гуртын ужаны кулэ, дӥськутэд но, пе, ӧвӧл. Нош кулэм анаелэн быдэс сандык дӥськутэз кылиз. Сюранае но атае со дӥськутэз но, мамык валессэ но, базаре нуллыса, вузазы. Милемыз выныным гольык ӟус вылын кӧлатӥзы, уламы мар но со ӟустари тырыса.

Куддыръя школае пегӟыса кошкисько вал, нош сюрмуми, бӧрсям ик вуыса, я ньӧрын, я еэн жугыса, берлань нуылӥз. Эшъёсылэсь гинэ гуртэ сётэм ужъёссэс юаса, мар но со гожъяськыны, лыдъяськыны дыши. Нош кыӵе дышетскеме потэ вал!

Таиз учыр толалтэ вал. Ӵукна султэме бере гольык гинэ азбаре потӥ. Корка пырыса ӧй вуы, сюранай вылтӥм быдэс ведра пож ву кисьтӥз. Мон кема сылӥ, пырыны дӥсьтытэк. Туж кынмеме бере, мар ке луоз лу шуыса, пыри. Коркан бадӟым гур эстӥське. Кот тыбырме куасьтыны гур шоры султӥ. Кытӥ ке ӧвӧл сюранай, душес сямен омырскыса, ӝуась гуре донгыны кутскиз. Мон, йырсияз ӝабырскыса, мырдэм мозмытски. Укное кариськыса, кесяськыны кутски. Нош со уката урмиз, пӧсь ухватэз кутыса, жугыны ӧдъяз, укно ик пилиськиз. Ярам, укно ултӥ Трофим агай кошкыны тупаз, кесяськемме кылыса, пыриз но висъяз ини, оло, виытозяз жугысал. Со сутскем но жугем тыбырме али ке но шӧдӥсько кадь. Дӥськут но дӥсяны ӧй быгаты, пульсам интыосме газетэн шобыртыса сяна, улэме но ӧз луы ни. Ултӥямзылы чидатэк, мон гуртысь пегӟи. Кин ке пырыны лэзиз, отын ик кӧлай, сюдӥзы но, дӥськут но мар но со сёто вал.

10 арес тырмыса, колхозын ужаны кутски. Гужемзэ бусыын ужай, нош толалтэ — фермаын. Ужаме понна 200 грамм нянь сёто вал, сое но мон лушкем вынылы  сюдылӥ. Сое но дышетскыны ӧз лэзьялэ. Быдэ вуэмез бере, городэ кошкыса, ФЗУ-ын дышетскиз, станокен ужаны дышиз. Собере басьтӥзы армие, отысь гуртэ ӧз ни берты, служить карем палъёсаз ик улыны кылиз.

Гурт калык  ӧз кушты

Война кутскиз но, монэ нюлэс кораны лэзизы. Зӧкесь писпуосыз погыръяса, 2 метрен вандылӥмы, люкамы. Отын но, туж сиеме потыса, ужай. Эшъёсы гуртысьтызы сиён ваё вал, нош мыным — нокытысь. Нюлэскысь, валэн уробое пуксьыса, бертылӥм. Нош мон бергес кылисько но пыдын мынӥсько: улон интыямы вуытозь, эшъёсы сиськыса мед вуозы, мон медам адӟы. Татын но ӟеч адямиос ӧз куштэ, патерын улэм кузё кышномы гурт котыраз юрттэме понна сюдылӥз.

Одӥгаз нуналэ, толалтэ, вал вылын бадӟым кузёос вуизы. Милемлы, пе, 1 ужась кулэ, кин мыноз, солы сиён но, дӥськут но сётом. Тае кылыса, соглаш кариськи. Вуттӥзы монэ туж бадӟым нюлэскы. Шораз туж кузесь баракъёс лэсьтэмын. Отчы пыртӥзы но, татысь нокытчы эн пота, тыныд сиён нуллозы шуыса, кошкизы. Улӥсько мон нунал, кык, куинь, нокин ветлӥсь ӧвӧл, сиён гинэ кыӵе ке кышномурт пырта. Паймыса юасько ини та адямилэсь, малы монэ вайизы, номыр но уг ужато шуыса. Со шорам учкиз но шуэ:

— Э, нылы, нылы, йырдэ быдтыны лыктӥд-а, мар-а? Татчы ваёзы тюрьмаын пукисьёсты, туж урод йыруж лэсьтэм адямиосты. Йырыд быгылес дыръя пегӟы татысь, ачим юртто. Уйин капкаез усьто, кошкы. Нокытчы но кожылытэк, весь шонерак сюрес кузя мын.

Вуиз уй. Синмад коть маин ке донгы, номыр уг адӟиськы. Вылаз ик, куазь лымыя, пелляське. Кудпала мыныны валэктӥз бере, сопала ик бызьыса кошки. Кӧня дыр ӵоже мынӥ, уг тодӥськы. Тӧл ӧжыт пуксён вискын вал пыд куара кылӥ. Малпасько, таос, монэ уйыса, лыкто ук, кытчы меда пегӟом?

Сюреслы матын ньылпу будэ, лымы солэсь вайёссэ музъемозь ик някыртэм. Мон, берлань чигнаса, пытьыосме киыным соги но пыри со вайёс улэ. Кӧня ке улыса, мон вадьсы 2 вал вылын адямиос дугдӥзы.

— Ма, кытчы пыриз та лешак, пытьыез но уг адӟиськы, оло, му пыр вияз-а, мар-а? Тон мын азьпала, нош мон мукет палтӥз эскеро, — озьы шуыса, кошкизы.

Кышкаменым кызьы сюлэмы ӧз тэтчы! Кема шыпытак улӥ, кынмыны но кутски.  Татчы  ик эбыляса кулод шуыса, нош ик сюрес вылэ потӥ но азьлань бызи.   Кытӥ каллен мынӥсько, но со адямиос пумитам ӧз сюре ни. Кӧня дыр озьы ортчиз, уг тодӥськы. Куазь ӟардыны кутскыса, нюлэс пуме вуи. Азьпалан бус пыртӥ кадь коркаос адскизы. Мынӥ отчы. Урамын пиосмуртъёс сыло. Юсь пала кытӥ-о мыноно, юай. Одӥгез рос-прос валэктӥз. Сюрес кузя бертыны дӥсьтытэк, писпуос пӧлтӥ ватскысагес мынӥсько. Юсь пала вуи но шур вамен лэсьтэм пичигес выж  улэ пукси, кӧня ке шутэтско шуыса. Дӥськут гылляны ведра-карнанэн васькем кышномурт, монэ адӟыса, копак абдраз.

— Ма, кинлэн-о тон нылыз таӵе, мар кариськод татын?

— Мон Бӧдьялась Матвей Миколлэн нылыз, — шуисько.

— Бен мон но отысь  ук, Пичи Иван Сандра шуо монэ. Мар муген татчы вуид?

Вакчияк мади, мар луиз. Сандра апай монэ, гуртаз нуыса, сюдӥз. Шунаме бере, оло, лумбыт ныс-ныс изиськем. Сайкаме бере нош бертыны потӥ. Гуртам ӧй вуы, бӧрсям ик милицаос лыктӥзы. Нуизы монэ райисполкоме, пегӟи шуыса, тышкаськыны кутскизы. Мон, шуисько, ӧй пегӟы, ужлэсь но уг пегаськы, мынам кутъёсы пӧсьтӥзы, ветлыны номырин луиз. Отысен ик нуизы Ижевск-Балезино чугун сюрес лэсьтонэ. Аэродром лэсьтонын но ужай.

Котькыӵе шуг-секытъёсыз чидатэк ӧз луы. Кыӵе сиеме потыса, дӥськутлы ёрмыса, улӥ, тау Инмарлы курадӟеме понна, кузь арлыдзэ сётэмез понна, анаелы — тазалыко вордэмез понна. Мынам али но висьымтэ дыръям тэк кыллеме уг поты. Туала арын котьмар сиён, дӥськут вань, ул но ул. Тау гурт калыкелы, пичи дыръям но ӧз куштэ, али но бускельёсы эскеро, юртто.

Александра Бочкарёва,        

Пичи Пурга ёрос, Пичи Бӧдья гурт

Удмурт Дунне
By Удмурт Дунне Февраль 4, 2016 11:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<