Котькуд куинетӥез йыруж лэсьтэмын кудӟем йырын

Удмурт Дунне
By Удмурт Дунне 1 февраля, 2016 09:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
0103478,медвытрезвитель

Ижысь медвытрезвителе туэ шедиз ни ог 400 адями.

Югдурез утёнъя министр Александр Первухин кылем арын ужамзылы йылпумъян лэсьтӥз.

Шаермылэн йыр висёнэз — юон. Ульчаосысь кылем арын утялтэмын 24 сюрслэсь ятыр кудӟемъёс. Пыгыр-погыр ветлӥсьёс яке асьсэос йыруж лэсьто, яке сьӧсьёслэн ки улазы шедё — 8 сюрс учыр пусъемын.

— Эгра ёросысь калыкен пумиськонэ потай, — вера генерал-майор. — Тодӥ: Зура черкогуртысь магазинъёсын кудӟытӥсьсэ ӧжыт вузало. Со понна отысь котькуд дасэтӥ коркан курытэныз лушкем вуз каро. Сыӵеосты кыл кутытоно. Угось кытын юон — отын бырон. Кылем арын кудӟем йырын виемын 113 адями. Таин валче гуртъёсысь участковойёслы шаплыгес ужано.

Югдурез, оло, капчиятысалзы медосвидетельствованиея кабинетъёс. Азьланяз соосты усьтыны чакламын Вотка, Сарапул но Глазов городъёсын. Ижын 3 кабинет вань ни. Учётын сыло 2 сюрслэсь ятыр юыны, жугиськыны яратӥсьёс. Таосты югдурез утисьёс ӵем эскерыло. Озьы ке но пӧлысьтызы ог 150-эз виссэ шедьтӥз — нош ик йыртэмаз.

Но законэз тӥян учыръёс юонэн сэрен гинэ уг йыло. Кыкетӥез муг — калык ужлы ёрме. Кисыяз коньдонэз ӧвӧлэн 9 сюрс адями кырыж сюрес вылэ султӥз. Тани Сарапул городысь нокытын ужасьтэм пиосмурт полицейскойёс ки улэ шедемезлэсь азьвыл 7 пол мурт ваньбурез капыръяса вуттэм. Кырмемын уллёен лушкаськисьёслэн 39 кивалтӥсьёссы.

Лушкаськон арысь аре тросгес луэ. Кылем арын со эшшо 18 процентлы йылӥз.

— Та лыдпуслы будыны юртто егитъёс, быдэ вуымтэос, — валэктӥз А. Первухин. — Магазинысь я 8 манетэн кынтэм йӧл, я 30 манетэн чипс потто. Озьы 139 пинал кырмемын. Анай-атайёслы сакгес луоно. Уйшор бере полицейскойёс ульчаосысь 1 сюрс 500 пала огназы ветлӥсь нылпиосты кутӥзы.

Ӵем паймытъяны ӧдъязы доразы ыбылӥськон тӥрлык возисьёс. Кышкыт арбериен 283 кырсь уж лэсьтэмын. 53 мурт, законэз тӥяса, пистолет бичаны кутскем. Калык министерствое ас мылкыд каремезъя вуттӥз дораз костаськись 2 сюрслэсь ятыр боеприпас но 5 килограмм пала пуштӥсь сурет.

2015-тӥ ар возьматӥз: югдурез утисьёслы компьютер удысъя тодон-валанзэс ӝегатскытэк муромытоно — Интернет пыр банк картаосты бушатӥсьёс чутрак йылӥзы. 1 сюрс 431 йыруж пусъемын.

— Мурт уксёез капыръясьёсты шедьтыны туж шуг, — пусйиз министр. — Таин валче чакламын нимысьтыз та йыружъёсты эскеронъя 5 номеро ёз кылдытыны. Котькуд банкомат борды юнматомы калыклы валэктонъёс: кызьы электрон пуйыэз утьыны луэ.

Оглом ар ӵоже ужамзылы министр ӟеч дунъет сётӥз. Россиысь улосъёсын ӵошатыса, йыружъёсты сэрттон-пертчонъя Удмурт шаер азьмынӥсьёс радын. Шараямын 2-3 ар талэсь азьло лэсьтэм 722 йыруж. Розыске сётэм 967 укылтэмъёс пӧлысь кылем арын кырмемын 740-эз.

Ольга Корепанова

Удмурт Дунне
By Удмурт Дунне 1 февраля, 2016 09:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<