Ижын «Егит профессионалъёс» ӵошатскон ортчиз

Удмурт Дунне
By Удмурт Дунне Февраль 29, 2016 10:09
052910,хлебозавод 5,производство,пищевая промышленность,рабочий,молодежь

Ческыт нянь пыжон понна трос тодон-валан люкано.

25-тӥ-28-тӥ феврале шаерысьтымы колледжъёсын, ссузъёсын но техникумъёсын дышетскисьёс пӧлын «Егит профессионалъёс» ӵошатскон мынӥз. Тужгес усто специалистъёсты 14 удысъя бырйизы.

1946-тӥ арын дуннеын кылдытэм «Ворлдскиллс» движение рабочийлэсь данзэ ӝутон сярысь сюлмаське. Егит профессионалъёсты шараян ӵошатскон амалэн ортче. Бадӟым вожвылъяськонэ Россиысь 46 улос пыриське ни, туэысен соос борды итӥськизы Удмуртиысь егитъёс но.

— Таӵе вожвылъяськонъёс огкыл шедьтыны юртто дышетон организациос но шаерысь предприятиос куспын, — шуэ «Ворлдскиллс Россия» центрлэн Удмурт Республикаысь ёзэныз кивалтӥсь Александр Губерт. — Удмуртия котьку данъяськылӥз ужась но зарни киё адямиосын. Туала егитъёслы тросгес верано рабочийлэн профессиез сярысь.

Ӵошатсконэ пыриськизы 16-22 аресъем нылъёс но пиос, ваньмыз-ӧвӧлэз 120 мурт. Соос кужымзэс мертазы 14 удысъя: токарь, фрезеровщик, сварщик, электромонтёр, столяр, сиён пӧрась, дизайнер, машинаосты но гурт удысын ужась техникаез тупатъясьёс, покчи классъёсты дышетӥсь, нылпи садын ужась, йырси ӵышкись, ужбергатӥсь, ресторанын ужась. Ужрадын вормисе потэмъёс тулыс Саранске мынозы, Приволжск федерал округысь егитъёс пӧлын вожвылъяськозы. Бадӟым финал Москваын ортчоз.

— Асьмелы дасяськоно 2019-тӥ арлы, — шуэ Россиысь та движенилэн улосъёсъя кыл кутӥсез Людмила Иванюк. — Соку «Ворлдскиллс» движенилэн калыккуспо ӵошатсконэз Россиысь Казань городын ортчоз. «Егит профессионалъёс» ӵошатсконын вормисе потэмъёсты ас доразы уже интыяло бадӟым предприятиос. Егитъёслы луонлык сётӥське котыр ласянь асьсэды возьматыны.

Ижысь нылпи творчествоя юртын та ужрадэз сӥё-дано усьтон ортчиз. Люкаськемъёслы вормон сӥзизы шаерысьтымы вылӥ кивалтӥсьёс. Ижысь ссузъёсын дышетскисьёс мастер-классъёс возьматӥзы. Соос пӧлын вал вуоно дизайнер Виктория Турцева. Удмуртпотребсоюзлэн экономикая но правоя Ижысь техникумаз 3-тӥ курсын дышетскись студент вожвылъяськонлэсь уг кышка, бадӟым улонэ выжемлэсь азьло, пе, вань луонозэ ас вылад эскероно.

Валентина Емельянова

Туспуктӥз А. Горбунов

 

Удмурт Дунне
By Удмурт Дунне Февраль 29, 2016 10:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<