Ижысь тодосчиослэн юртазы пӧртмаськизы

Удмурт Дунне
By Удмурт Дунне Февраль 8, 2016 12:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

foto4-portm-08-01-2016

Ижысь Тодосчиослэн юртазы, пӧртмаськонлы сӥзьыса, бадӟым шулдыръяськон ортчиз.

Сое дасязы тодосчи Альберт Разин но Дэри ёросысь Пероггуртысь «Кильтырнаос» ансамблен кивалтӥсь Зоя Ушакова.

Ужрадэ лыктӥсьёсты шулдыр кырӟанъёсын пумитазы Дэри ёросысь Шудья гуртысь «Шудья туклячиос» ансамбле ветлӥсьёс.

Пӧртмаськонын кыӵе гинэ пӧйшуръёс уг адӟисько! Ваньмыз соос люкаськем калыкен ӵош шулдыръясько: экто, кырӟало, маскаръясько но кылбуръёс верало. Ӝытбыт калыкез серекъятӥзы, шулдыртӥзы но аспӧртэм сямъёсынызы паймытъязы Лӧпшо Педунь, Шайтан но туэ арлэн кузёез — Маймыл.

Пӧртмаськонэ асьсэ тунаськон сям-йылолъёсынызы ветлӥзы Пичи Пурга ёросысь «Гожна кенакъёс» ансамбльысь нылкышноос.

— Ми татчы шумпотыса, ӝутскем мылкыдын ветлӥм, — вера коллективен кивалтӥсь Зинаида Елизарова. — Ма, Ижын ортчись ужрадэ кин уз лӧпты мыныны. Юри сьӧрамы курег кутӥмы. Тунаськонмы нош таӵе вал: выж вылэ понӥськом зундэс, ву но нянь. Кудӥз доры бурдо мыноз, со ик адямилэн улоназ туэ луоз. Кылсярысь, нянь узырлыкез возьматэ, зундэс — пардэ шедьтонэз, нош ву — кузпалыдлэсь юись луэмзэ. Озьы ик возьматӥмы на гын сапеген тунаськонэз, «Небыльток» шудонэз, коркась коркатӥ пӧртмаськыса ветлонэз. Мукет ёросъёслэн тунсыко потӥз Пуклё погыллянзы. Ми но табере соослэсь адӟем каромы ни.

Пӧртмаськонэ мыло-кыдо ветлӥзы Алнаш ёросысь Ӧркагуртысь «Выль ӟардон» ансамбльын кырӟасьёс. Гуртысь арлыдо нылкышноос городын улӥсь стилягаослы пӧрмытскиллям. Ӧркагуртъёс шоры учкыса, калык кӧтыз шуг луымон серекъяз.

— Куд-огъёсыз тани нырысьсэ ӝужыт беро пыдкутчанъёс вылэ султӥзы ай, — верало маскарчиос. — Ужрадын мырдэм, ява, пыд йыламы сылыны быгатӥмы.

Ижысь «Чильтэр» ансамбльын кырӟасьёс нылпиосты удмурт дӥсьёсын  поттӥзы. Пиналъёс песянайёсынызы ӵош удмурт кырӟанъёсты синмаськымон чебер кырӟаны быгатӥзы.

Озьы ик вань пӧртмаськисьёсты но тунаськисьёсты шулдыртӥзы Ижысь «Ӟардон» но «Задор мылкыд» ансамбльёс.

Ужрад йылпумъяськем бере калык пӧсь чаен но пыжиськемъёсын утялскиз.

Любовь Тихонова

Туспуктэм: snioo.ru

 

 

Удмурт Дунне
By Удмурт Дунне Февраль 8, 2016 12:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<